Jun 142015
 

1

பாம்பாட்டிகள் வாழும் தேசம், மூன்றாம் உலக நாடு என்றெல்லாம் பொதுவாக மேற்கத்திய நாட்டினரினால் எள்ளி நகையாடப்படும் நம் நாட்டை, கடந்த இரு வாரங்களாய் மேற்கத்திய சமூகம் சற்றே ஆச்சரியத்துடன் தான் பார்த்திருக்கக் கூடும். இந்தியர்களுக்கு உணவிலும், வாழ்க்கை முறையிலும் பாதுகாப்பு குறித்த போதிய விழிப்புணர்ச்சி கிடையாது, இந்தியர்களை எப்படியாவது ஏமாற்றி, தமது பொருட்களை விற்றுவிடலாம், தட்டிக்கேட்கும் அரசியல்வாதிகளையும், அதிகாரிகளையும், விலைக்கு வாங்கி, பல்லாயிர கோடிகளை ஈட்டிடலாம் என்று கொக்கரிக்கும் பன்னாட்டு நிறுவனங்களும் மலைத்திருக்கக் கூடும்.

மேகி நூடுல்ஸ் (MAGGI NOODLES) பற்றிய சர்ச்சை, நம் நாடு முழுதும் காட்டுத்தீயாக பரவி, தடம் மாறிய வாழ்க்கை முறை, உடல் நலம் குறித்த நமது விழிப்புணர்வு போன்றவற்றை பற்றி சிந்தித்து அறிய நமக்கு ஒரு பெரும் தொடக்கமாய் அமைந்துள்ளது.

சுமார் 100பில்லியன் அமெரிக்க டாலர்கள் மதிப்பிலான வருவாயுடன், உலகத்திலேயே பெரிய உணவுப் பொருள்களுக்கான நிறுவனம் என்ற பெருமையுடன் கொடிகட்டி பறக்கும் சுவிட்ஜர்லாந்து நாட்டைச் சேர்ந்த நெஸ்லே (NESTLE) நிறுவனத்தின் ஒரு பிரபலமான தயாரிப்பு தான் இந்த மேகி நூடுல்ஸ்.

1982 ஆம் வருடம் இந்தியாவில் அறிமுகம் ஆகியிருந்தும், கடந்த பத்து வருடங்களாய் மீடியாக்களின் உதவியோடு, தமது விளம்பரங்கள் பட்டித் தொட்டியெல்லாம் சென்று சேர, அசுர வளர்ச்சி கண்டது மேகி. நமது பாரம்பரிய உணவு வகைகளை புறந்தள்ள வைத்துவிட்டு மக்களை (குறிப்பாக குழந்தைகளை) இந்த நூடுல்ஸை தங்கள் உணவில் ஒரு முக்கிய பகுதியாக்க வைத்தது நெஸ்லே. நூடுல்ஸ் விற்பனையில் மட்டும் கிட்டத்தட்ட 60%க்கும் மேல் (MARKET SHARE) தனது கட்டுப்பாட்டிற்குள் வைத்திருந்த நெஸ்லே, பல்லாயிர கோடிகள் வருவாயை இந்தியாவிலிருந்து ஈட்டியது.

கடந்த மாதம் உத்திரப்பிரதேச மாநில FOOD AND SAFETY DRUG ADMINISTRATION (FSDA) அதிகாரிகளின் சோதனையின் போது, மேகியில் ஈயம் (LEAD) மற்றும் எம்.எஸ்.ஜி (MSG – MONOSODIUM GLUTAMATE) என்ற வேதிப்பொருளும், பரிந்துரைக்கப்பட்ட அளவிற்கு அதிகமாக உள்ளதாக குற்றம் சாட்ட, நமது அரசும் FSSAI (FOOD SAFETY AND STANDARDS AUTHORITY OF INDIA) இந்த பிரச்சினையை கையாள ஆரம்பித்தன.

கடந்த ஐந்தாம் தேதி, மேகியில் உள்ள வேதிப்பொருள்கள் மனிதர்கள் உட்கொள்ள பாதுகாப்பற்ற முறையில் உள்ளது எனக் குறிப்பிட்டு, மேகியின் ஒன்பது விதமான உணவுப்பொருள்களையும் இந்தியாவில் விற்க FSSAI அதிரடியாக தடை உத்தரவு பிறப்பித்தது.

FSSAI வழங்கிய இந்த தடை உத்தரவு, மேகியை போன்று டப்பாக்களில் உணவுப்பொருள்களையும், விதவிதமான குளிர்பானங்களை விற்கும் மற்ற பல பன்னாட்டு நிறுவனங்களையும் கொத்தாக உலுக்கியிருக்கும் என்பதில் சந்தேகமே இல்லை.

கட்சி வித்தியாசம் பாராமல், பல மாநில அரசுகளும், அதிகாரிகளும் இந்த விஷயத்தில், உறுதியாக நின்று அவர்களது கடமைகளை முடித்துள்ளபோது, குடிமகன்களாக நமது கடமைகளை நாம் செய்தோமா என்று எண்ணி பார்க்க வேண்டிய சூழ்நிலையில், மேலும் சில கேள்விகள் இத்தருணத்தில் எழுகிறது..

  • மேகியின் மீதும், மற்ற பன்னாட்டு நிறுவனங்கள் விற்கும் பாதுகாப்பற்ற JUNK FOOD, டப்பாக்களில் அடைத்து விற்கும் INSTANT FOODஇன் மீதும் நமக்கு இத்தனை ஆர்வம் வரக் காரணம் என்ன?
  • ஏன் இன்னும் சூப்பர் மார்க்கெட்களிலும், மளிகைக் கடைகளிலும் உணவுப்பொருள்களுக்கு காலாவதியான நாள் (EXPIRY DATE) பார்த்து வாங்கும் பழக்கம் நம்மில் அனைவருக்கும் வருவதில்லை?
  • இட்லி, தோசை, சப்பாத்தி, ரோட்டி, போகா போன்று பல வகை என்னற்ற பாரம்பரிய உணவு வகைகளை மறக்க வைத்து, இந்த புது வரவு உணவுகள் கிட்டத்தட்ட தேசிய உணவாக எவ்வாறு மாறியது?
  • இந்த JUNK FOOD உணவுகளை மாதத்திற்கு என்றாவது ஒருமுறை ஒரு வித்தியாசத்திற்காக வைத்து இருக்காமல், அவைகளையே தினசரி உணவாக மாற்ற காரணம் என்ன?
  • பிரபலமான நடிகர்களோ, நடிகைகளோ, விளையாட்டு வீரர்களோ, ஒரு பொருளுக்கு விளம்பரம் செய்து நடித்தால், ஏன் அந்த பொருள்களின் மீது உடனடியாக அத்தனை ஆர்வம் வந்து விழுந்து விடுகிறோம்? ஏன் தொடர் விளம்பரங்களுக்கு, அப்பொருள்களைப் பற்றி ஆராயமலே அடிமையாகி விடுகிறோம்?

(FSSAI கொடுத்த மற்றொரு தகவல் – 2014 ஆம் ஆண்டு, நெஸ்லே நிறுவனம் தனது உணவு தரத்தை சோதனையிட 19 கோடி ரூபாயை செலவு செய்துள்ளது, ஆனால் விற்பனையை அதிகரிக்க விளம்பரத்திற்கும், பிராண்டிங்கிற்கும் 445 கோடி ரூபாயை செலவு செய்துள்ளது!!)

  • இன்றைய சூழ்நிலையில் தம்பதிகள் இருவருமே வேலைக்குச் செல்கின்றனர். அதனால் இந்த 2நிமிட INSTANT FOOD வகைகளை தேர்ந்தெடுக்கின்றனர். குழந்தைகளும் விளம்பரங்களினாலும், வித்தியாசமான சுவையினாலும் இந்த உணவு வகைகளை விரும்புகின்றனர். இது போன்ற காரணங்கள் இக்காலத்திற்கு வாழும் சூழ்நிலைக்கு ஏற்றார் போல் இருக்கலாம், ஆனால் இந்த உணவு பழக்கம் நமது ஆரோக்கியத்திற்கு கேடுவிளைவிக்கும் என்பதை ஏன் தவற விடுகிறோம்?
  • சாதாரண உணவு விஷயம் தானே? இதற்கு ஏன் இத்தனை கோஷம் என கேள்வி எழலாம். இது சாதாரண விஷயமன்று. செயற்கை முறையில் உருவாக்கப்பட்ட MSG போன்ற ரசாயனங்களை குறிப்பிட்ட அளவிற்குமேல் உட்கொள்கையில் உடல்பருமன் (OBESITY), தலைவலி, வாயுத்தொல்லை, நரம்புக்கோளாறு, இரத்தக்கொதிப்பு, ஆஸ்துமா, தோல் வியாதி, இதயக்கோளாறு என்று விளைவுகள் நீள்கிறதாக ஆராய்ச்சியாளர்கள் பட்டியலிடுகின்றனர். ஆனால் அம்மாதிரியான வேதிப்பொருள்களை, ரசாயனங்களை கொண்ட உணவுவகைகளை தான் நாம் உட்கொள்கிறோம்.
  • அடுத்த தலைமுறையினருக்கு கல்வி தருவது, பொருளாதார ரீதியில் உயர்ந்து நிற்க செய்வது மட்டுமன்றி, அவர்கள் உடல் ஆரோக்கியத்தில் சிறப்பாக இருக்க செய்வதற்கும் நாம் தானே பொறுப்பேற்க வேண்டும்?

இன்னும் எத்தனையோ கேள்விகள்.. நம் நாட்டு பெருமைகள் நமக்கு தெரிவதில்லை அல்லது நமது பாரம்பரிய முறைகளை குறைவாக மதிப்பிடுகிறோம்.

வெளிநாட்டு பொருள் என்றால் அதற்கு இங்கு மதிப்பு அதிகம். பன்னாட்டு நிறுவனங்களும் இந்த மனநிலையை புரிந்து வைத்திருப்பதால் தான், அவர்கள் பொருள்களை விற்றுத்தீர்க்கும் சந்தையாகவே நம் நாட்டைப் பார்க்கின்றனர். ஆனால் துரதிருஷ்டவசமாக அவை நம் கலாச்சாரத்திற்கும், உடல் மற்றும் மன ஆரோக்கியத்திற்கும் கேடாக இருப்பது தான் வேதனை.

முக்கியமான மற்றொரு உதாரணம் – நமது யோகா கலை. அதைக் கூட வெள்ளையர்கள் பயிற்சி செய்து அங்கீகரித்த பின் தான், நம் நாட்டில் நிறைய மக்கள் அதைப் பற்றி சிந்திக்கும் அவல நிலை உருவாகியுள்ளது.

சென்ற ஐந்தாம் தேதி – உலக சுற்றுப்புரச் சூழல் நாள். அன்று ஒரு அருமையான சொற்பொழிவை கேட்க நேர்ந்தது. அந்த கூட்டத்தில் பேசிய தலைமை பேச்சாளர், “கடந்த 20வருடங்களாக நமது சுயநலத்தினால், இயற்கை வளத்தை மிகுதியாக அழித்துவிட்டோம், தேவையான அளவு மரங்களை வளர்க்கவில்லை, காற்று, தண்ணீர் அதிகமாக மாசுப்பட்டுள்ளது. அடுத்த தலைமுறையினர் பொருளாதாரத்தில் சிறந்து விளங்க வேண்டும் என எண்ணுகிறோமே தவிர, அவர்கள் வாழ்வதற்கு ஏற்ற இடமாக இவ்வுலகம் இருக்குமா என்று எண்ணத்  தவறிவிட்டோம். இந்நாட்டின் உண்மையான குடிமகன்களாக நமது சமுதாயக் கடமைகளை செய்ய தவறுகிறோம்” என்று முடித்தார்.

உண்மை தான். அனைவரும் யோசித்து சில முக்கியமான செயல்களை ஆரம்பிக்கும் சூழ்நிலையில் உள்ளோம். அரசுகளையும், அரசு அதிகாரிகளையும் குறை கூறுவதை தவிர்த்து, பொறுப்புள்ள குடிமகன்களாக நமது கடமைகளை சரியாக செய்கிறோமா என சுய பரிசோதனை செய்ய வேண்டும்.

வரும் தலைமுறையின் உடல் ஆரோக்கியம், அவர்கள் வாழ இருக்கும் சுற்றுப்புரச் சூழல் ஆகியவற்றை திட்டமிட்டு வடிவமைக்கும் சிற்பியாக நாம் இருப்பது தான், பெற்றோர்களாக அவர்களுக்கு நாம் சேமிக்கும் செல்வமாக இருக்கும்.

அவர்கள் சாபத்திற்கு ஆளாகமல் இருக்கும் வகையில், பொறுப்புள்ள பெற்றோர்களாக, சமூக ஆர்வலர்களாக, நல்ல குடிமகன்களாக வாழும் கடமை நம் ஒவ்வொருவர் முன்பும் பெரும் சவாலாக உருவாகி நிற்கிறது.

சவாலை சந்திக்க துவங்குவோம், சரித்திரத்தை சரியாக எழுதுவோம்.

விமல் தியாகராஜன் & B+ TEAM

Likes(20)Dislikes(0)
Share
 Posted by at 12:09 am
Jun 142015
 

7.1

(சென்ற இதழ் தொடர்ச்சி..)

ஜப்பானின் நிலப் பரப்பு மிகவும் குறைந்த அளவு இருப்பதால் தன்னிடம் உள்ள மிகப்பெரிய ஏரிகளில் மிதவை சூரிய மின் சக்தி நிலையங்களை அமைக்கத் தொடங்கி உள்ளார்கள். சமீபத்தில் கதோ (Kato) நகரத்தில் உள்ள நிசிகிரா (Nishikara) மற்றும் கிகாசிகிரா (Kihashikara) ஏரியின் மீது பிரம்மாண்டமான மிதவை சூரிய மின் உற்பத்தி நிலையத்தினை கியோசிரா நிறுவனமும், தோக்கியோ லீசிங் நிறுவனமும் இணைந்து நிர்மானித்து உள்ளார்கள்.

இதனை கட்டுவதற்கு ஏழு மாதம் ஆகியிருக்கிறது. இந்த மின் உற்பத்தி நிலையமானது 11250 சோலார் பேனல்களை கொண்டு 3300 மெகாவாட் மின் உற்பத்தியினை கொடுக்கும் விதத்தில் அமைக்கப் பட்டுள்ளது. இத்திட்டத்தின் மூலம் மின் உற்பத்தி மட்டுமல்ல, ஏரி நீரானது கோடை காலத்தில் ஆவியாவதும் தடுக்கப்படுகிறது. சூரிய மின் கல மிதவைகள் தண்ணீரில் மூடி உள்ளதால் இதன் அடியில் நிழற்பாங்கான பகுதியில் மீன்கள் உண்ணும் ஆல்கி (Alge) தாவரங்களும் நன்கு வளர்கின்றன என ஆராய்ச்சியாளர்கள் கண்டுபிடித்துள்ளார்கள்.

தற்சமயம் மிகப் பெரிய சோலார் மின் உற்பத்தி நிலையங்களில் சோலார் பேனல்களின் கீழ் தோட்டங்கள் அமைத்து காய்கறிகளை விவசாயம் செய்யும் ஆய்வு உத்திகள் முன்னெடுக்கப்பட்டு வெற்றியும் கண்டுள்ளார்கள். இதன் மூலம் சோலார் பேனல்களை சுத்தம் செய்யும் நீரானது வீணாகாமல் அதன் அடியில் இருக்கும் காய்கறி தோட்டத்திற்கு பாய்ச்சப்படும். இதன் மூலம் நீரை வீணாக்காமல் ஒரே கல்லில் இரண்டு மாங்காய்கள் அடித்துள்ளனர் ஜப்பானியர்கள்.

மழை பெய்தால், மேக மூட்டமாக இருந்தால் சூரிய மின்சக்தி கிடைக்காது போன்ற எளிய கேள்விகள் நம்மில் பெரும்பாலானோருக்கு உள்ளது. ஜீரோ டிகிரி நிலவும் பனி பெய்யும் குளிர் காலத்தில்  கிடைக்கும் மிகக்குறைவான சூரிய  ஒளியின் (30 வெபர்/மீட்டர்3) மூலம் 30 கிலோ வாட் சூரிய மின் உற்பத்தி செய்யும் நிலையங்கள் ஜப்பானில் உள்ளது (மேலுள்ள படத்தில் காண்க).

குளிர் காலத்தில் சூரிய ஒளியானது ஜப்பானில் குறைவாகவே இருக்கும். எனவே சூரிய வெளிச்சம் எப்போதும் கிடைக்கின்ற வான்வெளியில் இருந்து ஏன் சூரிய மின் உற்பத்தி செய்து அதனை பூமிக்கு ரேடியோ அதிர்வலைகளாக மாற்றம் செய்து அனுப்பக் கூடாது என்ற ஆராய்ச்சியில் ஜப்பான் விண்வெளி நிறுவனம் (Japan Aerospace Exploration Agency-JAXA) களத்தில் இறங்கியது.

இந்த நுட்பத்தின் மூலம் ஏற்கனவே நடைமுறையில் உள்ள சூரிய மின்சக்தியின் (solar powered satellites) மூலம் இயங்கும் செயற்கை கோள்களைப் போல் விண்வெளியில் அமைக்கப்படும் பெரிய அளவிலான சூரிய மின்சக்தி செயற்கோள்கள் மூலம் 2030 ஆம் ஆண்டுக்குள் ஒரு ஜிகாவாட் மின் உற்பத்திக்கான எதிர்கால திட்ட விதையினை தற்போதே விதைத்துள்ளது.

இதன் சோதனை முயற்சியாக இந்த ஆண்டு மார்ச் மாதம் JAXA மற்றும் மிட்சுபிக்சி நிறுவனமும் இணைந்து 10 கிலோவாட் சூரிய மின் சக்தியினை கம்பிகளற்ற முறையில் (wireless) மைக்ரோஅலைகளாக மாற்றி 1.8 கிமீ அனுப்பி அவற்றினை ஆன்டெனாக்கள் (receiver antenna) மூலம் பெறப்பட்டு மீண்டும் மின்சக்தியாக மாற்றி சாதனை படைத்துள்ளனர். இது மின்சக்தி கடத்தும் (power transmission) துறையில் இனி வரும் காலங்களில் மிகப் பெரிய புரட்சிக்கு இச்சோதனை முன்னோடியாக இருக்கும் என்பதில் ஐயமில்லை.

மிகப் பெரிய சூரிய மின் சக்தி திட்டங்கள் ஒருபுறம் இருக்க, அன்றாட வாழ்க்கை சூழலில் மக்களின் தேவைக்கும் சூரிய மின் சக்தியினை பயன்படுத்த ஆரம்பித்தது ஜப்பான் அரசு. ஒரு முறை தோக்கியோவில் உள்ள அகிகாபாரா கடைத் தெருவிற்கு சென்றபோது அங்கிருக்கும் சாலையோர சிக்னல் கம்பங்கள் சூரிய மின்சக்தியின் மூலம் இயக்கும் வகையில் அமைத்து இருந்தார்கள். மேலும் ஜப்பானின் பெரும்பாலான தெரு சந்திப்புகளில் வாகன விபத்தினை தடுக்க, வாகன ஓட்டிகளை எச்சரிக்கும் விதத்தில் தார் சாலைகளில் சூரிய மின் சக்தியின் மூலம் இரவில் ஒளிரும் சிகப்பு எல்ஈடி விளக்குகள் பொருத்தப்பட்டுள்ளது.

பகலில் சூரிய மின் சக்தியினை இதில் இணைக்கப்பட்டுள்ள சிறிய வடிவிலான பேட்டரிகள் சேமித்து வைத்துக் கொண்டு இரவில் விளக்குகளுக்கு மின்சக்தியினை வழங்குகிறது. ஜப்பானில் ஏற்பட்டுள்ள எல்ஈடி துறையின் விஞ்ஞான சாதனைகளும், உற்பத்தி புரட்சியும் இது போன்ற புதுமை திட்டங்களுக்கு நன்கு கை கொடுக்கின்றது. (2014 ஆம் ஆண்டில் நீல நிற எல்ஈடி கண்டுபிடிப்பிற்காக மூன்று ஜப்பானிய பேராசிரியர்களுக்கு நோபல் பரிசு வழங்கப்பட்டது குறிப்பிடத்தக்கது).

தற்போது சூரிய மின் சக்தியின் மூலம் இயங்கும் தானியங்கி குளிர்சாதனங்களை தோக்கியோ நகர தெருக்களில் காணமுடிகிறது. பேரிடர் காலங்களில் மின்சாரம் துண்டிக்கப்படும் போது கூட இந்த தானியங்கி இயந்திரங்கள் சூரிய மின்சக்தியின் மூலம் இயங்குவதால் மக்களுக்கு இது பெரும் வரப் பிரசாதம் ஆக இருக்கிறது. இது தவிர சூரிய மின்சக்தியின் மூலம் ஒளிரும் பேருந்து நிழற் குடைகள், சாலை ஓரங்களில் தட்பவெப்பநிலை மற்றும் காற்றின் ஈரப்பதம் போன்றவற்றினை காட்டும் உணர்விகள் (sensors) சூரிய மின் சக்தி மூலம் பேட்டரிகள் துணையுடன் இயங்குகிறது. தோக்கியோவின் மியோதன் (Myoden) பகுதியில் உள்ள சாலை ஓரங்களில் உள்ள செடிகள் வண்ண ஒளியில் சூரிய மின் சக்தி மூலம் இரவிலும் ஒளிர்கிறது.

தற்போது ஜப்பானில் உள்ள தோபு உயிரியல் பூங்காவில் (Tobu Zoo, Japan) சிறிய ரக சோலார் பேனல் மூலம் இயங்கும் சுற்றுலா தகவல் விளக்க வழிகாட்டிகள் நிறுவப்பட்டுள்ளது (solar powered audio tour guide). சூரிய ஒளி மூலம் இயங்கும் இந்த இயந்திரத்தில் 100 யென் காசைப் (சுமார் 50 ரூபாய்) போட்டவுடன் இதில் இணைக்கப்பட்டுள்ள ஹெட்போனில் அந்த கருவிக்கு முன்னால் உள்ள உயிரினங்களை பற்றிய தகவல்களை கேட்கலாம். இதன் மூலம் மின்சாரம் சேமிப்பதுடன் நல்ல வருமானமும் கூட. இதே போன்று நமது ஊரிலும் காசை போட்டுச் சூரிய மின் சக்தியில் இயங்கும் மொபைல் போன் ரீசார்ஜர் நல்ல பயனளிக்கும். இவற்றினை பொது மக்கள் புழங்கும் பேருந்து நிலையம், ரயில் நிலையம் என வைத்தால் அரசுக்கு நல்ல வருமானமும் வரும்.

இது தவிர சூரிய ஒளியின் மூலம்  போட்டோ கேட்டலிஸ்ட்கள் (photocatalyst) துணை கொண்டு குடி நீரை சுத்திகரித்தல், காற்றில் உள்ள கார்பன் மோனாக்சைடு, நைட்ரஜன் ஆக்சைடு போன்ற  நச்சு வாயுவினை சுத்திகரிப்பு செய்தல் போன்ற புதிய நுட்பங்களும் வந்து விட்டது.

கட்டிடங்களுக்கு வருடா வருடம் வண்ணம் பூசாமல் சூரிய ஒளி மற்றும் காற்றில் உள்ள ஈரப்பதம் இவற்றின் மூலம் தானாகவே சுத்தம் செய்து கொள்ளும் (self-cleaning coating) அதி நீர் ஒட்டுமை தன்மை கொண்ட (super hydrophilic) டைட்டானியம் ஆக்சைடு பூச்சுகள் மூலம் இருபத்தைந்து ஆண்டுகளுக்கு பளிச்சிடும் வகையில் நானோ பூச்சுகளை (nano-coating) ஜப்பானியர்கள் பயன்படுத்த ஆரம்பித்து விட்டார்கள். இதன் மூலம் பெரும் பொருட் செலவும், மனித உழைப்பும் சேமிக்கப்படுகின்றது.

7.2

இந்த புதிய வெற்றியின் சூட்சுமம் சூரிய ஆற்றலை கவரும் நீடித்த தன்மை கொண்ட குறைகடத்திகளை (semiconductors) கண்டறியும் ஆராய்ச்சியினை வெகு நேர்த்தியாக ஜப்பான் முன்னெடுத்து சென்றது. இதன் கூடவே, புதிய நுட்பங்களை மக்கள் ஊக்குவிக்கும் விதம் என இந்த இரண்டு காரணங்களும், இன்று ஜப்பான் நாட்டினை சூரிய ஒளியினை பயன்படுத்துவதில் உலகின் முன்னோடி நாடாக உயர்த்தி பிடித்துள்ளது.

நம் இந்திய தேசத்தினையும் உலக அரங்கில் சூரிய ஒளியின் மூலம் மாசற்ற, மரபு சார எரிசக்தியாக மாற்றுவதில் முன்னோடி நாடாக மாற்றிட மக்களாகிய நாம்தான் அரசுக்கு பக்க பலமாக நின்று உதவ வேண்டும்.

அதற்கு முன்பாக வெகு சன மக்கள் புழங்கும் இடங்களில் சூரிய மின்சக்தியின் மூலம் சிறிய கருவிகளை அரசு நிறுவி அவர்களுக்கு சூரிய மின்சக்தியின் மீதான நம்பகதன்மையினையும், விழிப்புணர்ச்சியினையும் கொண்டு வர வேண்டும். பொறியியல் பயிலும் கல்லூரி மாணவர்கள் சூரிய மின் சக்தியின் மூலம் இயங்கும் புதிய கருவிகளை வடிவமைத்து குறைந்த விலையில் மக்களுக்கு பயன்படும் வகையில்சந்தைப்படுத்தலாம்.

முனைவர். பிச்சைமுத்து சுதாகர்

தோக்கியோ அறிவியல் பல்கலைக் கழகம்

ஜப்பான்

(E-mail: vedichi@gmail.com)

Likes(3)Dislikes(0)
Share
Jun 142015
 

2.1

செய்யும் தொழிலே தெய்வம் என தனது தொழிலில் ஒருவர் முழுமையாக தன்னை அர்ப்பணித்துவிட்டால், எந்த இலக்கையும் அடையலாம், எத்தனை உயரத்தையும் எட்டலாம் என நிறுபித்து வருகிறார் சென்னை போரூரை சேர்ந்த திரு.அப்பர் லக்ஷ்மணன்.

தச்சுத் தொழில் செய்து வரும் இவர், தன் தொழில் மீது உள்ள பக்தியாலும், கற்பனை திறனாலும், யோசிக்க கூட முடியாத பல பொருட்களையும் வடிவமைத்து, தன்னை மிகவும் வித்தியாசப்படுத்திக் காட்டுகிறார்.

தன் குருவின் ஆசிர்வாதத்தால், திரு.அப்துல் கலாமை சந்தித்தது, தன் வாழ்வின் பெரும் பாக்கியம் என்று கூறியவர், சுனாமியிலும் வள்ளுவர் சிலை நின்ற தன்மையையும், மாமல்லபுரம் “மரபு சிற்பக் கட்டிட கலைக் கல்லூரியின்” பெருமையையும், நமது சிற்பத்துறை விவரங்களை சேகரித்து அமெரிக்காவில் “MYONIC SCIENCE AND TECHNOLOGY” ஆரம்பித்தது பற்றியும் விளக்கியது ஆச்சரியத்தில் ஆழ்த்தியது.

மரங்களை வைத்து, இவர் செய்த கார், பைக், சைக்கிள், விளக்கு போன்ற என்னற்ற எழில்மிகு பொருட்கள் இவரின் தனி அடையாளமாய் திகழ்கின்றன. இனி இவரது பேட்டியிலிருந்து..

வணக்கம் சார், உங்களை அறிமுகப் படுத்திக்கொள்ளுங்கள்..

வணக்கம், என் பெயர் அப்பர் லக்ஷ்மணன். என் தகப்பனார் பெயரான அப்பர் என்பதை எனக்கு அடைமொழி ஆக்கிக்கொண்டேன். காரணம், என் தகப்பனார், குரு, நண்பர் அனைத்துமே அவர்தான். 18வயதிலிருந்தே இந்த தச்சு தொழிலை செய்து வருகிறேன்.

எட்டாவது தலைமுறையாக இத்தொழிலை நான் செய்வதால், இந்த வேலைத்திறன் என் இரத்தத்தில் ஊறியிருக்கும் என நினைக்கிறேன். அதுதான் இத்தொழிலின் மீது தீராத ஆர்வத்தையும், ஈடுபாட்டையும் கொடுத்திருக்கிறது. நமக்குறிய குலத்தொழிலை, நாம் விரும்பும் பணியை, நம்க்கு வருகின்ற செயல்களை செய்கையில் பேரின்பமும், ஆன்மதிருப்தியும் கிடைக்கிறது.

உங்கள் சாதனைகள் குறித்து..

என் மூதாதையர்கள் செய்ததை ஒப்பிடுகையில், நான் பெரிதாக ஏதும் செய்துவிடவில்லை என நினைக்கிறேன். ஆனாலும் மக்கள் நான் முழுவதுமாக வேலமரத்திலேயே செய்த கார் வண்டி, இருசக்கர வண்டி (பைக்), சைக்கிள், மின்விசிரி, லைட்டுசெட்டுகள், கடிகாரம் என மரத்தில் செய்த மற்ற பலப் பொருட்களை வித்தியாசமானதாக, புதுமையானதாக  பார்த்து சிறப்பாக பேசுகின்றனர். ஆனால் இதைவிட பலமடங்கு புதுமைகளையும், தொழில்நுட்பங்களையும், விஞ்ஞானத்தையும் எனது முன்னோர்கள் இத்துறையில் சாதித்துள்ளனர். தகவல் உலகம் வளர்ச்சியே அடையாத அந்த காலத்தில் அவர்கள் எவ்வாறு அச்சாதனைகளை புரிந்துள்ளனர் என்பதே ஒரு ஆச்சரியம்.

2.2

அக்காலத்தில் ஒரு துறையை சார்ந்தவர்கள் அத்துறையிலேயே தங்களை அற்பணித்து இருந்துள்ளனர். 24மணி நேரமும் வேறு சிந்தனையின்றி அதே எண்ணத்துடன் வாழ்ந்துள்ளனர். அதன் மூலம் ஏற்பட்ட உணர்வுகள் தான் அவர்களை வழிநடத்தியுள்ளது. உலகம் உருண்டையென சுற்றிப் பார்த்தா கலிலியோ கூறினார்? அது ஒரு ஞானதிருஷ்டி. அதேபோல் தான், இந்த துறையில் பல ஞானிகள் வாழ்ந்தனர். ஒரு மரத்தைப் பார்த்தவுடன் அதனைப் பற்றிய முழு குணங்களையும் கூறும் பக்குவத்தை பெற்று இருப்பார்கள்.

நீங்களும் உங்கள் முன்னோர்களும் அந்த மாதிரி உணர்ந்த ஞானத்தை ஏன் எழுத்து வடிவமாக பெரியளவில் வைக்கவில்லை?

இத்தொழிலை செய்தவர்கள் யாரும் பெரியளவில் படிக்கவில்லை என்பது தான் முக்கிய காரணம். இரண்டாவது, சில விஷயங்களை உணர்ந்து செய்தல் வேண்டும். எல்லாவற்றையும் ஏட்டில் எழுதியதை படித்து புரிந்துக்கொள்ள இயலாது.

இதே கேள்வியை என் தந்தையிடம் ஒருமுறை கேட்டப்போது, அவர் கொடுத்த பதில். “நீ சக்கரை, வெல்லம் இரண்டையும் எடுத்துக்கொள், இரண்டையும் சுவைத்தப்பின் சுவையில் வேறுப்பாட்டை அறிகிறாய். ஆனால் அவற்றை ஒரு பெரிய கோப்பாக எழுத முடியுமா?” என்றார். அதேபோல் தான் இத்தொழிலும்.

ஸ்தபதி வேலைகளில் உங்களின் அனுபவம் பற்றி..

அது ஒரு ஆச்சர்யமும் அற்புதமும் கொண்ட தொழில். ஸ்தபதிகளிடம் இல்லாத கட்டிடக் கலை நிபுணத்துவமும், அறிவியலும் யாரிடமும் இல்லை என கூறுவேன். அதிலும் இந்தியாவில், குறிப்பாக தமிழக ஸ்தபதிகள் பல சாதனைகளை படைத்துள்ளனர். எனது குருநாதரும், பத்மபூஷன் விருதுப்பெற்ற சிற்பத்துறையின் மாமேதையுமான டாக்டர்.வை.கணபதி ஸ்தபதியும் பல சாதனைகளைப் புரிந்துள்ளார்.

கணபதி ஸ்தபதி கன்னியாக்குமரியில் உள்ள 133அடி திருவள்ளுவர் சிலை, சென்னை வள்ளுவர் கோட்டம், சென்னை அண்ணா ஆர்ச் (வளைவு) போன்ற பல சிறப்பு கட்டிடங்களை வடிவமைத்தவர் (DESIGN). உலகுமெங்கும் 600 கோயில்களுக்கு ஸ்தபதியாக பணிப்புரிந்தவர். மாமல்லபுரம் சிற்பத்துறை கலைக்கல்லூரியில் 35ஆண்டுகள் பணிப்புரிந்தார்.

சில வருடங்களுக்கு முன் ஜப்பானில் மிகப்பெரிய புத்தர் சிலையை கல்லினால் செய்யும் திட்டம் தொடங்கப்பட்டது. அதற்கு கல் வேலைப்பாடில் சிறந்த தேசம் எது என அவர்கள் ஆராய்ந்து, இந்தியாவை தேர்ந்தெடுத்தனர். பின் அப்போதைய பிரதமர் திருமதி.இந்திரா காந்திக்கு கடிதம் அனுப்பினர். ஸ்தபதிகள் அதிகம் உள்ள தமிழகத்திற்கு அந்த கடிதம் வரவும், மகாபலிபுரம் சிற்பக் கல்லூரிக்கு தமிழக அரசு அதை அனுப்பியது. அதில் யார் சிறப்பான ஸ்தபதி என் பார்த்து, கணபதி ஸ்தபதியை தேர்ந்தெடுத்து, அவரை ஜப்பானுக்கு அனுப்புகின்றனர். அவரும் மிக சுலபமாக அந்த வேலையை செய்து முடித்தார். இது போல் ஜப்பானுக்கும், வேறு சில நாட்டிற்கும் பல முறை அழைப்பு வரவே, அங்கெல்லாம் சென்று வெற்றிகரமாக பல கட்டிடப் பணிகளைச் செய்தார்.

சிற்பத்துறையில் ஏதெனும் சுவாரசியமான அனுபவம் பற்றி..

சுனாமி வந்தபோது கன்னியாகுமரி வள்ளுவர் சிலையையும் உயரமான கடல் அலைகள் சீற்றத்துடன் தாக்கின. இருந்தும் சிலைக்கு ஏதும் பாதிப்பு வராமல் பாதுகாப்பாக இருந்துததைப் பார்த்து வியந்த அப்போதைய குடியரசுத் தலைவர் திரு.அப்துல் கலாம் அவர்கள், சிலையை கட்டிய கணபதி ஸ்தபதியை தொலைபேசியில் தொடர்புக்கொண்டு விவரத்தை அறிய டில்லிக்கு வருமாறு அழைத்தார். அப்போது ஸ்தபதிக்கு உடல்நிலை சரியில்லாத காரணத்தினால், அவர் என்னை அனுப்பி வைப்பதாக கூறி, என்னை குடியரசு தலைவர் மாளிகைக்கு அனுப்பிவைத்தார்.

12நிமிடம் என்று வரையருக்கப்பட்ட மீட்டிங் நானும், திரு.கலாம் அவர்களும் பேச பேச, 35 நிமிடங்கள் தாண்டி ஓடிவிட்டது. என் கூடவே இருந்து, மதிய உணவும் அவர் சாப்பிட்டதும் மறக்கவே முடியாத தருணமும் பாக்கியமும்.

அடுத்த விஷயம். அரசு பதிவுப்பெற்ற 36814 கோவில்கள் தமிழகத்தில் உள்ளன. மீனாட்சி கோவில், தஞ்சை பெரிய கோவில், ராமேஷ்வரம் கோவில், இவைகளுக்கு எல்லாம் மதிப்பை கணக்கிடவே முடியாது. அக்கோவில்களில் உள்ள ஒரே ஒரு தூண் மட்டும் எத்தனை லட்சம் மதிப்புடையது, எத்தனை நாட்கள் செய்வதற்கு ஆகும் என்பதெல்லாம் ஆச்சரியமான விஷயம். எத்தனை விலை உயர்ந்த சிற்பங்களை நமது முன்னோர்கள் உருவாக்கியுள்ளனர்! சிற்பங்களில் உள்ள கதை, அதன் கருத்து, அதை வடித்த விதம் இதெல்லாம் மிகச் சிறப்பு வாய்ந்தவை. என்னைப் போன்ற கலைஞர்கள் கோவில்களுக்கு செல்லும்போது, வெளியே உள்ள தூண்கள், கட்டிடங்களின் சிறப்பு, சிற்பங்கள், இவற்றை பார்த்தே பிரமித்து நின்று விடுவோம்.

சமீபத்தில் கூட, சென்னை அண்ணா ஆர்ச்சை சீர் செய்யும் பணியில், பல பொறியாளர்கள், படித்த கட்டிட வல்லுநர்கள் வந்தும், அதை செய்து முடிக்க முடியாத சூழ்நிலையில் எங்களைப் போன்ற சிற்பிகளை வைத்து தான் அச்செயலை முடிக்க முடிந்தது. அரசு துறைகளில், பொதுபணித்துறை, வனத்துறை போன்ற துறைகளில் எங்களைப் போன்றவர்களை ஆலோசனையாளர்களாய் வைத்துக்கொள்தல் பலனளிக்கும்.

MODERN SCIENCE உங்களைப் போன்றோருடன் எவ்வாறு இணைந்து செயல்படலாம் என்று நினைக்கிறீர்கள்?

தமிழ் மருத்துவம் அழிந்து வருவது போலவே, ஒவ்வொரு துறையை சார்ந்த அறிவியலும் சிறிது சிறிதாக அழிந்து வருகிறது. இப்போது இந்த துறையில் படித்து வருபவர்கள் தாங்கள் செய்தவற்றை ஆராய்ந்து இந்த பழைய அறிவியல் முறைகளை வெளிக்கொண்டு வரலாம். இதற்காக இரண்டு உதாரணங்களை கூறுவேன்.

என் தந்தை காலத்தில், சுண்ணாம்பு பூச்சிவலை செய்வார்கள். அப்போது ஒரு தண்ணீர் தொட்டில் கட்டி, குறவ மீனை அதனுள் விடுவார்கள். மீனும் சலசலவென அந்த தொட்டியில் சுற்றிக்கொண்டே இருக்கும். மீனின் கழிவுகள் நிறைந்த கொழகொழப்பாக இருக்கும் அந்த நீரை எடுத்து, சுண்ணாம்பில் ஊற்றி கலப்பார்கள். சிறிது நாட்களில் அது கல் போன்று உறுதியாக மாறிவிடும் என என் தந்தை கூறுவார். இது போன்ற பல விஷயங்களை நம் முன்னோர்கள் உணர்ந்து செய்துள்ளார்கள். ஆனால் ஏன், எதற்கு இவற்றையெல்லாம் எழுதி வைக்கவில்லை. அதை அடுத்த தலைமுறையினரிடம் கூறிமட்டும் உள்ளனர். அந்த கழிவு நீர் எவ்வாறு கல்லாக மாறுகிறது, என்ன தொழில்நுட்பம், அதன் ரசாயன தன்மை என்ன என்று இன்றைய அறிவியலின் துணைக் கொண்டு இத்துறையை சேர்ந்த மாணவர்கள் படிக்கலாம்.

இரண்டாவது, நான் செய்த காரில் சைலன்சர் மரம் தான். இன்று வரை, அது தீப்பற்றி எரியாமல் நன்றாக தான் ஓடுகிறது. என் அனுபவத்தை வைத்து தேவைப்பட்ட மரங்களைக் கொண்டு செய்தேன். இன்றைய அறிவியல் இவற்றையெல்லாம் ஆராய்ந்து உலகுக்கு சொல்லி கோப்புகளை ஏற்படுத்தலாம்.

வைத்தியநாத ஸ்தபதியும், கணபதி ஸ்தபதியும் எழுதிய சில புத்தகங்கள் தான் இன்று வரை இத்துறைக்கு என கோப்புகளாக உள்ளன. கணபதி ஸ்தபதி எழுதிய “சிற்பச் செந்நூல்” என்ற ஒரு புத்தகத்தை வைத்து அமெரிக்காவில் “MYONIC SCIENCE AND TECHNOLOGY” என்று ஆரம்பித்துவிட்டார்கள்.

நீங்கள் இந்த கலையை எவ்வாறு அடுத்த தலைமுறையினரிடம் சென்று சேர்க்கிறீர்கள்?

பொருளாதார இந்த துறையில் சற்று குறைவு தான். அதனால் இன்று பலரும் வேறு துறைக்கு செல்லும் சூழ்நிலை. ஆனால் பொருளாதாரம் மட்டும் முக்கியமில்லை, செய்யும் தொழிலில் திருப்தி தான் முக்கியம் என ஈடுபாடு உள்ளவர்களுக்காக இத்துறைக்கு என ஒரு பாடசாலையை நிறுவியுள்ளேன். இதில் இளம் மாணவர்களுக்கு பயிற்சியும் கொடுத்து வருகிறேன். இத்தொழிலை காப்பாற்றவும், வருங்காலத்தில் நல்ல தச்சர்களை தயார் செய்யவும் இதை செய்து வருகிறேன். இப்போது 300க்கும் மேற்பட்டவர்கள் இதில் சேர்ந்துள்ளனர். கலைஞன் அழிந்தால், கலை அழியும்; கலை அழிந்தால் ஒரு கலாச்சாரமே அழியும். அதை பாதுகாக்கும் முயற்சியில் ஈடுப்பட்டுள்ளேன்.

மகாபலிபுரம் சிற்பக் கல்லூரியைப் பற்றி..

காந்தி மண்டபத்தை கட்டிய திரு.வைத்தியநாதன் ஸ்தபதி தான் இந்த கல்லூரியை ஒரு பயிற்சி பட்டரையாக ஆரம்பித்தார். அதுதான் இன்று “மரபு சிற்பக் கட்டிட கலைக் கல்லூரி” என மாமல்லபுரத்தில் உள்ளது.

இந்தக் கல்லூரியில் 4300 ரூபாய் தான் கட்டணம். நிறைய மாணவர்கள் சேர்வதில்லை, ஒருவேலை லட்சக்கணக்கில் கட்டணம் வசூலித்தால் தான் மாணவர்கள் சேருவார்கள் என நினைக்கிறேன். 12ஆம் வகுப்பு முடித்த எந்த மாணவருக்கும் அங்கு அனுமதி கிடைக்கும். என் மகனையும் கூட இந்த கல்லூரியில் தான் சேர்த்துள்ளேன். நான்கு வருடங்களில் இந்தியா முழுதும் உள்ள பல புராதன கோவில்களுக்கு கூட்டிச் சென்று, சிற்பக் கலைகளை மாணவர்களுக்கு சொல்லித்தந்து சிறப்பான சிற்பிகளாய் தயார் செய்கின்றனர்.

மக்களுக்கு நீங்கள் கூற விரும்புவது?

அவரவர் துறையை அவரவர் விட்டுவிடாது செய்ய வேண்டும், எங்களைப் போன்ற அனுபவம் உள்ளவர்களிடம், நடைமுறை அறிவை கட்டிடத்துறையில்  படித்து வரும் மாணவர்கள் சேகரித்துக் கொள்ள வேண்டும். கோவிலைப் பற்றியோ, கட்டிடக்கலைப் பற்றியோ ஆராய்ச்சி செய்பவர்கள் அதன் முடிவுகளை வெளியிடுமுன், எங்களைப் போன்றோரிடம் கலந்து ஆலோசிக்கலாம். அரசும் அதிகார்களும் கட்டிடங்களுக்கு எங்களைத் திட்டம் தீட்டுகையில் உபயோகப் படுத்திக்கொள்ளலாம். கலையையும், கலாச்சாரத்தையும் பராமரித்து வரும்  எங்களைப் போன்றோருக்கான அங்கிகாரமும் மதிப்பும் இன்னும் நன்றாக இருக்கலாம் என்பது என் அபிப்ராயம்.

உங்கள் தொழிலிற்காக மரங்களை வெட்ட வேண்டி வருமே?

ஒரு உயர்ந்த மனிதர் கடைசி வரை சாகாமல் வாழ்ந்து கொண்டே இருக்கலாமா? பழைய மனிதர்கள் செல்வதும், புதியவர்கள் பிறப்பதும் தானே இயற்கை. அதே போல் தான் மரங்களும். முற்றிய மரங்களை வெட்டி தான் ஆக வேண்டும். அவ்வாறு வெட்டப்படாமல் இருக்கும் முற்றிய மரங்களில் இருந்து தான் காட்டுத்தீ பரவி சுற்றியுள்ள பல மரங்கள் எரிந்து சாம்பலாக காரணமாகிறது. அதனால் முற்றிய மரங்களை வெட்டி, பல புது மரக்கன்றுகளை, செடிகளை வளர்க்க வேண்டும்.

நீங்கள் வாங்கிய விருதுகள் பற்றி..

மரத்தினாலேயே ஆன ஒரு விளக்கை செய்துள்ளேன். அதைப் பாராட்டி தமிழக அரசு 1லட்சம் பரிசும் விருதும் கொடுத்துள்ளது. பூம்புகார் துறை விருது கிடைத்துள்ளது. கேரள அரசு என் மரக் காரின் வடிவமைப்பிற்கு ஒப்புதல் கொடுத்துள்ளது. இவை அனைவற்றிர்கும் மேல், கணப்தி ஸ்தபதி, எனக்கு பெருந்தட்சர் என்ற விருதை வழங்கி கவுரவித்தார்.

NDTV, BBC, ஹிந்து, சன் டீவி, தமிழ், மலையாளம், ஹிந்தி மொழிகளில் உள்ள பல தினசரி பத்திரிக்கைகள் வந்து என் மரத்தின் பணிகளை கண்டு பாராட்டிச் சென்றுள்ளனர். நான் வடிவமைத்த கார், இருசக்கர வண்டி பற்றி பெருமையாக பேசிச் செல்கின்றனர். எங்கள் சித்தாந்தம், அறிவியல் அனுபவம் பற்றி சிறப்புகளையும் பேசினால் நன்றாக இருக்கும். இந்த ஏக்கத்தை பூர்த்தி செய்யும் வகையில் தமிழக அரசு, சென்னை வள்ளுவர் கோட்டத்தில் இடம் கொடுத்ததில் 10நாள் கண்காட்சி நடத்தினேன். மாணவர்களுக்கு இவைகளை சொல்லிக்கொடுத்து, இத்துறையை முடிந்தவரை வளர்த்து கொண்டிருக்கிறேன்.

Likes(7)Dislikes(0)
Share
Jun 142015
 

3

 

கோபி ஒரு முன்கோபி. 

கோபிக்கு  கோபம் வரும் போது, அவன் மூளையை விட அவன் நாக்கு வேகமாக வேலை செய்யும்.

அவனது அப்பா அவனை ஒரு நாள் கேட்டார். ”ஏன் கோபி, இப்படி எடுத்ததுக்கெல்லாம் கோபப் படறியே? ஒரு வேளை, ரத்த கொதிப்பு, கித்த கொதிப்பு  இருக்குமோ? டாக்டரை வேணா பாரேன்?”. 

“நானா? நானா? லூசாப்பா நீ? நானா கோபப்படறேன்?”

“ஆமா கோபி! நீயேதான் ! நான் சொல்லலே ! உன் பிரண்ட்ஸ் எல்லாம் சொல்றாங்களே! ” என்றார் அப்பா தயங்கிய படியே.

“அவங்க கிடக்கறாங்க. தண்டங்க. அது சரி! உன்னை யாரு இதெல்லாம் அவங்க கிட்டே கேக்க சொன்னது? உனக்கு வேறே வேலை இல்லே?”

“கோபிக்காதே கோபி ! உன் பிரண்டு மது தான் நேத்திக்கு சொன்னான். நீ சின்ன விஷயத்துக்கெல்லாம், ஆபீஸ்ல காட்டு கூச்சல் போடறியாமே?”

“சொன்ன பேச்சு கேக்கலன்னா, பின்னே என்ன அவனுங்களை கொஞ்சுவாங்களாமா?”- கோபிக்கு கோபம் பொத்துக் கொண்டு வந்தது.

“அப்புறம், உன் அத்தை கூட சொல்றா, நீ அவளோட, அநியாயத்துக்கு சண்டை போடறியாம்! ரொம்ப வருத்தம் அவளுக்கு!” அப்பா.

“நீ சும்மா இருப்பா! அவ என்ன சொன்னான்னு உனக்கு தெரியுமா?”

“இருக்கட்டும்டா! எதுக்கும் நீ டாக்டரை போய் பாத்துட்டு வாயேன்!” 

“நான் எதுக்கு டாக்டரை பார்க்கணும்? எனக்கு ஒண்ணுமில்லை!” 

“இல்லேடா! எதுக்கும் செக் பண்ணிகிட்டா, நல்லது தானேடா? சொன்னாக் கேளு கோபி !.”

“சரி சரி, போய் பாத்து தொலைக்கறேன்! இல்லேன்னா விடவா போறீங்க?”

***
கோபி தனது குடும்ப டாக்டர் அறையில் .

“குட் மார்னிங் டாக்டர்”

“வாங்க கோபி! என்ன விஷயம்?”

“ஒண்ணுமில்லே டாக்டர், அப்பா தான் என்னை உங்க கிட்ட செக் அப் பண்ணிக்க சொன்னார்.”

 “அப்ப சரி,  செக் பண்ணிடலாம். உக்காருங்க ! உங்களுக்கு என்ன ப்ராப்ளம்?”

 கோபி உட்கார்ந்தான். “ ஒன்னும் பெருசாயில்ல டாக்டர்! சின்ன சின்ன விஷயத்துக்கெல்லாம் கோபம் வரது. அடக்க முடியலே! அதான்..

 “ஓகே. செக் பண்ணிடலாம்”

செக்கிங் முடிந்தது.

“கோபி, உங்களுக்கு ரத்த அழுத்தம் கொஞ்சம் அதிகமாக இருக்கு. இன்னும் சில டெஸ்ட் எடுக்கணும். எழுதி கொடுக்கறேன். உப்பு நிறைய சாப்பிடுவீங்களா?”

 “ இல்லே டாக்டர்!”

 “சிகரட், மது இதெல்லாம்?”

 “எப்பவாவது மது உண்டு டாக்டர்! ”

 “சரி, எவ்வளவு நாளா உங்களுக்கு இந்த பிரச்சனை?”

 “தெரியலே டாக்டர். அடிக்கடி கோபம் வரும், அவ்வளவுதான்”

“கோபம் வந்தால் என்ன பண்ணுவீங்க?”

“வாய்க்கு வந்த படி திட்டுவேன்”

“ஆபீஸ்லே கோவம் வருமா? அதனாலே  தலைவலி, படபடப்பு  அது மாதிரி ஏதாவது?”

“ஆமா. ரொம்ப  பிரச்னைகள் வருது டாக்டர். வாயே குழறுது!”

 “ஏன் கோபி ! ஆபீஸ் கோபத்தையெல்லாம் வீட்டில் காட்டுவீங்களா?”

“ஆமா டாக்டர், காட்டுவேன். அது எப்படி உங்களுக்கு தெரியும்?” . கோபி தலையை தாழ்த்திக் கொண்டான். அவன் முகம் சிவக்க ஆரம்பித்து விட்டது. 

 “அது இருக்கட்டும் !  அப்போ வீட்டிலே அடிக்கடி சண்டை வருமா என்ன?”

 “வரும். அப்பா சொன்னாரா?” கோபியின் குரலில் ஒரு கோபம் தெரிந்தது.

“இல்லியே. சும்மா  கேட்டேன் ! சண்டை யாரோட வரும்?”

“யாரோட இருந்தா உங்களுக்கு என்ன டாக்டர், நீங்க எதுக்கு எங்க வீட்டு பிரச்சனைகள் பத்தி அனாவசியமா கேக்கறீங்க?” கோபி டக்கென்று எழுந்து கொண்டான்.

“அதுவும் சரிதான்! எனக்கெதுக்கு உங்க வீட்டு பிரச்னை ? நீங்க உக்காருங்க !  போகட்டும், கோபி, உங்களுக்கு ஹைபர் டென்ஷன் இருக்கு. இது சைகோ சொமாடிக் பிரச்னை மாதிரி இருக்கு. மனம் சம்பந்த பட்ட உடல் வியாதி. இந்த மருந்து எழுதி தரேன். சாப்பிடுங்க. இரவிலே இந்த மன உளைச்சலை குறைக்க, தூங்க மாத்திரை தரேன். ஓகே வா ! தூங்கினாலே பாதி பிரஷர் குறையும். உப்பை குறையுங்க. ஓகே வா? அதை விட  ரொம்ப அவசியம், கோபம் வந்தால், அதை ரொம்ப குறைச்சுக்கோங்க..”

கோபி பதில் பேசாமல் திரும்பி விட்டான். 

   *****


வருடங்கள் ஓடின. கோபிக்கு இப்போது வயது 60.  

கோபிக்கு காசு பணத்தில் குறைவில்லை. நல்ல வசதி. கோபிக்கு இரண்டு மகள்கள். இருவருக்கும் கல்யாணம் ஆகி மூத்தவளுக்கு குழந்தைகளும் உண்டு.

ஆனால் அவன் குணம்? அது மாறவில்லை. அவன்  கோபம் குறையவில்லை. கோபிக்கு இப்போது ரத்தக் கொதிப்பு, தூக்கமின்மை, அல்சர், கூடவே போனசாக கொஞ்சம் இதய நோய். 

 ஒருநாள், ஒரு வாடிக்கையாளரிடம், கோபி வாய்க்கு வந்த படி பேச, அவர் இவனை ஏக வசனத்தில் ஏச, எல்லாம் சேர்ந்து, அவனுக்கு மயக்கம் வந்து, அப்படியே விழுந்து விட்டான். மூக்கில் ரத்தம் கசிந்தது. .பக்கவாதம் அவனைத் தாக்கியது.


‘தன்னைத்தான் காக்கின் சினம் காக்க: காவாக்கால் தன்னையே கொல்லும் சினம்’ – வள்ளுவர் கூற்று கிட்டதட்ட இவனை பொருத்தவரை உண்மையாயிற்று.
 
 

அவனது மனைவியும் இரண்டு மகள்களும் சேர்ந்து  அவனை ஒரு பெரிய தனியார் ஆஸ்பத்திரியில் சேர்த்தார்கள். 

 

பத்து நாள் கழித்து:

இன்னும் கோபிக்கு பேச்சு வரவில்லை. கை கால் அசைக்க முடியவில்லை. கொஞ்சம் அரை மயக்கம். ஆஸ்பத்திரி அறையில் கண்மூடி படுத்திருந்தான். 

அவனது பெண்கள் அவனை பார்க்க ஆஸ்பத்திரியில் வந்திருந்தார்கள். அவனது . படுக்கைக்கு அருகில் நின்று அவனை கூப்பிட்டார்கள்.  

“அப்பா! அப்பா! உடம்பு இப்போ எப்படிப்பா இருக்கு?- பெரிய பெண் ஊர்வசி.

“அப்பா! நாந்தான் மாலா வந்திருக்கேன். தேவலையா இப்போ?”- இரண்டாம் பெண் மாலா

கோபியின் முகத்தில் எந்த மாற்றமுமில்லை. அவனது மூடிய கண்கள் மூடியே இருந்தன. 

“பாவம்பா நீ! உடம்பு இப்படி இளைச்சு போச்சே!” ஊர்வசி

“என்ன பண்ணுவார்டீ! இவருக்கு இப்போ டியுப் வழியாத்தான் எல்லாமே”- மாலா. அவள் இதழ் ஓரம் ஒரு நக்கல் புன்னகை. 

சிறிது நேரம் கழித்து, அப்பாவை விட்டு, சகோதரிகள் இருவரும் வேறு கதை பேச ஆரம்பித்தனர். அசைய முடியவில்லையே தவிர, கோபிக்கு இதெல்லாம் காதில் விழுந்து கொண்டிருந்தது.

மகள்கள் பேச்சு அப்பாவை பற்றி திரும்பியது. இதுவரை அவர்கள் அப்பா எதிரில் பேசியதே இல்லை. அவ்வளவு பயம். கோபி இவர்கள் சிரித்து பேசினாலே சத்தம் போடுவார்.  

இப்போது, அப்பா மயக்கமாக இருக்கும் தைரியத்தில், மகள்கள் இருவரும்  பேச ஆரம்பித்தனர்.

“ஏய், மாலா, பாரு அப்பாவை. முன்னெல்லாம் எப்படி நம்மை பாடாய் படுத்தினார்?. இப்போ பாரு கைகாலெல்லாம் இழுத்துகிட்டு கிழிந்த நாராய் இருக்கிறார் ! ” – ஊர்வசி

“கிழத்துக்கு இதுவும் வேணும். இன்னமும் வேணும்டி” – மாலா

“ஆமாண்டி ! இவரை பார்த்தால் எனக்கு பாவமே வரலை. பத்திக்கினுதான் வருது”- ஊர்வசிக்கு கோபம் இன்னும் கூடியது.

“ஆமாமா, அதுவும் நம்ம அம்மாவை என்ன பாடு படுத்தியிருக்கிறார் இவர். இப்போ நல்லா படட்டும்.”- ஒத்து ஊதினாள் சின்னவள்.

“நம்ம அம்மா அழாத நாளே இல்லே தெரியுமா?”

“அது மட்டும் இல்ல ஊர்வசி ! இந்த அப்பாக்கு கோபத்திலே என்ன பன்றார்ன்னே தெரியாது. சின்ன வயசிலே என்னை கூட கண்ணு மண்ணு தெரியாம அடிப்பார். பாவி மனுஷன், தள்ளி விட்டுடுவார். வசவு தாங்கவே முடியாது.”

“ஆமாமா ! என்னக் கூட சின்ன விஷயத்துக்கெல்லாம், முடிய  பிடிச்சு உலுக்குவார். சே! இவரெல்லாம் ஒரு அப்பான்னு சொல்லிக்கவே வெக்கமாயிருக்கு”- ஊர்வசி

மகள்களின் அடக்கி வைத்திருந்த கோபம் பேச பேச  வெடித்தது.

அப்போது அவர்களது அம்மா உள்ளே வந்தாள். கொஞ்சம் தூரத்திலிருந்தே கோபியை பார்த்தாள். கோபியின் படுக்கை கிட்டேயே  வரவில்லை. 

“ஏம்மா ! அப்பா கண் விழிச்சாரா? பேசினாரா? ஸ்மரணை வந்துதா?”- அம்மா

“இல்லேம்மா. அப்படியே தான் அசையாம இருக்கார்”- மாலா

“இருக்கட்டும் கொஞ்ச நாள் ஆஸ்பத்திரியிலே. என்னை என்ன பாடு படுத்தியிருக்கிறார்? கிடக்கட்டும் இங்கேயே.  நர்ஸ் பாத்துப்பாங்க. நாம வீட்டுக்கு போகலாம் வாங்க!”

கேட்டுக்கொண்டிருந்த கோபிக்கு மிகுந்த வருத்தம். அவனால் தாங்க முடியவில்லை. கண்ணில் நீர் வழிய ஆரம்பித்தது. 

‘இந்த குடும்பத்திற்கா நேரம் காலம் பாக்காமல் உழைத்தோம்?  இவ்வளவு சொத்து சேர்த்தோம்? எல்லாம் இவங்களுக்கு தானே! என்னை இப்படி உதறிவிட்டு போறாங்களே! நம்ம கோபத்தினாலே, எல்லாரையும் இழந்துட்டோமே!. எனக்கு இப்போ யாருமே இல்லியே.”

காசு பணம் மட்டுமே வாழ்க்கை இல்லை.  அன்பு வேண்டும். அரவணைப்பு , ஆதரவு வேண்டும். உறவுகள் வேண்டும் என்பது  இப்போது கோபிக்கு புரிந்தது. இனிமேலாவது நம்மை மாற்றிக் கொள்ள வேண்டும் என முடிவெடுத்தான்(ர்).

*****

ஒரு மாதம் கழித்து.

தனது வீட்டில் கோபி. உடல் தேறிவிட்டது. அவரால் இப்போது மெதுவாக நடமாட முடிந்தது.

டாக்டர் சொல்லி விட்டார், “ கோபி, இங்கே பாருங்க , நீங்க சண்டகோழியா இருந்தா, உங்க உயிருக்குதான் ஆபத்து. நீங்க கோபமே பட கூடாது. இன்னொரு முறை, ஸ்ட்ரோக் வந்தால் ரொம்ப கடுமையாயிருக்கும். பாத்துக்கோங்க!” 

கோபி கோபத்தை இப்போது மிகவும் குறைத்து கொண்டார். மனைவியிடம் மிக அன்பாக இருந்தார். மகள்களிடம் மிக கனிவோடு பழகினார். 

கொஞ்சம் கொஞ்சமாக எல்லோரும் அவருடன் நேசமாக ஆரம்பித்தனர். சுற்றம் கூடியது. பெரிய மகள் ஊர்வசியின் குழந்தைகளுடன் அவர் ஒரே விளையாட்டு தான்.

நரகமாக இருந்த வாழ்க்கை சொர்கமானது. நரகமும் சொர்கமும் நமக்குள் தானே !

வாழ்க்கை என்பது என்ன என்பதை கோபி இப்போது தெரிந்து கொண்டார்.  சந்தோஷத்திற்கு முக்கிய தேவை வெற்றியல்ல. வாழ்க்கையின் வெற்றிக்கு முக்கிய தேவை சந்தோஷம்.

அவர் இப்போது தான் என்ன என்ன இழந்தோ மென்று நன்கு புரிந்து கொண்டார். ஆனால் கொஞ்சம் தாமதமாக. அன்பும் ,அரவணைப்பும் இதுவரை இழந்தது இழந்தது தானே!  

நேசமும் பாசமும் இல்லாமல் இதுவரை வெட்டியாய் வாழ்ந்தது வாழ்ந்தது  தானே ! காலம் என்ன மீண்டும் வரவா போகிறது?

 ***

ஒரு வருடம் கழித்து.

 ஊர்வசியின் மகன், கோபி தாத்தாவின் மடியில். பேத்தி கொஞ்சம் பெரியவள், தாத்தா பக்கத்தில். அவரது மகள்கள், மனைவி அவருக்கு அருகில். 

“ஏன் தாத்தா, இப்போவெல்லாம் நீ கோபமே படரதில்லியாமே ! அம்மா சொன்னாங்க” – தாத்தாவின் கையை பிடித்துக் கொண்டே பேத்தி கேட்டாள்

கோபி சிரித்துக் கொண்டே சொன்னார். “கோபம்ங்கிறது ஒரு   திராவகம் மாதிரி செல்லம்! . அதை  வைத்திருக்கும் பாத்திரத்தையே அது அரிச்சிடும் . அதனாலே தான் நான் கோபப்படரதை குறைச்சிக்கிட்டேன். . அதுவுமில்லாமல்,  மத்தவங்களை நாம திட்டினால், நம்பளை  அவங்க விரும்ப மாட்டாங்க. அதான் !”  

“கோபம் ஏன் வரது தாத்தா?”

“எதிலும், யாரிடத்திலும் ஒரு முழுமையை எதிர் பார்ப்பவங்களுக்கு, பொதுவாவே கொஞ்சம் கோபம் வரும். இத்தோட பிடிவாத குணம், அப்புறம் அகம்பாவம், அதான் ஈகோ, இருந்தா கேக்கவே வேணாம் !” . 

“ஆனா தாத்தா, எனக்கு கோபம் வருமே!”

“அதனாலே என்ன? கோபப்படு. தப்பே இல்லை! அடக்காதே. ஆனால், நிதானமா கோபப்படு. நியாயமா யோசிச்சு , கோபப்படு. கோபம் ரொம்ப இயற்கையானது செல்லம். நமக்கு ஆபத்து வருமொன்னு நினைக்கரப்போ, ஒன்னு ஓடிப்போயிட தோணும். அது பயந்த சுபாவம்.  இல்லே எதிர்த்து சண்டை போட தோணும். கோபம் எதிர்த்து நிக்கிற சுபாவம்.”

ஊர்வசி கேட்டாள். “ஏம்பா, அப்போ எப்படி இந்த கோபத்தை குறைக்கிரதாம்?”

“இதை போய் அப்பாகிட்டே கேக்கிறியே? இது கொஞ்சம் ஓவரா தெரியலே?” மாலா நக்கலடித்தாள்.

கோபி சொன்னார்.

“இல்லேம்மா! இந்த கேள்விக்கு நான் தான் பதில் சொல்லணும்.ஏன்னா, நாந்தான் கோபத்தாலே அடி பட்டவன். குடும்பம், பாசம் எல்லாம் இது நாள் வரையில் தொலைத்தவன்”

“அவ கிடக்கறா ! நீங்க சொல்லுங்கப்பா! கோபத்தை எப்படி குறைக்கிறது?” தூண்டினாள் ஊர்வசி.

“முதல்லே, கோபம் வரப்போ, நீளமா மூச்சு இழுத்து விடணும். வயித்திலேருந்து மூச்சு இழுக்கணும்.”

‘சரி.”

“மத்தவங்க சொல்றதிலும் நியாயம் இருக்க கூடும்னு நினைக்கணும். அது முக்கியம். நாம புத்திசாலின்னு நினைக்கிறது சரி. ஆனால், நாம மட்டும் தான் புத்திசாலின்னு நினைக்கிறது தப்பில்லையா? ”

சிரித்தாள் ஊர்வசி  “அதுவும் சரிதான் ”

கோபி தொடர்ந்தார். “கொஞ்சம் டைம் எடுத்துகிட்டு , மனசு கொஞ்சம் அதிர்வு  அடங்கினவுடனே, நம்ம கோபத்தை வெளிப் படுத்தலாம். ஆனால், கண்டபடி வார்த்தையை விட கூடாது. யோசனை பண்ணி பேசணும்”

அப்போது மாலா குறுக்கிட்டாள். “எங்க வீட்டுக்காரர்  கூட சொல்வார் அப்பா! கோபம் வரும் போது, எதுவும் பேசாமல் ஒன்னிலிருந்து பத்து வரை எண்ணினால், கோபம் குறைந்திடுமாம்.”

ஊர்வசிக்கு சந்தேகம்  “அப்படியும் கோபம் குறயலைன்னா?”

மாலா சொன்னாள் “ இதை  நானும் அவரை கேட்டேனே! அப்போ ஒன்னிலிருந்து நூறு வரை எண்ணனுமாம்”

எல்லோரும் சிரித்தனர்.

கோபியும்  சிரித்துக் கொண்டே தொடர்ந்தார். “சரியான காரணத்துக்காக, சரியான அளவிலே, சரியான நேரத்திலே,சரியான ஆளிடம் சரியான வழியிலே, கோபத்தை காட்ட கத்துக்கணும். அது கொஞ்சம் கஷ்டம் தான். பழகனும்.. கொஞ்சம் தமாஷா பேசினால், இறுக்கத்தை குறைக்கலாம்.”

ஊர்வசி சொன்னாள் “நீங்க சொல்றது சரிதாம்பா! எனக்கு எப்பவாவது அவரோட பிரச்னை வந்தா, ஒன்னு நான் எழுந்து போயிடுவேன். இல்லே அவர் ஏதாவது ஒரு கடி ஜோக் சொல்லி, என்ன சிரிக்க வச்சுடுவார்.  சிரிப்பு வராட்டியும் நானே சிரிச்சிடுவேன்.”

“அடி சக்கை”- மாலா

கோபி தொடர்ந்தார் “ அதேதாம்மா! அப்புறம், எதையும் எளிதா எடுத்துக்கற மன பக்குவத்தை வளர்த்துக்கணும். கொஞ்சம் விட்டு கொடுக்கிற மனப்பான்மை வேணும். ஈகோ, கூடிய வரைக்கும் குறைச்சிக்கனும், உப்பு மாதிரி. முக்கியமா ‘டேக் இட் ஈசி பாலிசி’ வேணும். இது இருந்தாலே கோபம் தன்னாலே குறைந்து விடும். இப்படி நிறைய இருக்கு”

உடனே குழந்தைகள் அம்மாவை பார்த்து “ ஊர்வசி ! ஊர்வசி! டேக் இட் ஈசி பாலிசி என்று பாடின. 
****                                                               

– S.முரளிதரன்

Likes(4)Dislikes(0)
Share
Jun 142015
 

4

ஈரணுவாய் அவதரித்த திங்களிலிருந்து

ஈரைந்து மாதங்கள் நீர் இருக்கையில் சுமந்து

தொப்புள் கொடி வாயிலாய் ஊனை உணவாக்கி

வருடலையும் குரலையும் வளர்ப்பினில் உணர்வாக்கி

தன்னுயிரின் மற்றொரு உருவமாய் உருவாக்கி

தரணிக்கு அறிமுகப்படுத்திய தாயே, தாய்மையே…

காவியங்களும் புராணங்களும் உன் பெருமையை

எக்காலத்திலும் கவிபாட மறந்ததில்லை…

 

தாயுடன் பகிர்ந்த காதலை மட்டுமே ஆதாரப்படுத்தி

அக்காதலுக்குமுன் இந்த பாசமே மிஞ்சுமளவுக்கு

பாசத்துடன் கரம் பிடித்து நடைபழக்கி

வைக்கும் ஒவ்வொர் அடியிலும் அச்சத்துடன் பெருமைக்கண்டு

பெருமிதத்துடன் கரம் பிடித்து எழுதுகோலையும் பழக்கி

சிந்தனை செயல்பாட்டை சிற்பியாய் செதுக்கி

சிற்றெறும்பை போல் எதிர்காலத்திற்காக சிறுகச் சிறுக சேமித்து

அன்றும் உனக்கு கிடைக்கும் மிகச்சிறந்த பட்டம் – “தாயுமானவனே”!!!!

 

சுமந்து பெற்றவளா!

பெற்று சுமந்தவனா!

 

-Dr. K. நந்தினி

(லண்டனிலிருந்து)

Likes(13)Dislikes(0)
Share
Jun 142015
 

5

Indian Civil Service பரீட்சை பற்றி திரு.பூமிநாதன் அவர்கள் கூறியுள்ள விவரங்களை இந்த மாத காணலாம்.

உங்களுக்கு ஏதேனும் போட்டி தேர்வுகள் குறித்து கேள்விகள் இருந்தால்bepositive1000@gmail.com என்ற முகவரிக்கு ஈமெயில் அனுப்பவும் அல்லது KING MAKERS IAS ACADEMY ஐ தொடர்பு கொள்ளவும்)

 

———————————————————————————————————————————————-

UNION PUBLIC SERVICE COMMISSIONUPSC is India’s Central agency authorized to conduct Civil Services Examination (CSE), Engineering  Service Examination, Combined Defence Service (CDS) Examination, National Defence Academy (NDA) Examination, Combined Medical Services Examination, Indian Economical Service/ Indian Statistical Service Examination, Geologist’s Examination and Central Armed Police Force (Assistant Commandant) Examination.

 

Civil Services Examination (CSE)

  • Civil Service, The backbone of the Indian Government machinery constitutes all the departments which run the State administration. A highly competitive and challenging area, it involves a variety of Jobs in different departments, Compared to private sector jobs this profession has job security. The prestige and power that comes along with these top-notch jobs in a definite reason for anybody to join this profession. The salary, allowances and facilities like healthcare, housing, conveyance etc. also make it a lucrative profession.
  • Entry into the IAS, IPS and the Central Service, Group A and Group B is through the All India Combined Competitive Examination for the Civil Services conducted by the Union Public Service Commission (UPSC) in different centers spread all over the country. Anyone thinking of taking up Civil Service, should have an idea how difficult it is to get in as lakhs of candidates apply for the around 1000 vacancies that may arise. So once you decide to appear in Civil Service exam, one should be prepared to slog endlessly.

Post under Civil Service: Services / posts to which recruitment is to be made through the examination are:

  1. Indian Administrative Service (IAS)
  2. Indian Foreign Service (IFS).
  3. Indian Police Service (IPS).
  4. Indian P & T Accounts & Finance Service, Group ‘A’.
  5. Indian Audit and Accounts Service, Group ‘A’.
  6. Indian Revenue Service (Customs and Central Excise), Group ‘A’.
  7. Indian Defence Accounts Service, Group ‘A’.
  8. Indian Revenue Service (I.T). Group ‘A’.
  9. Indian Ordnance Factories Service, Group ‘A’ (Assistant Works Manager, Administration).
  10. Indian Postal service, Group ‘A’.
  11. Indian Civil Accounts Service, Group ‘A’
  12. Indian Railway Traffic Service, Group ‘A’.
  13. Indian Railway Accounts Service, Group ‘A’
  14. Indian Railway Personnel Service, Group ‘A’.
  15. Post of Assistant Security Commissioner in Railway Protection Force, Group ‘A’.
  16. Indian Defence Estates Service, Group ‘A’.
  17. Indian Information Service (Junior Grade), Group ‘A’.
  18. Indian Trade Service, Group ‘A’ (Gr. III).
  19. Indian Corporate Law Service, Group ‘A’,
  20. Armed Forces Headquarters Civil Service, Group ‘B’ (Section Officer’s Grade).
  21. Delhi, Andaman & Nicobar Islands, Lakshadweep, Daman & Diu and Dadra & Nagar Haveli Civil Service, Group ‘B’.
  22. Delhi, Andaman & Nicobar Islands, Lakshadweep, Daman & Diu and Dadra & Nagar Haveli Police Service, Group ‘B’.
  23. Pondicherry Civil Service, Group ‘B’.

Plan of Examination: Civil Services Examination is conducted in two stages.

  1. Civil Services (Preliminary) Examination.
  2. Civil Services (Main) Examination.

Educational Qualification: Degree of a recognized university or equivalent.

Age limit:  21 to 30 years of age, relaxation of 3 years to OBC and 5 years to SC/ST category candidates.

Attempts: For General Category – 6 attempts

For OBC Category – 7 attempts

For SC/ST Category – No Limit

How to Apply: Candidates are required to apply Online by using the website                                                                      http:www.upsconline.nic.in

 

Civil Service (Preliminary) Examination:

  • This examination is meant to serve as a screening test only; the marks obtained in the Preliminary Examination by the candidates who are declared qualified for admission to the Main Examination will not be counted for determining their final order of merit. The number of candidates to be admitted to the Main Examination will be about twelve to thirteen times the total approximate number of vacancies to be filled in the year in the various services and post. Only those candidates who are declared by the commission to have qualified in the Preliminary Examination in the year are eligible for writing the Main Examination of that year.
  • The Preliminary Examination consists of two papers of objective type (Multiple-choice questions) carrying a maximum of 400 marks. The Question Papers (Test Booklets) are set in English & Hindi.

General Studies – Paper I (200 Marks)

General Studies – Paper II (200 Marks) – Popularly referred as Civil Service Aptitude Test (CSAT).

Note: There is negative marking in the preliminary Examination and for every wrong answer 1/3rd mark would be deducted from your score.

 

Syllabus of Civil Services (Preliminary) Examination

General Studies – Paper I – Duration 2 Hours

  • Current events of National and international importance.
  • History of India National Movement
  • Indian and world Geography – Physical, Social, Economic Geography of India and the World
  • Indian Polity and Governance – Constitution, Political System, Panchayati Raj, Public Policy, Rights Issues, etc.,
  • Economic and Social Development – Sustainable Development, Poverty, Inclusion, Demographics, Social Sector initiatives, etc.,
  • General Issues on Environmental ecology, Bio-diversity and Climate Change that do not require subject specialization.
  • General Science

General Studies – Paper II – Duration 2 Hours

  • Interpersonal skills including communication skills;
  • Logical reasoning and analytical ability.
  • Decision making and problem solving.
  • General mental ability.
  • Basic numeracy (Numbers and their relations, orders of magnitude, etc.,) (Class X level), Data interpretation (Charts, Graphs, Tables, Data Sufficiency etc., – Class X level).
  • English language comprehension skills (Class X level).
  • Questions relating to English language comprehension skills of class X level (Last item in the Syllabus of paper –II) will be tested through passages from English language only without providing Hindi translation thereof in the question paper.
  • The questions will be of multiple choices, objective type.

Note: It is mandatory for the candidate to appear in both the papers of civil services (Prelim) Examination for the purpose of evaluation. Therefore a candidate will be disqualified in case he/she does not appear in both the papers of Civil services (Prelim) Examination.

Civil Services (Main) Examination:

  • Main Examination consists of two stages (i) Written examination and (ii) Personality test (Interview) based on the cumulative mark in two stages candidates are recruited on the merit system.
  • The Civil Services Main Examination is designed to test the academic talent of the aspirant, also his/her ability to present his/her knowledge in a clear and coherent manner. The main Examination is intended to assess the overall intellectual traits and depth of understanding of candidates rather than merely the range of their information and memory.
  • With the revised syllabus from 2013 onwards candidates required to write 7+ 2 papers in the main examination, all of them are descriptive type.

 

Qualifying Papers

Paper A (300 Marks)

One of the Indian languages to be selected by the candidate from the languages included in the eighth schedule of constitution.

Paper B English (300 Marks)

Note: The two qualifying paper marks are not included in the merit.

Papers to be counted for merit

Paper-I Essay 250 Marks

Paper- II General studies – I (Indian Heritage and Culture, History and Geography of the world and Society) – 250 Marks.

Paper –III General Studies –II (Governance, Constitution, Polity, Social Justice and international relations) – 250 Marks

 Paper –IV General studies –III (Technology, Economic Development, Biodiversity, Environment, Security and Disaster Management) – 250 Marks

Paper- V General Studies –IV (Ethics, Integrity and Aptitude) – 250 Marks.

Paper –VI Optional Subject – Paper 1      – 250 Marks

Paper –VII Optional Subject – Paper 2      -250 Marks

Sub Total (Written test) 1750 Marks.

Personality Test 275 Marks

Grand Total 2075 Marks

List of optional Subjects Provided by UPSC

———————————————————————————————————————————————-

      Agriculture                Animal Husbandry and Veterinary Science
      Anthropology                Botany
      Chemistry                Civil Engineering
      Commerce & Accountancy                Economics
      Electrical Engineering                Geography
      Geology                History
      Law                Management
      Mathematics                Mechanical Engineering
      Medical Science                Philosophy
      Physics                Political Science and International Relations
      Psychology                Public Administration
      Statistics                Zoology

 

List of literature Subjects include Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Odiya, Punjabi, Sanskrit, Santhali, Sindi, Tamil, Telugu, Urdu and English.

Personality Test:

  • The candidates will be interviewed by a board of competent and unbiased observers who will have before them a record of their career. The object of the interview is to assess the personal suitability of the candidate for the service. The candidate will be expected to have taken an intelligent interest not only in is/her subjects of academic study but also in events which are happening around him/her both within and outside his/her own state or country, as well as in modern currents of thoughts and in new discoveries which should rouse the curiosity of well–educated youth.
  • The technique of the interview is not that of a strict cross examination, but of a natural, though directed and purposive conversation, intended to reveal mental qualities of the candidate. The board will pay special attention to assessing the intellectual curiosity, critical powers of observation and assimilation, balance of judgement and alertness of mind, intiative, tact, capacity for leadership; the ability for social cohesion, mental and physical energy and power of practical application; integrity of character; and other qualities such as topographical sense, love for out-door life and the desire to explore unknown and out of way places.

 

Tentative Date of ExaminationCivil Services Preliminary ExaminationNotification – May / JuneCSP Examination – August

Civil Services Main Examination

Mains Application after the Declaration of Preliminary Examination Result (October)

Mains (Written) Examination- December (Tentative)

Merit List – Final Result – June

***************************************************

 

Likes(1)Dislikes(0)
Share
Jun 142015
 

6

ஓரு ஊரில் பலூன் வியாபாரி வாழ்ந்து வந்தான். அவனிடம் பல வண்ணங்களில் பலூன்கள் கிடைக்கும். வியாபாரம் சரியாக நடக்காத தருணங்களில், ஹீலியம் வாயு நிரப்ப பட்ட ஒரு பலூனை காற்றிலே பறக்க விடுவான். அப்போது அதைப் பார்த்து  சிறுவர்கள் பலரும் தங்களுக்கு ஒரு பலூன் வேண்டும் என்று கேட்டு வாங்கி செல்வார்கள். ஒவ்வொரு முறையும் வியாபாரம் மந்தமாகும் பொழுதும் இந்த யுக்தியை பயன்படுத்து வியாபாரத்தை பெருக்குவது அவன் வாடிக்கை.

ஒரு முறை காற்றில் ஹீலியம் பலூனை பறக்க விடும் பொழுது, யாரோ அவன் சட்டையை பிடித்து இழுப்பது தெரிந்தது. திரும்பி பார்த்தால் ஒரு சிறுவன் அவனையும் அவனது பலூன்களையும் பார்த்துக்கொண்டிருந்தான். “பலூன் வேணுமா தம்பி” என்று அவன் கேட்டதற்கு அச்சிறுவன், “எனக்கு பலூன் வேணாம், ஒரு பதில் வேணும்” என்று கூறினான்.

“நீங்க அப்பப்போ ஒரு பலூன காத்துல பறக்க விடுறீங்க, அது கருப்பு பலூனாக இருந்தாலும் பறக்குமா?”

“பறக்கும் பா”

“சிகப்பு பலூனாக இருந்தாலும் பறக்குமா?”

“பறக்கும் பா”

“உருண்டையான பலூனாக இருந்தாலும் பறக்குமா?”

சிறுவனின் சாதாரன பேச்சில் அவனுக்கு தெரியாமலேயே அவன் கேட்கும் கருத்தின் ஆழத்தை புரிந்த வியாபாரி, அச்சிறுவனின் தோள் மீது கைவைத்து,

“பலூன் சிகப்போ, கருப்போ, நீளமோ வட்டமோ, அதன் தோற்றம் அது பறக்கும் உயரத்தை தீர்மானிப்பதில்லை. உள்ளே அடைக்கப் பட்டிருக்கும் வாயுதான் முடிவு செய்கிறது. மேலே பறப்பதற்கு அந்த பலூன் ஓட்டை இல்லாமல் இருந்தால் போதும்” என்று கூறி அவனுக்கு ஒரு பலூனை  கையில் கொடுத்தார்.

வியாபாரி சொன்னது போல நாம் வாழ்வில் உயர்ந்த நிலையை அடைவதற்கு, வெளித்தோற்றங்கள் எந்த விதத்திலும் காரணம் ஆகாது. நம் உடலை விட்டு நம்பிக்கையும் உயிரும் பிறியாதவரை நாம் உயர்வதற்கு உள்ளே ஒளிந்திருக்கும் திறமையை பயன்படுத்தி வாழ்வில் ஒரு நல்ல நிலையை அடைய முடியும்.

– ரக்‌ஷன்

Likes(9)Dislikes(0)
Share
Share
Share