admin

Apr 142017
 

red-love-romantic-flowers

எத்திசையும் அமைதி நிலவ

பங்குனித் தாய் பெற்றெடுத்த

சித்திரைப் பாவையே

சிறப்பான சிந்தனைகளை

சுமந்துகொண்டு வருக

முத்தான வரங்கள் தருக !

 

எல்லாரும் கொண்டாடும்

எங்கள் சித்திரைப் பாவையே

எம்மதம் சம்மதம் – உலகில்

மனிதநேய மிக்க

மக்கள் சமுதாயம்

மலர வரம் தருக !

 

தன் மக்கள் நலம்

மனதில் கொள்ளாமல்

நாட்டு மக்கள் நலமே

மனதில் கொள்ளும்

அரசியல் தலைவர்கள்

உருவாக வரம் தருக !

 

பொன் நகை வேண்டாம்

புன்ன(ந)கையே போதும்

பாரதி பாடிய

புதுமைப் பெண்கள்

பெருக வரம் தருக !

 

புத்தன் ஏசு காந்தி

காட்டிய அன்பு வழியில்

சத்தியமாக நடக்கும்

நல்ல இதயங்கள்

நாட்டில் மலர வரம் தருக !

 

ஐவகை பழங்கள்

வண்ண மலர்களுடன்

வரங்கள் தரும்

சித்திரைப் பாவையை

நாம் அனைவரும்

வணங்கி வரவேற்போம் !

 

பூ. சுப்ரமணியன்,

பள்ளிக்கரணை, சென்னை

Likes(1)Dislikes(0)
Share
Apr 072017
 

 

imayam23

நேற்று ஒரு நண்பருடன் தொலைபேசியில் பேசிக்கொண்டிருந்த போது, அவர் சொன்ன விஷயம் கேட்டு சந்தோஷப்பட்டாலும், மனதின் ஓரத்தில் வலித்தது.

அவருடைய நிறுவனம் நடத்தப்போகும் ஒரு விழாவில், தமிழை மட்டுமே படித்து பட்டம் பெற்ற 100 மாணவர்களுக்கு வேலை வாய்ப்புகளை உருவாக்கித்தரப்போகிறோம் என்றார். நிறைவாக இருந்தது.

தமிழ் படித்து பட்டம் பெற்றவர்களை சமூகம்,  உற்றார், உறவினர் கேட்பது..

‘வேற எந்த course ம் கிடைக்கவில்லையா?’

‘வாத்தியார் வேலை தான் கிடைக்கும்’.

விரும்பிப்படிக்க தேர்ந்தெடுக்க நினைத்தாலும் லேலை வாய்ப்பை நினைத்து, படிக்காமல் விட்டவர் பலர்.

தமிழாசிரியர்கள்   சிறு வயதில் நட்ட சிறு விதையும்  ஏற்படுத்திய தாக்கமும் தான் இன்று வள்ளுவனையும் கம்பனையும், மற்றும் பலரையும் சங்க இலக்கியத்தையும் தமிழ்நாட்டின் வரலாறு பற்றியும் ஏதோ லேசாக உரைத்துப்பார்க்கும் ஆவலை நம்முள் பலருக்கு தூண்டிவிட்டிருக்கிறது.

பள்ளியில் படிக்கும் போது, வேப்பமரத்தடியில் நடந்த தமிழ் வகுப்புகளில் மனம் லயித்து, மீண்டும் நிகழ் காலத்திற்கு வர சிறிது நேரம் ஆயிற்று!

அது ஒரு கனாக்காலம்!

– அகிலா, சென்னை

Likes(0)Dislikes(0)
Share
Mar 212017
 

 

CIT கல்லூரி நிறுவனர் திரு.P.ஸ்ரீராமுடன் பேட்டி..

Part -1: https://www.youtube.com/watch?v=NGi_puCVHiA

 

Part -2https://www.youtube.com/watch?v=nbFkxjOnkTw

 

Part -3: https://www.youtube.com/watch?v=EL3w015ioKY

 

 

 

Likes(0)Dislikes(0)
Share
Mar 152017
 

1

சென்ற வாரம் விடுமுறை வேண்டி பள்ளி மாணவன் ஒருவன் தன் ஆசிரியருக்கு எழுதிய விடுப்பு விண்ணப்பம் இணையத்தில் வைரலாகப் பரவியது. தேனி மாவட்டம், வருஷ நாடு அருகில் இருக்கும் பூசணியூத்து எனும் கிராமத்தில் உள்ள அரசு உயர்நிலைப்பள்ளியில் ஏழாம் வகுப்பு  படிக்கிறான் ஈஸ்வரன்.

ஈஸ்வரன் தனக்கு ஒருநாள் விடுப்பு கேட்டு எழுதிய கடிதத்தை தன் நண்பனிடம் கொடுத்து அனுப்பியிருந்தான். மாணவர்கள் எழுதும் வழக்கமான விடுப்பு விண்ணப்பம்தானே என்று நினைத்து அதைப் படித்த ஆசிரியருக்குப் பெரும் ஆச்சர்யத்தை அளித்தது அந்தக் கடிதம்.

தன் அம்மாவுக்கு உடல்நிலைச் சரியில்லாத காரணத்தால் தன் வீட்டில் இருக்கும் கால்நடைகளைக் கவனித்துக்கொள்ள வேண்டும் என்பதற்காக விடுமுறை கேட்டு விடுப்பு விண்ணப்பம் அனுப்பியிருக்கிறான் ஈஸ்வரன்.  தனது விடுமுறைக்கான உண்மையான காரணத்தையே ஈஸ்வரன் எழுதியிருந்ததைக் கண்டு திகைத்தார் அவனது ஆசிரியர் வெங்கட்.

“இந்தக் கடிதத்தைப் படித்ததும் ஒரு சில நிமிடங்கள் ஆச்சர்யத்தில் உறைந்துவிட்டேன். இப்படி ஒரு காரணம் எழுதிய லீவ் லட்டரை நான் முதன்முதலாக இப்போதுதான் பார்க்கிறேன். அடுத்த நாள் பள்ளிக்கு வந்த ஈஸ்வரனிடம் வழக்கமாக இந்தக் காரணத்தை எழுதமாட்டார்களே… நீ எப்படி எழுதினாய், என்றேன். அதற்கு மிக இயல்பாக, ‘சார், நீங்கதானே உண்மை எதுவாக இருந்தாலும் அதைப் பேசுங்க என்பீர்கள்’ என்றான். எனக்கு பதில் பேசுவதற்கு வார்த்தை கிடைக்கவில்லை. கண்களில் என்னையறியாமல் நீர் வழிந்தது. அதை மாணவர்கள் முன் காட்டிக்கொள்ளாமல், ஈஸ்வரனின் கடிதத்தைப் பற்றி சிலாகித்துக் கூறினேன். எப்போதோ நாம் சொல்லும் வார்த்தை மாணவர்களின் மனதில் எவ்வளவு ஆழமாகப் பதிகிறது என்பதை அனுபவப்பூர்வமாக உணர்ந்துகொண்டேன். இன்னும் பல மடங்கு பொறுப்பு உணர்வுடன் செயல்பட வேண்டும் என்பதைப் புரிந்துகொள்ளவும் முடிந்தது” என்கிறார் ஆசிரியர் வெங்கட்.

இதேபோல் சென்னையில் இருக்கும் என் நண்பர் நவீன் அவர்களுக்கு  சமீபத்தில் ஒரு அனுபவம் நடந்தது.

பணி நிமித்தமாக அமேரிக்கா, சிங்கப்பூர் என பல வருடங்களாக வெளிநாடுகளில் குடும்பத்துடன் வசித்து வந்தவர் நவீன். சில மாதங்களுக்கு முன் வெளிநாட்டு வாழ்க்கை போதும், நமது நாட்டிற்கே திரும்பி விடலாம் என இந்தியா வந்து செட்டில் ஆகிவிட்டார்.

ஒரு வாரஇறுதி நாட்களில் (weekend trip) சுற்றுலா செல்லலாம் என முடிவு செய்திருந்தனர் அவர் குடும்பத்தினர். வெள்ளிக்கிழமை மதியமே கிளம்பி விடலாம் எனவும், பள்ளி சென்றுள்ள மகனை வெள்ளிக்கிழமை மதியம் விடுமுறை எடுக்கச் சொல்லலாம் எனவும் திட்டம் தீட்டியிருந்தனர்.

திட்டமிட்டபடியே, தனது மகன் படிக்கும் பள்ளிக்கு வெள்ளிக்கிழமை மதியம் சென்று விடுமுறை விண்ணப்பம் தந்திருக்கிறார் நண்பர். அந்த விண்ணப்பத்தில் “குடும்பத்துடன் சுற்றுலா செல்கிறோம், அதனால் அரை நாள் விடுமுறை வேண்டும்” என மகனிடம் எழுதிக் கொடுத்துள்ளார்.

பள்ளி நிர்வாகமோ அந்த கடிதத்தைக் கண்டு, “இந்த காரணத்திற்காக எல்லாம் விடுமுறை தர இயலாது. அதனால் விடுமுறை விண்ணப்பம் அதுபோல் கொடுக்காதீர்கள், மகனுக்கு உடல் நிலை சரியில்லை என்று காரணத்தை பொய்யாக எழுதிக் கொடுங்கள், நாங்கள் உடனே அனுப்பி வைக்கிறோம். இதெல்லாம் நம்மூரில் சகஜம் தான்” என தெரிவித்துள்ளது..

பல வருடங்கள் வெளிநாட்டில் இருந்து விட்டதாலோ என்னவோ,  விதிகளை சரியாக கடைப்பிடிக்க நினைக்கும் அவர், நிர்வாகத்திடம் விவாதத்தில் இறங்கினார்.

“பொய் சொல்லியெல்லாம் கடிதம் எழுத மாட்டேன், உண்மையான காரணத்தைக் கூறி தான் விண்ணப்பம் தருவேன். உங்களால் சுற்றுலா போகும் காரணத்திற்காக விடுப்பு தர இயலாது என்றால் அதை தெரிவியுங்கள், அதற்காக பொய் சொல்லுமாறு கூறாதீர்கள், அப்படி ஒரு விடுமுறை என் மகனுக்கு வேண்டாம்” என மறுத்துள்ளார் நண்பர்.

அதற்கான காரணத்தையும் தெரிவித்தார். “சின்ன விஷயம் தானே,  இதற்காக பொய் சொன்னால் என்ன, என ஆரம்பித்து தான் எல்லா விஷயங்களிலும் பொய் சொல்ல குழந்தைகளுக்கு கற்றுக் கொடுத்து விடுகிறோம். அதுவே அவர்கள் வாழ்க்கை முறையாக மாறி, பொய் சொல்வது தவறே அல்ல என்பது போல் ஆகிவிடுகிறது” என்ற தனது நியாத்தை வெளிப்படுத்தினார்.

கேட்பதற்கு சற்று வித்தியாசமாக பட்டாலும் அவர் கூறுவதில் உண்மை இல்லாமல் இல்லை. பள்ளி நிர்வாகம், பெற்றோர்கள், மாணவர்கள் என ஒட்டுமொத்த சமுதாயமாக பொய் பேசுவதை நாம் அனைவரும் சேர்ந்து வளர்த்து வருவது புரிந்தது. தவறை எங்கிருந்து தடுத்து நிறுத்த வேண்டும் எனவும் புரிந்தது.

இனி விடுமுறை வேண்டுமெனில் “As I am suffering from Fever” என வழக்கமாக  எழுதிக் கொடுக்கப் போகிறோமா அல்லது உண்மையான காரணத்தை எழுதி தரப் போகிறோமா என்பதை யோசிக்க வேண்டும்.

“எந்தப் பிரச்சினை வந்தாலும் பரவாயில்லை, உண்மையை மட்டும் பேசிப் பழகு” எனக் கூறி பிள்ளைகளை இன்று வளர்க்கத் தவறினால், நாளை அவர்கள், நம்மிடமே பொய் சொல்லும் சூழ்நிலை வரக்கூடும். அந்த  நிலைக்கு மூலக்காரணம் நம்மைத் தவிர வேறு யாராக இருக்க முடியும்?

சின்னஞ்சிறு குழந்தைகளின் மனதில் இன்று விதைக்கும் விதைகளைத் தான், சில வருடங்களில் நாம் அறுவடை செய்ய உள்ளோம் என்பதை நினைவில் நிறுத்திக் கொள்ள வேண்டும்.

“பொய் கூறுவது, விதிகளை மீறுவது, லஞ்சத்தை நியாயப்படுத்துவது, நம்மூரில் இதெல்லாம் சகஜம் தான் என எடுத்துக்கொள்வது, adjustment என்ற பெயரில் பல அநியாயங்களை பொறுத்துக்கொள்வது” என இந்தப் பட்டியல் சிறியளவில் ஆரம்பித்து, பின்நாளில் பூதாகரமாக வளர்ந்து நிற்கிறது.

குழந்தைகள் நம் சொல்லை கேட்டு மட்டும் வளர்வதில்லை, நம் செயல்களைப் பார்த்தும் தான் வளர்கிறார்கள். “நீங்கள் மட்டும் அன்று அந்த செயலை செய்தீர்களே, அதனால் தான் நான் இன்று அதே செயலை செய்கிறேன்” என எத்தனை குழந்தைகள் பெற்றோரிடம் கூறுவதை நாம் கேட்கிறோம்.

நம் எண்ணங்களின், செயல்களின் பிம்பம் தான் குழந்தைகளின் எதிர்காலம் என்ற அடிப்படை புரிதல் நம்முள் வர வேண்டும்.

சோற்றுடன் உண்மையையும், நன்நெறிகளையும், நல் செயல்களையும்  அடுத்த தலைமுறைக்கு ஊட்டி வளர்ப்பது நம் கையில் தான் உள்ளது.

மீண்டும் சிந்திப்போம்,

விமல் தியாகராஜன் & B+ TEAM

(எங்களது முகநூல் பக்கத்தை லைக் செய்து, தொடர்ந்து பகிர்வுகளை பெற்றுக்கொள்ளுங்கள் https://www.facebook.com/bpositivenews)

Likes(3)Dislikes(0)
Share
Feb 242017
 

steve-jobs

24/02/1955 அன்று பிறந்த ஸ்டீவ் ஜாப்ஸ், ஆப்பிள் நிறுவனத்தை துவக்கி  உலகப்புகழ் பெற்றார். ஐந்து ஆண்டுகளுக்கு முன் இறந்தபோதிலும், பல கோடி மனிதர்களின் இதயங்களில் இன்றும் கூட தனது தயாரிப்புகளின் மூலம் வாழ்ந்துக்கொண்டிருகிறார் ஸ்டீவ்.

இவரைப் பற்றி பல புத்தகங்கள், நாளிதழ்கள், திரைப்படங்கள் எண்ணற்ற தகவல்களை ஏற்கனவே பல தொகுப்புகளாக வழங்கிவிட்டதால், இந்தப் பதிவில் இவரின் உலகப் புகழ்பெற்ற சில பொன்னான வரிகளை மட்டும் வழங்குகிறோம். சிந்தனையையும் எழுச்சியையும் தூண்டும் இந்த இனிய வரிகள் இவரின் தயாரிப்புகளை விட பிரசித்தியுடன் இன்றும் உலவிக் கொண்டிருக்கின்றன.

  • “கடந்த 33 வருடங்களாக, தினமும் காலை கண்ணாடியைப் பார்த்து, ‘ஒருவேளை இன்று தான் உனது வாழ்வின் கடைசி நாள் என இருந்தால், இப்போது திட்டமிட்டுள்ள இந்த வேலையை தான் செய்வாயா?’ என என்னை நானே கேட்டுக்கொள்வேன். அந்தக் கேள்விக்கு பதில் ‘இல்லை’ என பல நாட்களுக்கு தொடர்ச்சியாக வந்தால், செய்யும் செயலில் ஏதோ ஒரு மாற்றம் தேவை என உணர்ந்துக்கொள்வேன்”.
  • “உலகிலேயே பணக்கார மனிதன் இந்தக் கல்லறையில் தான் உறங்குகிறான் என்று என்னைப்பற்றி அனைவரும் கூறுவது எனக்கு முக்கியமே அல்ல, ஆனால் இரவு படுக்கச்செல்கையில் இன்று ஒரு சிறந்த வேலையை செய்தோம் என கூறிக்கொள்வது தான் எனக்கு முக்கியமாக உள்ளது”.
  • “இந்தப் பூமியில் உங்களது நாட்கள் மிகக்குறைவு. அதனால் அந்த நாட்களை, அடுத்தவர்களின் வாழ்க்கையை வாழ்ந்து வீணடித்துவிடாதீர்கள்”.
  • “உங்களது இதயம் சொல்லும் வழியில் நடக்கத் தேவையான தைரியத்தை வளர்த்துக்கொள்ளுங்கள். நீங்கள் எதுவாக ஆக வேண்டும் என்ற உண்மையை அதுதான் உங்களுக்கு உணர்த்தும்”.
  • “பிடித்த வேலையை செய்வதற்கு, ஏதாவது சிலவற்றை இழக்க நேரிடுமோ என்ற பயம் வந்தால், ‘கண்டிப்பாக ஒருநாள் இறக்கப்போகிறோம், அதை விட பெரிய இழப்பு என்ன இருக்கப்போகிறது?’ என்ற எண்ணம் வரும். அந்த எண்ணமே பிடித்த வேலையை செய்வதற்குத் தேவையான ரிஸ்கை எடுக்கத் தூண்டும்”.
  • “உங்களது வாழ்வின் பெரும் பகுதியை உங்கள் வேலையே தீர்மானிக்கிறது. சிறந்த வேலை என நம்புவதை செய்து முடிக்கையில் மட்டும் தான் உண்மையான திருப்தி கிடைக்கிறது. சிறந்த வேலையைச் செய்யும் ஒரே வழி, விரும்புவதை செய்வது மட்டும் தான். உங்களுக்கு பிடித்த வேலையை இதுவரை கண்டுபிடிக்கவில்லை எனில் விட்டுவிடாதீர்கள், தொடர்ந்து முயற்சி செய்யுங்கள்”.
  • “சில நேரங்களில் வாழ்க்கை உங்கள் தலையில் செங்கல்லைக் கொண்டு பலமாக தாக்குகிறது. நம்பிக்கையை அத்தருணங்களில் இழக்காதீர்கள்”.
  • “நம் அனைவரிடமும் உள்ள மிகவும் விலையுயர்ந்த வளம் என்பது நேரம் மட்டுமே தவிர பணம் அல்ல”.
  • “எங்கள் நிறுவனத்தின் இலக்கு சிறந்தவற்றை உருவாக்குவதே தவிர பெரியவற்றை உருவாக்குவது அல்ல”.
  • “25 வயதிலேயே 100 மில்லியன் டாலர்கள் அளவிற்கு மதிப்பை பெற்றேன். ஆனாலும் சம்பாதிக்கும் பணம் ஒருவரின் அறிவாற்றலை முடிவு செய்யும் என்பதை ஒப்புக்கொள்ள மாட்டேன்”.
  • “தங்களால் இவ்வுலகத்தை மாற்ற முடியுமென கண்மூடித்தனமாக யார் நம்புகிறார்களோ, அவர்களால் தான் இவ்வுலகத்தை மாற்ற முடிகிறது”.
  • “ஆப்பிள் நிறுவனத்திலிருந்து என்னை நீக்கியது தான் எனக்கு நேர்ந்த மிகச்சிறந்த அனுபவமாக இருக்குமென நினைக்கிறேன். சாதனையாளன் என்ற மன அழுத்தத்தை, ஒன்றுமே இல்லாதவன் என்ற எளிமை விளக்கியது. எனது வாழ்வின் அருமையான படைப்புகளை வெளியிடத் தேவையான மனநிலை அத்தருணங்களில் தான் உருவானது”.

விமல் தியாகராஜன்

(எங்களது முகநூல் பக்கத்தை லைக் செய்து, தொடர்ந்து பகிர்வுகளை பெற்றுக்கொள்ளுங்கள் https://www.facebook.com/bpositivenews)

Likes(3)Dislikes(0)
Share
Feb 162017
 

hard-work-hires

மனிதன் காற்றை சுவாசிப்பதால் வாழ்வதில்லை, நம்பிக்கையை சுவாசிப்பதால் மட்டும் வாழ்கிறான்.

யானையின் பலம் தும்பிக்கையில் என்றால், மனிதனின் பலம் நம்பிக்கையில்..

இது போன்ற சில பாசிடிவ் வரிகளை கேள்வி பட்டிருப்போம். ஆனால் உண்மையிலேயே தன்னம்பிக்கையை வளர்த்துக் கொள்ள முடியுமா என்ற கேள்வி நம்மில் பலருக்கு வருவதுண்டு. “முடியும்” என அடித்துச் சொல்கின்றனர் வல்லுனர்கள். இப்பதிவின் மூலம் தன்னம்பிக்கையை வளர்த்துக் கொள்ள சில வழிகளைப் பார்ப்போம்.

இல்லாததைப் பற்றி சிந்திக்காமல் இருப்பதைப் பற்றி சிந்தியுங்கள்

“நல்ல படிப்பு இருந்திருந்தால், நல்ல வழிகாட்டி இருந்திருந்தால், பலவற்றை அடைந்திருப்பேன்” என தம்மிடம் இல்லாதவற்றை பட்டியலாக்கி கவலைப்படும் சிலரை சந்தித்திருப்போம். இல்லாதவற்றை கூறியே, இருக்கும் வாழ்வைத் தொலைத்து விடுவது தவறு. வெற்றியாளர்கள் எப்போதும் தங்களிடம் இருக்கும் திறமையை மட்டும் திறன்பட பயன்படுத்தி, சாதிக்கின்றனர். பலவீனத்திற்கான பரிகாரம், பலத்தைக் குறித்து சிந்திப்பது மட்டுமே என்பதை உணருங்கள்.

இழந்ததைப் பற்றி இல்லாமல் வர இருப்பதை நினைத்துச் சிந்தியுங்கள்

ஒரு கதவு மூடப்படும்போது, மற்றொரு கதவு திறக்கிறது ஆனால் மூடப்பட்ட கதவையே பார்த்துவிட்டு, திறந்த கதவை பொதுவாக காணத் தவறிவிடுகிறோம். கடந்தக்கால இழப்புகளை எண்ணிக்கொண்டே காலத்தை வீணடிக்காது, வர இருக்கும் அழகிய வசந்தகாலத்தை நம்பிக்கையுடன் எதிர்கொள்ளுங்கள்.

ஒப்பிடுதலை தவிருங்கள்

இயற்கை ஒவ்வொரு மனிதருக்குள்ளும் ஒரு திறமையை ஒளித்து வைத்துள்ளது, ஒன்றைப் போல் மற்றொன்று எப்போதுமே இருக்காது என்ற அடிப்படை தெளிவு இருந்தால் ஒப்பிடுதல் என்ற எண்ணமே வராது. தன்னம்பிக்கை தானாய் வளரும்.

எதிர்மறை சிந்தனைகளை உடைத்தெரியுங்கள்

நம் அனைவருக்குள்ளும் ஒரு விமர்சகர் ஒளிந்துக்கொண்டிருப்பார். அவர் நமது பழைய தோல்விகளை மட்டும் நினைவுப்படுத்தி, நம்மால் செய்ய முடியாது என்பதை மட்டும் கூறிக்கொண்டே இருப்பார். அவரது பேச்சைக் கேட்காமல் இருப்பது தான் வெற்றியைத் தீர்மானிக்கிறது. எடிசன் அவர்கள் மட்டும் தனது ஆயிரக்கணக்கான தோல்விகளை நினைத்துப் பார்த்திருந்தால், உலகிற்கே ஒளியை கொடுத்திருக்க முடியாதல்லவா?

உங்கள் முந்தைய சாதனைகளை அடிக்கடி நினைத்துக் கொள்ளுங்கள்

இதுவரை நீங்கள் வெற்றிகரமாக கடந்து வந்த தூரத்தை அடிக்கடி நினைத்துப் பாருங்கள், இனி கடக்க வேண்டிய தூரம் பெரிதாக தெரியாது. “எவ்வளவோ பாத்துட்டோம், இது முடியாதா?” என நம்புகையில் அடுத்து அடைய வேண்டிய இலக்கு எளிதாகும்.

சிறு சிறு இலக்குகளை நிர்ணயித்து வெற்றிப் பெறுங்கள்

பெரிய இலக்குகள் வாழ்க்கைக்கு அர்த்தமும், பாதையும் அமைக்கும் என்பதில் மாற்றுக்கருத்து இல்லை, ஆனால் அந்த நெடுந்தூரப் பயணத்திற்கு உந்துசக்தியாக இருப்பது சின்னஞ்சிறு வெற்றிகளே. அதனால் அடிக்கடி சிறு இலக்குகளையும் நிர்ணயித்து, அவற்றை முழுமையாக செய்து முடியுங்கள். அவை தரும் நம்பிக்கை  உங்களுள் பெரிய மாற்றத்தைக் கொண்டுவரும்.

தோல்விகளே வெற்றியின் அடையாளங்கள் என்பதை உணருங்கள்

போட்டிகளின் முடிவு Win or Loose என்பது அல்ல, Win or Learn என்பதே! தோல்விகள் தான் வெற்றியை அடையும் படிகற்கள். எனவே, தோற்றுவிட்டால் என்ன செய்வது என்ற எண்ணத்தை உதறித் தள்ளுங்கள், தோல்வியும் வெற்றியின் ஒரு அங்கம் தான் என்பதை புரிந்துக்கொள்ளுங்கள். தோல்வி தவறேயல்ல, தோல்வியிலிருந்து பாடம் கற்காமல் இருப்பது தான் தவறு என்பதை உணர வேண்டும்.

பயத்தை துரத்துங்கள்

தோல்வியை விட தோற்றுவிடுவோமோ என்ற பயத்தில் தான் பலர், பல முயற்சிகளை தொடங்காமலேயே இருந்துவிடுகின்றனர். பயம் என்பது உண்மையல்ல அது ஒரு உணர்வு மட்டுமே என்பதை நினைவுக்கூருங்கள். “Fear is not real, it’s just a feeling” என்பார்கள். எனவே பயத்தை துரத்துங்கள், வெற்றி உங்களுக்குத்தான். “அச்சமில்லை அச்சமில்லை” போன்ற பல பாரதியின் பாடல்கள், பயத்தை நீக்கி நம்பிக்கையை வளர்க்கக் கூடிய உற்சாக டானிக்குகள். அவற்றை அவ்வபோது பயன்படுத்துங்கள்.

புதிய விஷயங்களை, திறமைகளை கற்றுக்கொண்டே இருங்கள்

நமக்கு எப்போது எல்லாம் தெரியும் என்ற எண்ணம் வருகிறதோ, அப்போதே ஒரு அழகிய நதி போல் ஓடாது, ஒரு குட்டையைப் போல் தேங்க ஆரம்பிக்கிறோம். புதிது புதிதாக ஏதாவது கற்றுக்கொண்டே இருக்கையில், நமது நம்பிக்கை பல மடங்காகப் பெருகி விடுகிறது.

ரிஸ்க் எடுங்கள்

புதிய முயற்சிகளைத் எடுக்கத் தயங்காதீர்கள். வெற்றிப்பெற்றால் கொண்டாடலாம், தோற்றுவிட்டால் வழிகாட்டியாய் மாறலாம். பல நேரங்களில் ரிஸ்க் எடுக்காமல் யோசித்துக்கொண்டே இருப்பதே பெரிய ரிஸ்க்காக எதிர்காலத்தில் மாறிவிடும்.

நல்ல துணைகளைத் தேர்ந்தெடுங்கள்

நல்ல புத்தகங்கள், நண்பர்கள், நம்பிக்கை தரும் மனிதர்களை தேர்ந்தெடுங்கள். உங்களது பெரும்பான்மையான நேரத்தை யாரோடு செல்விடுகிறீர்களோ, அவற்றைப் பொறுத்தே உங்கள் குணங்களும், எண்ணங்களும்  அமையும். உங்களை ஊக்குவித்து,  உங்களை நல்வழிப்படுத்தும் துணை மிக மிக முக்கியம். விமர்சனம், எதிர்மறை எண்ணங்கள் மட்டுமே தரும் மனிதர்களிடம் விலகியே இருப்பது நல்லது.

சவால்களை சாதனையாக்குங்கள்

“எல்லா பறவைகளும் மழையின் போது ஒரு உறைவிடத்தை தேடி ஒளிகின்றன. ஆனால் பருந்து மட்டும் தான், மழை மேகத்துக்கு மேலே பறந்து மழையை தோற்கடிக்கிறது” என்ற ஒரு கூற்று உள்ளது. சவால்கள் இல்லாது, எந்தப் பாதையும் இருக்காது என்ற புரிதல் வேண்டும். அவ்வாறு இருந்தால் அந்தப் பயணம் சுவாரசியமாகவும் இருக்காது.

தன்னம்பிக்கையை வளர்த்து, வாழ்க்கை சவால்களை எதிர்கொள்ளுங்கள், சாதனை படையுங்கள். உங்களை நம்பி வீறுக்கொண்டு எழுந்து வாருங்கள், உலகம் உங்கள் வசப்படும்.

விமல் தியாகராஜன்

(எங்களது முகநூல் பக்கத்தை லைக் செய்து, தொடர்ந்து பகிர்வுகளை பெற்றுக்கொள்ளுங்கள் https://www.facebook.com/bpositivenews)

Likes(4)Dislikes(0)
Share
Feb 152017
 

1

சில வாரங்களுக்கு முன் நடந்த சம்பவம்.

நண்பர் திரு.லக்ஷ்மி நரசிம்மன் அவர்கள் சென்னை TVS நிறுவனத்தில் பல வருடங்களாக வேலை செய்து வருபவர். பத்து பைசா சமூகத்திற்காக கொடுத்து விட்டாலே, கட்-அவுட் வைக்கும் அளவு விளம்பரம் செய்துக்கொள்ளும் சில வேடிக்கை மனிதர்கள் வாழும் இன்றைய சூழ்நிலையில், பல நல்ல காரியங்களை சத்தமில்லாமல் செய்து வரும் எண்ணற்ற மனிதர்களுள் இவரும் ஒருவர்.

பொறியியல் படிக்கும் இவரது மகன் சாஹில் பிறந்த நாளை, இவர் கொண்டாடிய விதம் என்னை வியப்பில் ஆழ்த்தி, யோசிக்கவும் வைத்தது. “பொருளாசை மிகுந்து விட்டது, மனித நேயம் தேய்ந்துவிட்டது”  என்றெல்லாம் பலர் கவலைகளை தெரிவிக்கும் இந்த காலகட்டத்தில், இன்றும் நல்ல மனிதர்கள் வாழ்ந்துக்கொண்டு தான் இருக்கின்றனர் என்பதற்கு இது போன்ற சம்பவங்கள் அத்தாட்சியாய் உள்ளது எனலாம்.

இந்த சம்பவத்தை பற்றி நம் இதழில் குறிப்பிடுவதற்கு ஒரு காரணம் இருக்கிறது. இந்தப் பதிவின் மூலம், இது போன்ற தொண்டு செயல்களை படிக்கும் எவரேனும், “நாமும் இது போல் செய்தால் என்ன?” என்று யோசித்தால், உதவிக்காக ஏங்கும் பல ஆதரவற்ற மனிதர்களுக்கு கூடுதல் ஆதரவு கரம் கிடைக்கும் என்ற எண்ணமே.

அந்த பிறந்த நாள் நிகழ்விற்கு வருகிறேன். சென்ற டிசம்பர் மாதம் இருபத்தைந்தாம் நாள் காலையில் எதேச்சையாக இவரைத் தொடர்புக்கொண்டு பேசிக்கொண்டிருந்தேன். ஒரு சிறப்பான “வாழ்நாள் அனுபவத்தை” அன்று பெறப்போகிறோம் என்று அவரை அழைத்தபோது எனக்குத் தெரியவில்லை.

பேசி முடித்து தொடர்பை துண்டிக்க செல்கையில், “என் மகனுக்கு இன்று பிறந்த நாள் கொண்டாடுகிறோம்; முகப்பேரில் உள்ள பான்யன் (BANYAN) என்ற தொண்டு நிறுவனத்தில் மதியம் சுமார் ஒரு மணிக்கு கொண்டாட உள்ளோம், உங்களுக்கு நேரம் இருந்தால் கலந்துக்கொள்ளுங்கள்” என அழைத்தார்.

அன்று ஞாயிற்றுக்கிழமை என்பதால் எனக்கும் வெளி வேலை ஏதும் இல்லாதிருந்தது. கண்டிப்பாக வருகிறேன் என ஒப்புக்கொண்டு, மதியம் அங்கு சென்றடைந்தேன்.

பான்யன் அமைப்பின் இடத்திற்குள் நுழைவிலேயே பல ஆச்சரியங்கள் காத்திருந்தன. சுமார் 150 ஆதரவற்ற மனநிலை சரியில்லாத பெண்களை தங்கவைத்து, வாழ்வும், சிகிச்சையும் அளித்துக் கொண்டிருக்கிறது இந்த நிறுவனம்.

உள்ளே நுழைந்துவுடன் என்னை வரவேற்றார் நண்பர். அவரது துணைவியாரும், மகனும் வந்திருந்தனர். அங்குள்ள அனைவரின் அன்றைய மதிய உணவிற்குத் தேவையான செலவை (சுமார் மூன்றாயிரம் ரூபாய்) ஏற்று இருந்தார். அதற்கு முன் கூட்டியே பதிவும் செய்துள்ளார்.

தனது மகனின் பிறந்த நாளை ஒவ்வொரு வருடமும் தவறாது இது போல் தொண்டு நிறுவனங்களுக்குச் சென்று, உணவு செலவிற்கான தொகையை கொடுத்து அவர்களுடன் கொண்டாடுவதாகவும் தெரிவித்தார்.

2

அது மட்டுமன்றி நெகிழ்ச்சியான மற்றொரு சம்பவமும் அன்று நடந்தது. அவர்கள் மூவரும் உணவை அனைவருக்கும் பரிமாறவும் செய்தனர். அன்று கிறிஸ்துமஸ் தினம் என்பதால், ஸ்பெஷலாக சிக்கன் கொழம்பும் ஏற்பாடு செய்திருந்தது அந்நிறுவனம். நண்பரின் குடும்பம் சைவம் என்பதால் அதை மட்டும் நான் பரிமாற, எங்கள் அனைவருக்கும் மற்றட்ட மகிழ்ச்சி!

அங்குள்ள நோயாளிகள் ஒவ்வொருவரின் பின்னாலும் ஒவ்வொரும் சோக வரலாறு நிறைந்து இருக்கிறது. “எவரேனும் தங்களுடன் பேச, பழக மாட்டார்களா?” என்ற எண்ணம் அவர்களுள் தெரிந்தது. சிகிச்சை பெரும் சிலர் எங்களிடம் பேசியும் சென்றார்கள். சிகிச்சை பலனாக குணமடைந்து சிலர் வீடு திரும்பவதாகவும் நிறுவனத்தில் தெரிந்துக்கொண்டோம்.

3

கிளம்பும்போது நண்பர், “எத்தனையோ செலவுகள் அன்றாடம் செய்கிறோம், வருடத்திற்கு ஒரு முறை இந்த செலவு செய்வது எனக்கு ஒரு சுமையாகத் தெரிவதில்லை. மேலும் பணம் மட்டும் தருவதோடு இல்லாமல், நாங்கள் மூவரும் கண்டிப்பாக வந்து, எங்கள் கைகளாலேயே பரிமாறி விட்டுத்தான் செல்வோம். என் மகனுக்கு இது போல் கஷ்டப்படும் மனிதர்களின் நிலைமையையும் காண்பிக்க முடிகிறது” என அந்த செயலில் உள்ள பல நல்ல விஷயங்களை அடுக்கி, ஆச்சரியமூட்டினார்.

யோசித்துப் பார்க்கையில், இந்நாள் நகர நாகரிகமான பிறந்த நாள் கொண்டாட்டங்களுக்கும், கேளிக்கைகளுக்கும் செய்யும் செலவுகளை ஒப்பிடும்போது இது போன்ற நல்ல காரியங்களுக்குச் செய்கின்ற செலவு ஒரு செலவே இல்லை.

நண்பர்களே, நாமும் இது போல் ஒரு உதவியை செய்யலாமே? கஷ்டப்படும் சிலருக்கு, இதன் மூலம் நம்மால் பயனாக இருக்கக் கூடும் அல்லவா?

மேலும், கஷ்டங்கள் என்றால் என்னவென்றே தெரியாமல் இருக்கும் பல இன்றைய தலைமுறை குழந்தைகளுக்கு, இது போன்ற மனிதர்களும் சமூகத்தில் உள்ளனர் என்ற விவரம் தெரியவரும். உணவின் முக்கியத்தை தெரியவைக்கும் பக்குவத்தையும், சமூகம் மீதான அக்கறையும், இது போன்ற நிகழ்வுகள் வளர்க்கும் என்பதில் சந்தேகம் இல்லை.

மாற்றி யோசிப்போம்!

விமல் தியாகராஜன் & B+ TEAM

(எங்களது முகநூல் பக்கத்தை லைக் செய்து, தொடர்ந்து பகிர்வுகளை பெற்றுக்கொள்ளுங்கள் https://www.facebook.com/bpositivenews)

Likes(2)Dislikes(0)
Share
Feb 042017
 

zara

 

பெயர் அமன்சியோ ஆர்டிகா
பிறந்தது 1936 ஆம் ஆண்டு ஸ்பெயினில்
தந்தை ரயில்வே ஊழியர்
படிப்பு பள்ளி படிப்பு பதினான்காம் வயதுடன் பாதியில் நின்றது
முதல் பணி ஒரு சட்டைத் தையல் கடையில் தொழிலாளி
முதல் வியாபாரம் 37 வயதில் துணிகளை விற்க ஆரம்பித்தது
பலம் தான் யாரென்று உலகுக்கு தெரியாமலேயே அசுர வளர்ச்சிக் கண்டது
சரித்திரம் Zara என்ற மிகப்பெரிய பேஷன் நிறுவனத்தை துவக்கியது. (Zara இன்று 88 நாடுகளில் 2100 கடைகள் என விரிந்துள்ளது)
கடைபிடிப்பது எளிமையான வாழ்க்கை, எளிமையாக ஆடைகள் அணிவது
உள்ளுர் சாதனை ஸ்பெயின் மட்டுமல்லாது ஒட்டுமொத்த ஐரோப்பிய நாடுகளின் நெ.1 பணக்காரர் ஆனது
உலக சாதனை பில் கேட்ஸையே சில வாரங்களுக்கு பின் தள்ளி உலகின் நெ.1 பணக்காரர் ஆனது
வாழ்நாள் சாதனை யார் வேண்டுமானாலும் zeroவிலிருந்து zaraவரை உயரலாம் என உணர்த்தியது!!!

 

அமன்சியோவின் வெற்றி ரகசியம்:

லேட்டஸ்ட் பேஷன் ஆடைகளை சரியான விலையில், விரைவாக வாடிக்கையாளர்களுக்கு கொண்டுபோய் சேர்ப்பது

பி.கு.:

Zara இன்றும் (zero advertising) விளம்பரமே கிடையாது என்ற யுக்தியை கையாள்கிறது. புது துணிகளை வடிவமைத்து, சந்தைக்கு அனுப்ப 6 மாதம் மற்ற நிறுவனங்களுக்குத் தேவைப்படுகையில், Zara ஒரே வாரத்தில் தனது புது டிசைன்களை கடைகளுக்கு அனுப்பி விடுகிறது!

விமல் தியாகராஜன்

Likes(2)Dislikes(0)
Share
Jan 242017
 

 

wa

பெயர் வாட்ஸாப்
உருவாக்கியவர் ஜான் கூம் (உக்ரெய்ன் நாட்டில் பிறந்தவர், 19 பில்லியன் டாலர்களுக்கு முகநூலிடம் விற்றவர்)
மெயிண்டெயின் செய்பவர் மார்க் ஜக்கர்பர்க் (முகநூல்)
உபயோகம் செய்பவர் உலகம் முழுதும், குறிப்பாக இந்தியர்கள்
ப்ளஸ் ஒரு சில நொடிகளில் உலகத்தையே சுற்றி   வந்துவிடுவது
மைனஸ் ஒரு பதிவு உண்மையா, பொய்யா என விசாரிக்காமலே, பலரை ஷேர் செய்யவைப்பது
செய்வது எல்லோரும், குருப்பில் தங்கள் பதிவுகளை சமத்தாக அனுப்பிவிட்டு, அடுத்தவர்கள் பதிவுகளை ஜென்டிலாக படிக்காமல் விடுவது
ஸ்லிப் ஆவது நூற்றுக்கணக்கான மொக்கை மெசேஜ்கள் வருவதால், ஒன்றிரண்டு நல்ல மெசேஜ்களை  படிக்காமல் விட்டுவிடுவது
அட்டாக் பண்ணுவது கருத்துக்களை வக்கணையாக அடுக்கும் குருப்பில் உள்ள அப்பாடக்கர்கள்
அல்லோலப் படுவது அட்மின்கள்
சிக்கிக்கொள்வது “எப்போதும் அதையே பார்த்து, உங்களுக்குள்  சிரிக்கிறீர்களே” என வீட்டம்மா பூரிக்கட்டையை தேடுவது
உலக சாதனை 100 கோடிக்கும் அதிக முறை டவுன்லோட் செய்யப்பட்டது
உள்ளுர் சாதனை முகநூலுடன் இணைந்து, ஜல்லிக்கட்டு போராட்டத்தில், அனைத்து தமிழர்களையும் இணைக்கும் பாலமாய் இருந்து கலக்கியது
வாழவைத்த சாதனை பண்டிகைக்கு எஸ்.எம்.எஸ் (SMS) அனுப்பினால்  எக்ஸ்ட்ரா சார்ஜ் என்ற மிரட்டலில் இருந்து காப்பாற்றியது
வாழ்நாள் சாதனை உலகத்தை சுருக்கியது

– விமல் தியாகராஜன் &  முத்து சிவா

Likes(8)Dislikes(0)
Share
 Posted by at 8:27 am
Jan 142017
 

3yrs journey

இனிய பொங்கல் வாழ்த்துக்கள் நண்பர்களே!

பொங்கல் வந்தாலே நமது குழுவிற்கு இரட்டிப்பு மகிழ்ச்சி தான். ஒன்று இது தமிழர்களின் அடையாளம், இரண்டு இந்த நன்னாளில் தான், நமது B+ இணைய இதழை துவக்கினோம்.

ஆம், இன்று நான்காம் ஆண்டில் அடியெடுத்து வைக்கிறோம். நேர்மையாக கூற வேண்டுமெனில், இந்த இணைய இதழை ஆரம்பிக்கையில், இத்தனை தூரம், இத்தனை விதமான அனுபவம் தரும் பயணமாக இருக்கும் என கண்டிப்பாக எதிர்பார்க்கவில்லை.

இந்தப் பயணம் ஒரு தனி மனிதனின் வெற்றி அன்று. பலரின் ஏகோபித்த ஆதரவினாலும், அரவணைப்பினாலும் வந்துள்ளது. இதை ஏதோ தன்னடக்கத்தில் சொல்லுவதாக எல்லாம் நினைக்க வேண்டாம்.

ஒவ்வொரு முறையும் வாழ்க்கைத் தரும் அன்றாடச் சவால்களில், இந்த முயற்சியைக் கைவிட்டுவிடலாமா, வாசகர்களுக்கு உள்ள வேலைப்பளுவில் இதையெல்லாம் யார் படிக்கப் போகிறார்கள், சமுதாயத்திற்கு உண்மையாகவே இந்த இணைய இதழால் பயன் உள்ளதா என்ற கேள்விகள் பலமுறை எழுந்ததுண்டு.

அப்படி கைவிட்டுவிடலாம் என்ற எண்ணம் ஒவ்வொரு முறையும் பலமாக  எழுந்தபோது, ஏதேனும் ஒரு வாசகர், ஏதாவது ஊரிலிருந்து, நமது ஏதாவது ஒரு பதிவு அவருக்கு அளித்த பலனையும், நம்பிக்கையையும், தெரிவித்து தனது மகிழ்ச்சியை வெளிப்படுத்துவார். அந்த உரையாடல், அந்த நபர்களின் மகிழ்ச்சி, போன்றவை தரும் உந்துசக்தி, நம்மை மீண்டும் இயக்கி ஓட வைக்கும்.

பல முறை இது போன்ற நிகழ்வுகள் நடந்தபின் தான், “சரி, ஏதோ நம்மை மீறிய ஒரு சக்தி, நம்மை இந்தச் செயலை செய்ய இயக்கி வருகிறது” என்று தோன்றும்.

ஆனாலும் இது ஒரு சிறு இணையம் தானே, பல லட்சம் மனிதர்கள் தங்கள் எண்ணங்களை, எழுத்து ரூபத்தில் அரங்கேற்றிய இந்த உலகில், இதுவும் ஒரு சராசரி எழுத்துக்களம் தானே, இதனால் என்ன உறுதியான, அளக்கக்கூடிய (tangible & measurable) பயன், எவருக்கு இருக்கப் போகிறது என்ற எண்ணம் தொடர்ந்துக் கொண்டேயிருந்தது.

2015 ஆம் ஆண்டு வந்த பெருவெள்ளம், இந்த அனைத்துக் கேள்விகளுக்கும் பதிலாக அமைந்தது. ஒரு தனிமனிதனாக செய்திருக்க முடியாத, இரு பெரும் வெள்ள நிவாரணப்பணிகளை நமது இணையத்தின் வாசகர்களின் ஆதரவின் மூலமாக வெகு எளிதாகச் செய்ய முடிந்தது.

இப்போது இந்த மூன்றாண்டு பயணத்தை திரும்பி பார்க்கையில்..

30 சாதனையாளர்களை பேட்டி எடுத்தது, இரண்டு சாதனையாளர்களை காணொளி மூலமாக பேட்டி எடுத்தது, பல மாணவர்களுக்கு, (அவர்களது கல்லூரிகளுக்கேச் சென்று) இந்த சாதனயாளர்களைப் பற்றி எடுத்துரைத்து ஊக்குவித்தது, பல மாணவர்களுக்கு பயிற்சி (Internship) கொடுத்தது, பல எழுத்தாளர்களுக்கு தங்கள் திறமையை நிருபிக்க ஓரு களத்தைக் கொடுத்தது என பறந்து விரிந்துள்ளது நம் இணையம்.

அதிலும் குறிப்பாக அரசியல், மதசிந்தனை, கிரிக்கெட், சினிமா போன்றவற்றைத் தொடாமல், எல்லோராலும் எற்றுக்கொள்ளக் கூடிய நல்ல விஷயங்களை, ஊக்குவிக்கும் நேர்மறை பதிவுகளை மட்டுமே வைத்து பயணித்தது, ஒரு சிறப்பம்சமாகவே இருந்துள்ளது.

இதுவரை, உலகின் பல்வேறு தேசங்களிலிருக்கும் ஒரு லட்சம் தமிழ் வாசகர்கள், கிட்டத்தட்ட 7லட்சம் முறை நமது இணையத்தைக் கண்டுகளித்துள்ளனர்.

மேலும், தற்போது, “தமிழ் online, but not talking” என்ற குறும்படத்தை, சென்னை லயோலா கல்லூரி மாணவர்களின் உதவியோடு தயாரித்து இயக்கி வருகிறோம். இந்தக் குறும்படத்தின் மூலம் தமிழ் படிக்கும் மாணவர்களின் நிலையைக் கொண்டுபோய் தமிழ் ஆர்வலர்களிடம் சேர்த்து, அந்த மாணவர்களுக்கு ஏதேனும் வேலை வாய்ப்பு ஏற்படுத்தித் தர முயற்சித்து வறுகிறோம்.

(அந்த குறும்படத்தின் முதல் அறிமுகப் பகுதியை இந்த லிங்கில் காணலாம் https://www.youtube.com/watch?v=SlDXngNkw5U&t=1s)

தற்போதுள்ள மனநிலையில் நமது இணைய இதழின் மூலம், ஒவ்வொரு வருடமும், நன்றாக தமிழ் படிக்கும் 100 மாணவர்களுக்கு வேலை ஏற்படுத்தி தர வேண்டும் என்ற விருப்பத்தை, எண்ணத்தை இலக்காக நிர்ணயித்துள்ளோம்.

இதையெல்லாம் தெரிவிக்கையில், சாதித்துவிட்டோம் என்ற பெருமை, அதீத நம்பிக்கை (over-confidence) போன்ற தேவையற்ற உணர்வுகள் எல்லாம் எழவில்லை. மாறாக பொறுப்பும், கவணமும், அக்கறையும் அதிகரித்துள்ளதாக உணர்கிறோம்.  நாம் போக வேண்டிய தூரம் மிக மிக அதிகமாக உள்ளது, இதுவரை பயணித்தது ஒரு தொடக்கம் மட்டுமே, அதைதான் உங்களுடன் தாழ்மையுடன் தெரிவித்து பகிர்ந்துக்கொள்கிறோம்.

வரவிருக்கும் சவால்களையும், நெடுந்தூரப் பயணத்தையும் உங்களைப் போன்ற நல்ல இதயங்களின் ஒத்துழைப்போடும், உறுதுணையோடும் கடந்து, தமிழ் சமுதாயத்திற்கு பல சேவைகள் செய்ய, தமிழ்த்தாயை வணங்கி கேட்டுக்கொள்கிறோம்.

வானம் வசப்படும் என்ற நம்பிக்கையில்,

விமல் தியாகராஜன் & B+ Team

(எங்களது முகநூல் பக்கத்தை லைக் செய்து, தொடர்ந்து பகிர்வுகளை பெற்றுக்கொள்ளுங்கள் https://www.facebook.com/bpositivenews)

Likes(1)Dislikes(0)
Share
Jan 112017
 

love

எங்கள் குழுவில் சேது என்ற ஒரு இளைஞன் இருக்கிறான். மிகச் சுமாரான தோற்றம், கிராமப்புறத்திலிருந்து வருகின்ற வசதி குறைந்த இளைஞன் என்பதை அவனை பார்த்தவுடன் சொல்லிவிடலாம். ஆனாலும்…. சேதுவைச் சுற்றி எப்போதும் ஒரு பெரும் நண்பர்கள் கூட்டம் இருக்கும். உற்சாகம் அவனைச் சுற்றி இருப்பவர்களுக்கு கரைபுரண்டோடும். எத்தனை சீரியஸ் மனிதராக இருந்தாலும் அவனிடம் பேசினால், மனது இலதாகி, இளமையாகிச் செல்வர். சுருக்கமாக சொன்னால் அவனை பிடிக்காது என்று கூறுபவர்கள் யாரும் இருக்க மாட்டார்கள், எங்கள் கூட்டத்தில் அவன் தான் ஹைலைட்..!

சேது போல் நாம் பலரை சந்தித்திருப்போம், ஒவ்வொரு கூட்டத்திலும் அவனைப் போல் ஒருவர் கண்டிப்பாக இருக்கத்தான் செய்வார்கள். இத்தகைய மனிதர்களால், இதுபோல் எப்போதும் உற்சாகத்துடன் இருந்து, எல்லோரின் அன்பையும், மதிப்பையும் எப்படி பெற முடிகிறது?

நீங்களும் இதுபோல் எல்லோராலும் விரும்பப்பட நினைக்கிறீர்களா? அப்படியெனில் கண்டிப்பாக இந்தப் பதிவு உங்களுக்குத்தான். இதில் கூறப்பட்டுள்ள வழிகள் உங்களை யோசிக்க வைக்கும்.

  1. ஈகோ இல்லாமல் இருக்கும் குணம்

நாம் வளர்த்துக்கொள்ள வேண்டிய மிகக் முக்கியமான குணம் இதுதான். மனிதன் தனது ஈகோவை எப்போது உடைக்கிறானோ, அப்போதே சக மனிதர்களிடம் உள்ள பிரிவு பாலத்தை உடைக்கிறான் என்றாகிறது.

“இவர் எவ்வளவு கிண்டல் பண்ணினாலும் கோபப்படமாட்டார், விளையாட்டாக எடுத்துக்கொள்வார்” என்ற பெயரை எடுங்கள். இதற்கு ஈகோ இல்லாதிருத்தல் வேண்டும். இந்த குணம் உள்ளவரை பலரும் விரும்புவர் (ஒருவேளை, உங்கள் தன்மானம் பாதிக்கும் அளவு கிண்டல் இருந்தால், நிதானமாக கிண்டல் செய்பவரிடம், அவர் தனியாக இருக்கையில் தெரிவித்துவிடலாம்)

  1. எல்லா மனிதர்களிடம் நல்ல விஷயங்களை கண்டுபிடிப்பது

செல்வா என்ற எனது நண்பரிடம் ஒரு சிறந்த குணமுண்டு. அவரது நட்பில் உள்ள எந்த மனிதரைப் பார்த்தாலும், அந்த மனிதர்களிடம் உள்ள ஐந்து நல்ல விஷயங்களை கடகடவென  அடுக்கி விடுவார். அதில் முகஸ்துதி இருக்காது, உண்மை இருக்கும்.

நம்மை ஒருவர், இன்னொருவரிடம் அறிமுகப்படுத்துகையில் நம்மைப் பற்றி ஐந்து நல்ல விஷயங்களை எடுத்துச் சொன்னால், அந்த உணர்வு எப்படி இருக்கும்?! இந்தப் நல்ல பழக்கத்தை வளர்த்துக் கொள்ளுங்கள். நாம் அன்றாடம் பழகும் மனிதர்களிடம் குறைகளை காணாமல், அவரிடமுள்ள மூன்று நல்ல விஷயங்களையாவது தெரிந்து வைத்துக்கொள்ளுங்கள்.

  1. மன்னிப்பு கேட்கத் தயங்காதீர்கள்

எல்லோராலும் விரும்பப்படும் மனிதர்களின் அடுத்த நல்ல குணம் இது. நீங்கள் தப்பு செய்து விட்டீர்கள் என நீங்களே நினைத்தால், “நான் தப்பு செய்துவிட்டேன்”, “கொஞ்சம் அவசரப்பட்டு விட்டேன்”, “நான் அப்படி பேசி இருந்திருக்கக் கூடாது” போன்ற மன்னிப்பு வரிகளை கூறி, மன்னிப்பு கேட்கத் தயங்காதீர்கள். “தவறு செய்பவன் மனிதன், மன்னிப்பு கேட்பவன் மாமனிதன், மன்னிப்பவன் தெய்வம்”.

  1. நம்பகத்தன்மையை வளர்த்துக்கொள்ளுங்கள்

“இவரிடம் எத்தகைய ரகசியங்களையும் கூறலாம், யாரிடமும் சொல்ல மாட்டார்”. “இவர் ஒரு வேலையை செய்கிறேன் என ஒப்புக்கொண்டால், கண்டிப்பாக முடித்துவிடுவார்’ இது போன்ற குணங்களுக்குச் சொந்தக்காரர் ஆகிவிடுங்கள். உங்களின் மீது ஒருவரின் நம்பகத்தன்மை அதிகரிக்கையில், நன்மதிப்பும் பெருகும்.

  1. எந்த வித எதிர்பார்ப்பும் இல்லாது அன்பு செலுத்துங்கள்

“எவர் ஒருவரிடம் பெரிய இதயம் இருக்கிறதோ, அவரே மற்றவர்களின் இதயத்தையும் வெல்கிறார்”. எந்த வித எதிர்பார்ப்பும் இன்றி, ஏழை பணக்காரன் போன்ற பாகுபாடும் இன்றி, சமூகத்தில் உள்ள எல்லோரிடத்தும் அன்பாகவும், கருணையாகவும் நடந்துக்கொள்ளுங்கள்.

  1. சுயத்தை இழக்காதீர்கள்

பணம், பதவி, பட்டம் வேண்டுமென விரும்பி சிலர் தங்கள் குணநலன்களை அப்படியே மாற்றிக்கொள்வர்.

ஆனால் வேறு சிலரோ, “இவருக்கு நடிக்கத் தெரியாது, பொய் சொல்லத் தெரியாது, ஒரு விஷயம் தெரியவில்லை என்றால், ‘தெரியாது’ என வெளிப்படையாக சொல்லிவிடுவர்” என்றெல்லாம் பெயர் எடுத்திருப்பர்.

இந்த இரு வகைளில், மக்களுக்கு யாரைப் பிடிக்கும்? எந்த நிலையிலும் உங்கள் சுயத்தை இழக்காதிருந்தால், பல மனிதர்களின் மதிப்பை ஸ்கோர் செய்வீர்கள்தானே?

  1. நன்றி உணர்வுடன் இருங்கள்

சின்னதோ, பெரியதோ, யார் எந்த உதவி செய்திருந்தாலும் மறக்காதிருங்கள். அவர் இல்லாத இடத்தில் அவரைப் பற்றி பேசி நன்றி தெரிவியுங்கள். மிக முக்கியமாக, அவருக்கு ஒரு உதவி தேவைப்படுகையில், நீங்கள் அவரை மறக்கவில்லை என்பதை நிருபித்து அவருக்கு உதவுங்கள்.

  1. வெறுப்பை தொடர்ந்து வளர்த்துவராதீர்கள்

முதலில் யார் விட்டுக்கொடுப்பது என்ற போட்டியில் நீங்களே விட்டுக்கொடுங்கள். “விட்டுக்கொடுப்பது கோழைத்தனம் அல்ல, அது உயர்ந்த மனம்”. வெறுப்பை வளர விடாதீர்கள், எதுவும் கடந்து போகும் என நினைத்து, அடுத்த அடியை எடுத்து வையுங்கள்.

  1. உங்கள் பெருமையை பேசிக்கொண்டே இருக்காதீர்கள்

நம்பிக்கையாய் இருப்பது, மிகுந்த உற்சாகத்துடன் இருப்பது, பாசிடிவாக இருந்து அனைவரையும் ஊக்குவிப்பது போன்ற குணங்கள் பலரை உங்களுக்கு விசிறிகளாக மாற்றும். அதே நேரத்தில், சுயத்தம்பட்டம் அடிப்பது, நம் துதியை நாமே திரும்பத்திரும்ப பாடுவது போன்ற குணங்கள், மனிதர்களை நம்மை விட்டு தெறித்து ஓட வைத்துவிடும்.

  1. பேசுவதை பொறுமையாக கவனியுங்கள்

பொதுவாகவே நிறைய நண்பர்களை சம்பாதித்து வைத்திருப்பவர்கள், பொறுமையுடன் அடுத்தவர்கள் கூறுவதை கவனிப்பவர்களாக இருப்பர். “எனக்கு சில கஷ்டங்கள் இருக்கிறது, அவனிடம் சென்று ஷேர் செய்துக் கொள்ளப்போகிறேன், அவன் தான் பொறுமையாக நான் சொல்வதைக் கேட்பான்” என சிலர் கூறுவர். பல நேரங்களில் மக்கள், தங்கள் பிரச்சினைகளை வெளியில் கூறுவது, தீர்வு வேண்டியல்ல, சுமைகளை இறக்கி வைக்கத்தான்.

  1. சிரிக்கப் பழகுங்கள், சிரித்துப் பழகுங்கள்

போலித்தனமில்லாத உண்மையான சிரிப்பு உடையவர்கள், நிறைய மனிதர்களை கவர்வது இயற்கை. குழந்தைகளை அனைவருக்கும் பிடிக்க காரணம் அவர்களின் கள்ளம் கபடமில்லாத சிரிப்பு மட்டுமே. சிலர் எத்தனை ஜோக் கூறினாலும், “சிரிப்பேனா பார்?” என்பதைப் போல் உம்மணாமூஞ்சியாக உக்கார்ந்திருப்பர். நீங்கள் அதுபோல் இல்லாமல், உங்கள் கூட்டத்தில் யாராவது ஜோக் கூறினால், ரசித்து மனம் விட்டு சிரித்துப் பழகி, நட்பைத் தொடருங்கள்.

  1. யாரையும் காயப்படுத்தாமல் பேசுங்கள்

சிலர் “நா எதுவாக இருந்தாலும், வெட்டு ஒன்னு, துண்டு ரெண்டுன்னு, மூஞ்சியில் அடிப்பத போல் சொல்லிருவேன்” என்று பெருமையாக அடுத்தவர்களை காயப்படுத்தும் விதத்தில் கூறுவர். இருதய நோயாளிகளிடம் அதிர்ச்சி தரும் செய்திகளை பக்குவமாக கூறுவதைப் போல், எதை, எங்கு, எப்போது சொல்லவேண்டும் என்பது ஒரு கலை. அந்தக் கலையைக் கையாளத்  தெரிந்தவர்கள் ரசிக்கப்படுகிரார்கள்.

  1. இணைந்து முன்னேறுங்கள், போட்டி போடாதீர்கள்

ஆங்கிலத்தில் “Complement and Don’t Compete” என்பார்கள். இது குறிப்பாக தம்பதிகள் தங்களுக்குள் வளர்த்துக்கொள்ள வேண்டிய ஒரு தன்மை. ஆண்கள் புரிதலை அதிகமாகவும், பெண்கள் அன்பை அதிகமாகவும் தேடுவது இயற்கையின் நியதி. இந்த அடிப்படை வித்தியாசத்தை புரிந்து நடக்கையில், நீங்கள் விரும்பப்படுவது சாத்தியப்படுகிறது, உறவு பலப்படுகிறது.

  1. வெளிப்படையாக பேசி தீர்த்துவிடுங்கள்

மனது விட்டு வெளிப்படையாக பேசுபவர்களை அனைவருக்கும் இயற்கையாகவே பிடிக்கும். அதே சமயத்தில், பேச்சு தொனதொன என்று loose-talk ஆக இல்லாமல் இருத்தல் அவசியம், (இரண்டிற்கும் வித்தியாசம் உள்ளது). உங்களுக்கு ஒருவரிடம் பிரச்சினை இருக்கு என்றால், நேரடியாக அவரிடம் அதைப் பற்றி பேசுங்கள். அவர் இல்லாத இடத்தில், அவரைப் பற்றி பேசினால், அவரும் திருந்துவது கடினம், உங்கள் பெயரும் பப்ளிக்காக பாதிக்கப்படும்.

  1. சுயநலம் இல்லாமல் இருத்தல்

கடைசியாக ஆனால் மிக முக்கியமான பண்பு சுயநலமின்மை. உங்களுக்கு பிற்காலத்தில் தேவைப்படும் என்றெல்லாம் பார்க்காமல், சமூக அக்கறையுடன் பிறர்க்கு உதவி செய்யுங்கள். உதவியர்க்கு அந்த உதவிப் பற்றி, பெருந்தன்மையுடன் நீங்கள் சொல்லாமல் இருக்கிறீர்கள் என வைத்துக்கொள்வோம். ஒரு சமயத்தில் அவரே அதை வேறொருவர் மூலமாகத் தெரிந்துக்கொள்கையில், அவர் மனதில் என்றும் நீங்காத இடம் பிடித்திருப்பீர்கள்.

15 விஷயங்களும் முடிந்து விட்டது. ஒரு சிறு எச்சரிக்கை.. நம்மால் அனைவரையும் திருப்தி படுத்துவது என்பது மிகக் கடினம், ஆனால் அந்த முயற்சியில், எத்தனை தூரம் இறங்குகிறோம் என்பதில் தான் வெற்றி உள்ளது.

அதனால் இங்கு கூறப்பட்டுள்ள 15 விஷயங்களை ஆராய்ந்து, “சரி” என உங்களுக்குத் தோணும் விஷயங்களை செயல்படுத்தி பாருங்கள். பல மனிதர்களின் அன்பை பெறத் தொடங்குவீர்கள்..!

விமல் தியாகராஜன்

Likes(2)Dislikes(0)
Share
Jan 032017
 

news

வேண்டாம்… வேண்டாம்… வடகொரியாவுக்கு அமெரிக்கா எச்சரிக்கை

வாஷிங்டன்:
வேண்டாம்… வேண்டாம்… அப்புறம் அவ்வளவுதான் என்று வடகொரியாவை எச்சரித்துள்ளது அமெரிக்கா… எதற்காக தெரியுங்களா?

கண்டம் விட்டு கண்டம் பாயும் ஏவுகணை சோதனை நடத்தினால் கடும் விளைவுகளைச் சந்திப்பீர்கள் என்று வடகொரியாவுக்கு அமெரிக்கா எச்சரிக்கை விடுத்து உள்ளது.

புத்தாண்டு தினத்தையொட்டி வடகொரியா அதிபர் கிம் ஜாங் அன் தொலைக்காட்டியில் பேசியபோது, தோன்றி நாட்டு மக்களிடையே பேசும்போது, “நாம் கண்டம் விட்டு கண்டம் பாயும் ஏவுகணைகளை வெற்றிகரமாக செலுத்தும் திட்டத்தின் இறுதி கட்டத்தில் இருக்கிறோம்.

இதை நாம் நிகழ்த்தி விட்டால் இங்கிருந்தே அமெரிக்காவின் கடற்கரை நகரங்களை (சுமார் 10 ஆயிரம் கிலோ மீட்டர்கள் தொலைவு) நம்மால் தாக்க முடியும் என்று பேசினார்.

இதற்குதான் பென்டகன் உடனடி பதிலடியை வெளியிட்டுள்ளது.
கண்டம் விட்டு கண்டம் பாயும் ஏவுகணை சோதனையை நடத்தக் கூடாது என்று ஐ.நா. பாதுகாப்பு கவுன்சில் ஏற்கனவே வடகொரியாவுக்கு தடை விதித்து உள்ளது. அதையும் மீறி சோதனை நடத்துவோம் என்று வடகொரியா கூறுகிறது.

அப்படி செய்தால் கடும் விளைவுகளைச் சந்திக்க நேரிடும் என்று எச்சரித்துள்ளது.

சிறைக்கு போயும் திருந்தாத கைதிகள்… மோதல்… பலி 60 பேர்

மனோவ்ஸ்:
சிறைக்கு போயும் திருந்த மாட்டேங்கிறாங்களேப்பா… என்று நொந்து போய் உள்ளனர் பிரேசில் மக்கள். எதற்காக தெரியுங்களா?

பிரேசில் சிறையில் கைதிகளிடையே ஏற்பட்ட கலவரத்தில் 60க்கும் மேற்பட்டோர் இறந்த சம்பவம்தான் இப்படி ஒரு வேதனையை கிளப்பி உள்ளது.

பிரேசில் நாட்டில் அமேசான் காட்டு பகுதியை ஒட்டிய மனோவ்ஸ் சிறை உள்ளது. இங்கு போதை பொருள் கடத்தல் உட்பட பல குற்றங்களில் தொடர்புடைய கைதிகள் அடைக்கப்பட்டுள்ளனர்.

இதில் இரு கும்பல்களுக்கு இடையே ஏற்பட்ட அதிகார மோதல் பெரும் கலவரமாக மாறியது. இந்த கலவரம் இன்று காலை 7 மணி வரை நீடித்தது.

சிறை அதிகாரிகள் 12 பேரை பிணையமாக பிடித்த கைதிகள் அவர்களிடமிருந்த ஆயுதங்களை பறித்துக் கொண்டு  ஒருவரையொருவர் சரமாரி தாக்கிக்கொண்டனர். இதில் 60 க்கும் மேற்பட்டார் பலியாகி உள்ளனர். இச்சம்பவம் அந்நாட்டில் பெரும் பரபரப்பை கிளப்பி உள்ளது.

துருக்கி தீவிரவாத தாக்குதல்… கண்காணிப்பு கேமராவில் சிக்கிய மர்ம நபர்

இஸ்தான்புல்:
துருக்கி தீவிரவாத தாக்குதலின் போது கண்காணிப்பு கேமராவில் பதிந்த கொலையாளியின் உருவத்தை போலீசார் வெளியிட்டு உள்ளனர்.

துருக்கி நாட்டின் தலைநகர் இஸ்தான்புலில் பிரபல இரவு நேர விடுதியில் புத்தாண்டை கொண்டாட கூடியிருந்த மக்களை மர்ம நபர் ஒருவன் துப்பாக்கியால் சரமாரியாக சுட்டான். பின்னர் அங்கிருந்து அவன் தப்பியோடிவிட்டான்.

இந்த தீவிரவாத தாக்குதலில் 2 இந்தியர்கள் உள்பட 39 பேர் பலியாகினர். பெரும் பதற்றத்தை ஏற்படுத்திய இந்த கொடூர தாக்குதலை நடத்தியவன் உருவன் அங்கிருந்த கண்காணிப்பு கேமராவில் பதிவாகி உள்ளது. அந்த காட்சிகளை துருக்கி போலீசார் வெளியிட்டுள்ளனர்.

கொலையாளியின் உருவத்தை அடிப்படையாக கொண்டு அவனை தேடும் வேட்டையை போலீசார் தீவிரப்படுத்தி உள்ளனர். இந்நிலையில் இந்த தாக்குதலுக்கு பொறுப்பு ஏற்பதாக ஐ.எஸ். அமைப்பு அறிவித்துள்ளது.

ஓட்ட வா என்றால்… ஊற்றிக் கொண்டு வந்த பைலட்… இப்போ சிறையில்….

கனடா:
ஓட்ட வா என்றால்… ஊற்றிக் கொண்டா வருகிறாய் என்று புல் போதையில் மட்டையான விமானியை சிறையில் தள்ளியுள்ளனர் போலீசார். எங்கு தெரியங்களா?

மேற்கு கனடாவின் கால்கரி விமான நிலையத்தில் இருந்து மெக்சிகோவுக்கு 100-க்கும் அதிகமான பயணிகளுடன் போயிங் 737 ரக விமானம் ஒன்று கடந்த சனிக்கிழமை புறப்படத் தயாராக இருந்தது.

விமானம் புறப்படுவதற்கு முன்பு, விமானத்தை ஓட்ட இருந்த பைலட் புல் போதையில் மட்டையாகி விமானத்தின் காக்பிட்டில் மயங்கி விழுந்தார்.

இதுகுறித்து விமான நிலைய அதிகாரிகளுக்கு பயணிகள் தகவல் அளிக்க, தொடர்ந்து வேறொரு விமானியை வைத்து அந்த விமானம் இயக்கப்பட்டது. அப்புறம் என்ன பொறுப்பில்லாமல் பணிக்கு வந்த அந்த விமானியை பொறுப்பாக போலீசில் ஒப்படைக்க… இப்போது கம்பி எண்ணிக் கொண்டு இருக்கிறார்.

மழை… மழை… தென் கடலோர மாவட்டங்களில் மழை…

சென்னை:
வடகிழக்கு பருவக் காற்றின் காரணமாக, அடுத்த 24 மணி நேரத்தில் தமிழகத்தின் தென் கடலோர மாவட்டங்களில் ஓரிரு இடங்களில் மழை… பெய்யலாம் என்று வானிலை ஆய்வு மையம் தெரிவித்துள்ளது.

மாலத்தீவு அருகே நிலவி வரும் காற்றழுத்தம் வலுவிழந்துவிட்டது. மேலும் தெற்கு அந்தமான் கடற்பகுதி மற்றும் அதை ஒட்டிய தென்கிழக்கு வங்கக் கடலில் ஒரு காற்றழுத்த தாழ்வுநிலை நிலவி வருகிறது.

அடுத்த 48 மணி நேரத்தில் (இன்று 3ம் தேதி காலை 8.30 மணியிலிருந்து) அதே பகுதியில் புதிய காற்றழுத்த தாழ்வு பகுதி உருவாக வாய்ப்புள்ளது. இதனால் தமிழகத்தில் அடுத்த சில தினங்களுக்கு மழை எச்சரிக்கை எதுவும் இல்லை.

வடகிழக்கு பருவக் காற்றின் காரணமாக, அடுத்த 24 மணி நேரத்தில் தமிழகத்தின் தென் கடலோர பகுதிகளில் ஓரிரு இடங்களில் மழை பெய்ய வாய்ப்புள்ளது என்று தெரிவிக்கப்பட்டுள்ளது.

N.நாகராஜன்

Likes(1)Dislikes(0)
Share
Jan 022017
 

final

புத்தாண்டு பிறந்துள்ளது. இந்த ஆண்டிலிருந்து மகிழ்ச்சியாக இருக்க வேண்டுமென முடிவெடுத்துள்ளீர்கள். ஆனால் எப்படி என தெரியவில்லையா? அப்படி என்றால் இந்த பதிவு உங்களுக்குத்தான்.

சிலரால் மட்டும் எப்படி எப்போதுமே மகிழ்ச்சியாக இருக்க முடிகிறது? அவ்வாறு மகிழ்ச்சியாக இருக்க என்ன வேண்டும்..? கோடி ரூபாய் பணம்..? ஒரு பெரிய பங்களா..? கோடீஸ்வர வீட்டு சம்பந்தம்..? லட்ச லட்சமாய் பணம் புரளும் வியாபாரம்..?

இவை மட்டும் கிடைத்து விட்டால் போதுமா..? காலம் முழுவதும் கவலைகளின்றி சந்தோஷமாக இருந்து  விடுவோமா..?

சந்தோஷம் எதில் தான் இருக்கிறது? ரொம்ப சுலபம். நம் “எண்ணத்தில்” தான் அது இருக்கிறது.

மகிழ்ச்சியாக இருக்க, ஹார்வர்டு பின்பற்றச்சொல்லும் சில வழிகளை இங்கு பார்ப்போம்!

1.எல்லா மனிதர்களையும், எல்லா நிகழ்வுகளையும் கொண்டாடுங்கள்!

உங்களைச்சுற்றி இருக்கும் ஒவ்வொரு நல்ல விஷயங்களையும் கவனியுங்கள்.. சாலையில் நடக்கும் போது, எரிச்சலை ஏற்படுத்தும் போக்குவரத்து நெரிசலை பார்த்திருப்பீர்கள். அதே சாலையின் ஓரத்தில் பூத்துக்குலுங்கும் மலர்களை ரசித்திருக்க மாட்டீர்கள். உங்களை சுற்றியிருக்கும் மனைவி, குழந்தைகள், உறவினர்கள், நண்பர்கள் என எல்லோரின் நல்ல விஷயங்களை ரசியுங்கள்..கொண்டாடுங்கள்..மகிழ்ச்சிக்கு குறைவிருக்காது.. குழந்தைகளிடம் இதை நாம் கற்கலாம், எதையுமே ரசித்து பார்த்து மகிழ்வது குழந்தைகளின் குணம்.

2.நல்ல நண்பர்களை சம்பாதியுங்கள்!

உளவியல் ஆய்வின் படி, ஒருவரின் மனதின் மகிழ்ச்சியை அவரை சுற்றியிருக்கும் விஷயங்களே முடிவு செய்கின்றன. எனவே, மிகவும் மகிழ்ச்சியான நண்பர்கள், உங்களுக்கு ஊக்கமளிக்கும் நண்பர்கள், உங்களை குறைசொல்லாத, உங்களை நம்பிக்கையை சிதைக்காத நண்பர்களுடனேயே நேரத்தை செலவிடுங்கள்..! இது உங்கள் பாசிட்டிவ் எனர்ஜியை குறைக்காமல் வைத்திருக்கும்.

3.பிடித்ததை செய்யவும்!

பிடித்த விஷயங்களை செய்யம்போது, மனம் அளவற்ற மகிழ்ச்சியுடன் இருக்கும். பலருக்கு, வாழ்க்கையின் மீது வெறுப்பு வர, பிடிக்காத வேலையை செய்து கொண்டிருப்பதே காரணமாக இருக்கும். வேண்டாம் என தவிர்க்கவும் பொருளாதார சூழல் இடம் தராது. அதே சமயம் உங்களுக்கு பிடித்த சினிமா பார்ப்பதையோ, புத்தகம் படிப்பதையோ, பயணம் செல்வதையோ யாராலும் தடுக்க முடியாதே? இவற்றை அடிக்கடி செய்யுங்கள்..மகிழ்ச்சி அதிகரிக்கும்.

4.செய்வதை திருந்தச்செய்வும்!

நீங்கள் எந்த வேலை  வேண்டுமானாலும் செய்யலாம். ஆனால் அதில் உங்கள் மனமும், உடலும் ஒன்றி இருக்க வேண்டும். இதன் மூலம் உங்கள் மனம் தேவையற்ற சிந்தனைகள் பற்றி நினைக்காது. தேவையற்ற சிந்தனைகள் மூளையை குழப்பாமல் இருந்தாலே, மகிழ்ச்சியும் குறையாது.

5. கற்றுக்கொள்வதை நிறுத்தாதீர்கள்!

சில ஆய்வுகளின் படி, புதிய விஷயங்களை கற்றுக்கொண்டே இருப்பதன் மூலம், மூளை எப்போதும் சுறுசுறுப்புடன் இருக்குமாம். இதனால் உங்களது துன்ப நினைவுகளை அது அசைபோடாது எப்போதும் பிசியாக இருக்க வைக்கும். எனவே மனம் எப்போதும், மகிழ்ச்சியாக இருக்கும்.

6.தடை..அதை உடை.!

எப்போதும், எந்த இடத்திலும் பிரச்சினைகளே இருக்கக்கூடாது என நினைக்காதீர்கள். எந்த பிரச்சினை வந்தாலும், அதனை தாங்கும் வலிமை வளரவேண்டும் என நினையுங்கள். நீங்கள் பிரச்சினைகளை வெற்றிகரமாக எதிர்கொள்ள, எதிர்கொள்ள உங்கள் தன்னம்பிக்கை தானாக அதிகரிக்கும். தன்னம்பிக்கையை வளர்த்தலும் மகிழ்ச்சியை அதிகரிக்கும்.

7.எது நடந்ததோ, அது நன்றாகவே நடந்தது!

நீங்கள் அடிக்கடி கவலைப்படும் நபராக இருந்தால், உங்கள் கடந்த காலத்தில் வாழ்கிறீர்கள் என்று அர்த்தம். சோக நினைவுகள் வருத்தத்தை தந்தாலும், அவை நடந்து முடிந்த விஷயங்கள். அவற்றை மாற்றவும் முடியாது. எனவே இல்லாத, கடந்த காலத்தை நினைத்து, நிகழ்கால மகிழ்ச்சியை இழக்காமல், நிகழ்காலத்தில் வாழுங்கள். நடப்பதை மட்டுமே நினையுங்கள்.. பாதி கவலைகள் பறந்தோடும்.

8.அடிக்கடி சிரியுங்கள்!

அடுத்த நொடி, என்ன நடக்கும் என்பது கூட தெரியாத, நிச்சயமற்ற வாழ்க்கைதானே நாம் வாழ்வது? இதில் ஏன் இவ்வளவு சிக்கல்களை உருவாக்க வேண்டும்? நகைச்சவை உணர்வு கொண்டவராக மாறிவிடுங்கள்..முடியவில்லையா? ஒரு நகைச்சுவை படம் பார்க்கலாம். ஹியூமர் நிரம்பி வழியும் நண்பர்களுடன் பேசலாம்..சிரிப்பு நமக்கு கிடைத்திருக்கும் பரிசு..அதைப் பயன்படுத்துங்கள்.. அதுதான் உங்கள் கோபத்தை, விரக்தியை விரட்டும் மருந்து..

9.மன்னிக்க கற்றுக்கொள்வோம்!

கோபம் என்பது அடுத்தவர்களின் தவறுக்காக, நமக்கு நாமே கொடுத்துக்கொள்ளும் சுயதண்டனை. அதை ஏன் அடிக்கடி அனுபவிக்க வேண்டும்? பதிலாக அவர்களை மன்னித்துப்பாருங்கள்.. உங்கள் மனமும் மகிழும்..உங்கள் குணமும் வளரும்.. தவறு செய்யாதவர்கள் யாருமே இல்லைதானே? எனவே மறப்போம், மன்னிப்போம்..என இருந்தால், உங்கள் மதிப்பையும், மகிழ்ச்சியையும் இது இன்னும் அதிகாரிக்கும்தானே !

10.நன்றி சொல்வது, நன்று!

உங்களை சுற்றியிருப்பவர்களிடம் அடிக்கடி நன்றி சொல்லுங்கள்..அவர்கள் செய்யும் சிறிய உதவியோ, பெரிய உதவியோ அதனைப் பாராட்ட மறக்காதீர்கள். நன்றி சொல்ல மறக்காதீர்கள்.

11.உறவின் ஆழம் அதிகரிக்கட்டும்!

வீடு, அலுவலகம், சுற்றம் என சமூகத்தில் பல பேரிடம் நாம் இணைந்தே வாழ்கிறோம். அப்படி நாம் கொண்டுள்ள சொந்தங்களில், நெருக்கமான உறவுகளுடன் நேரம் செலவிடும் போது, அதிக மகிழ்ச்சி அடைகிறோம்.  அப்படி நெருக்கமான மனிதர்களை அதிகம் வளர்த்துக்கொள்ளுங்கள். உற்சாகம் அதிகமாகும்.

12.ஆதலால் அதிகம் காதல் செய்!

நீங்கள் விரும்புவது போன்று, மனிதர்கள் வேண்டுமென்றால், இந்த உலகில் யாருமே கிடைக்கமாட்டார்கள். எனவே உங்களைச் சுற்றியிருக்கும் எல்லோரையும் அப்படியே ஏற்றுக்கொள்ளுங்கள் உங்களுக்கு பிடித்தவரை அளவுக்கதிகமாக விரும்புங்கள்.. காரணம் அன்பு செய்தல் அவ்வளவு சுகம் !

13.நமக்கு நாமே நல்லது!

உலகில் உங்களது மிகச்சிறந்த காதலன் / காதலி நீங்களாகவே இருக்க வேண்டும். உங்கள் உடலின் மீது உங்களுக்கு மிகுந்த அக்கறை நிச்சயம் தேவை. சுவர் இருந்தால்தானே சித்திரம்? எனவே, உணவு, உறக்கம் என உங்கள் விஷயங்களில், குறிப்பாக உங்கள் உடல் நலனில் அதிக கவனம் இருக்கட்டும். நீங்கள் முதலில் உங்களை விரும்புங்கள்.

14.தியானம் நல்லது!

ஆய்வின் படி, தியானம் செய்பவர்களின்  மூளையில் , தியானம் செய்யாதவர்களின் மூளையை விட, கற்றுக்கொள்ளும் திறனும், நினைவாற்றல் திறனும் 20 சதவீதம் அதிகரிக்கிறது. எனவே தினமும் கொஞ்ச நேரம் தியானம் செய்யலாமே !

15.நன்மையே செய்வோம்!

நல்லதையே நினைப்போம், நல்லதையே செய்வோம். அதுவே எப்போதும் இன்பம் தரும். நல்ல விஷயங்களை செய்யும் போது, நம்மை பாராட்ட வேறு யாரும் வேண்டாம். நமது மூளையே, நம்மை பாராட்டி, மகிழ்ச்சியாக்கி விடும்.

மகிழ்ச்சியாக இருக்க, ஹார்வர்டு பல்கலைக்கழகம் சொல்லிக்கொடுக்கும் வழிகள்தான் மேலே கூறப்பட்டுள்ளவை. இது இந்த ஆண்டிற்கு மட்டுமல்ல, எல்லா ஆண்டிற்கும் பொருந்தும். முடிந்தவரை இந்த விஷயங்களை கடைபிடியுங்கள், ஆனந்தமாய் இருங்கள். மகிழ்ச்சியுடன் இந்த வாழ்வை கொண்டாடுங்கள்.

S.முரளிதரன்

Likes(6)Dislikes(0)
Share
Dec 272016
 

5

நாற்பத்து ஒன்பதே நாள்… உலகை சுற்றி வந்து சாதனை

பாரீஸ்:

நாற்பத்து ஒன்பதே நாள்… நாற்பத்து ஒன்பதே நாள்… படகு மூலம் உலகை சுற்றி வந்து பிரான்சை சேர்ந்த தாமஸ் கோவில்லே சாதனை படைத்துள்ளார்.

பிரான்சை சேர்ந்தவர் தாமஸ் கோவில்லே (48). இவர் கடல் பயணம் மேற்கொள்வதில் மிகுந்த ஆர்வம் கொண்டவர். இவர் படகு மூலம் உலகை சுற்றி வர திட்டமிட்டார். அதற்காக 31 மீட்டர் நீள படகில் தனி ஆளாக பயணம் மேற்கொண்டார்.

தனது பயணத்தை முடித்த அவர் 49 நாட்களில் மேற்கு பிரான்சில் உள்ள பிரெஸ்ட் துறைமுகத்துக்கு மீண்டும் திரும்பினார்.

இவர் 49 நாட்கள், 3 மணி 7 நிமிடம் மற்றும் 38 வினாடிகளில் உலகை சுற்றி முடித்துள்ளார். இதற்கு முன்பு கடந்த 2008-ம் ஆண்டு பிரான்சிஸ் ஜோயன் என்ற பிரெஞ்சுக்காரர் 57 நாட்கள் மற்றும் 13 மணி நேரத்தில் படகில் உலகை சுற்றி வந்துள்ளார். இதனால் கோவில்லே புதிய சாதனை படைத்துள்ளார்.

இது குறித்து அவர் கூறுகையில், இச்சாதனை படைக்க நான் 10 ஆண்டுகள் கடுமையாக உழைத்தேன் என்றார்.

ஆட்டம், பாட்டம் கொண்டாட்டம்… படகு ஏரியில் கவிழ்ந்து 30 பேர் பலி

கம்பாலா:
கிறிஸ்துமஸ் தினத்தன்று உகாண்டா நாட்டில் ஏற்பட்டட சோகம் மக்களை வெகுவாக கவலையில் ஆழ்த்தியுள்ளது. என்ன தெரியுங்களா? கிறிஸ்துமஸ் தினவிழாவில் கால்பந்து வீரர்கள் உள்பட 30 பேர் ஏரியில் மூழ்கி இறந்த சம்பவம்தான் அது.

உகாண்டா – காங்கோ ஜனநாயக குடியரசு நாட்டிற்கிடையிலான எல்லையில் ஓடும் ஏரி அல்பெர்ட். ஆப்பிரிக்க கண்டத்தில் உள்ள மிகச்சிறந்த ஏரிகளில் இதுவும் ஒன்று என்பது குறிப்பிடத்தக்கது.

160 கிலோ மீட்டர் நீளமும், 30 கி.மீட்டர் அகலமும் கொண்டது இந்த ஏரி. புலிசா மாவட்டத்தின் கவெய்பாண்டா கிராமத்தைச் சேர்ந்த ஒரு கால்பந்து அணியினர் மற்றும் அவர்களின் ரசிகர்கள் கிறிஸ்துமஸ் விழாவை முன்னிட்டு நடந்த ஒரு போட்டியில் பங்கேற்க இந்த ஏரியின் வழியாக படகில் சென்று கொண்டிருந்தனர்.

அவர்கள் டிரம்ஸ் போன்ற இசைக்கருவியால் இசைத்து ஆடி பாடி சென்றனர். அப்போது எதிர்பாராத விதமாக படகு கவிழ்ந்தது. இதில் 30 பேர் பரிதாபமாக உயிரிழந்தனர்.

காங்கோவின் இன மோதல்… 13 பேர் பலியான சோகம்…

காங்கோ:
காங்கோ ஜனநாயக குடியரசு நாட்டில் இரு இனத்தவர்கிடையே நடந்த மோதலில் 13 பேர் பலியான சம்பவம் பெரும் அதிர்வலைகளை ஏற்படுத்தி உள்ளது.

காங்கோ நதட்டின் வடக்கு கிவு மாகாணத்தில் நந்தே என்ற இனத்திற்கும், ஹது என்ற இனத்திற்கும் இடையே மோதல் இருந்து வருகிறது. கிறிஸ்துமஸ் அன்று இந்த இரண்டு இனத்தவர்களுக்கும் இடையே பயங்கர மோதல் ஏற்பட்டது.

இதில் நந்தே குழுவினரைச் சேர்ந்த 13 பேர் கொல்லப்பட்டனர்.
பின்னர் ராணுவம் அந்த இடத்திற்கு விரைந்து சண்டையை முடிவுக்கு வந்ததாக உள்ளூர் அதிகாரி அல்போன்ஸ் மஹோனோ தெரிவித்துள்ளார். இச்சம்பவம் பெரும் அதிர்வலைகளை ஏற்படுத்தி உள்ளது.

கொண்டு வாங்க… முடிவுக்கு கொண்டு வாங்க… போப் வேண்டுகோள்

வாடிகன்:
கொண்டு வாங்க… முடிவுக்கு கொண்டுவாங்க… சிரியாவின் உள்நாட்டு போரை என்று போப் வேண்டுகோள் விடுத்துள்ளார்.

வாடிகன் நகரில் உள்ள செயின்பீட்டர் சதுக்கத்தில் நடந்த கிறிஸ்துமஸ் சிறப்பு பிரார்த்தனையில் இப்படி ஒரு வேண்டுகோளை போப் பிரான்சிஸ் தெரிவித்துள்ளார்.

வாடிகன் நகரில் உள்ள செயின்பீட்டர் சதுக்கத்தில் போப் ஆண்டவர் பிரான்சிஸ் கிறிஸ்துமஸ் சிறப்பு பிரார்த்தனை நடத்தினார். இதில் லட்சக்கணக்கானோர் கலந்து கொண்டனர். அப்போது போப் பேசுகையில்,  சிரியாவில் பல ஆண்டுகளாக உள் நாட்டு போர் நடந்து வருகிறது. சர்வதேச நாடுகள் தலையிட்டு பேச்சு வார்த்தை மூலம் போரை முடிவுக்கு கொண்டு வர வேண்டும்.

இஸ்ரேலியர்களும், பாலஸ்தீனியர்களும் ஒன்றினைந்து புதிய வரலாறு எழுத வேண்டும். உலக அளவில் பல நாடுகள் மற்றும் நகரங்களில் தீவிரவாதம் தலையெடுத்துள்ளது. அங்கு வாழும் மக்கள் மனதில் அச்சமும், மரண பயமும் விதைக்கப்பட்டுள்ளது. அது கண்டிக்கத்தக்கது என்றார்.

ஆப்பு வைக்கிறது ஓகே… ஆனால் அதுபோல் “ஆப்” ரெடி பண்ணுங்க…

புதுடில்லி:
ஆப்பு… வைக்கிறதுக்கு முன்னாடி நீங்க… அதுபோல “ஆப்” ரெடி செய்யுங்க என்று எஸ்.பி.ஐக்கு மக்கள் கடும் கண்டனம் தெரிவித்துள்ளனர். எதற்காக தெரியுங்களா?

பேடிஎம் மூலம் பண பரிவர்த்தனை செய்ய எஸ்.பி.ஐ தடைவிதித்துள்ள சம்பவம்தான் தற்போது மக்களை செம டென்ஷன் ஆக்கியுள்ளது.
எஸ்.பி.ஐ வங்கி, பேடிஎம் வாயிலாக பண பரிவர்த்தனை செய்ய தடைவிதித்துள்ளது. இதுகுறித்து தனது டுவிட்டரில், பேடிஎம் மூலம் பண பரிவர்த்தனை செய்வது நிறுத்தி வைக்கப்பட்டுள்ளது.

அதற்கு பதிலாக State Bank Buddy என்ற மொபைல் ஆப்பை பயன்படுத்துங்கள் என்று தெரிவித்துள்ளது.

ரூபாய் நோட்டுகள் முடக்கத்திற்கு பின், பொதுமக்கள் அதிகளவில் பேடிஎம் ஆப்பை பயன்படுத்தி வருகின்றனர். இந்நிலையில் எஸ்.பி.ஐயின் இந்த செயல்பாடு வாடிக்கையாளர்களை வெகுவாக பாதித்துள்ளது.

இதனால் வாடிக்கையாளர்கள், பேடிஎம்க்கு இணையாக உங்கள் ஆப்பை தயார் செய்துவிட்டு பின் இந்த நடவடிக்கையை எடுங்கள் என்று கடும் கண்டனம் தெரிவித்துள்ளனர்.

அள்ளிக்கோ… அள்ளிக்கோ… தாராளமாய் அள்ளிக்கோ… தவறால் வந்த வினை

ஐதராபாத்:
அள்ளிக்கோ… அள்ளிக்கோ… தாராளமாய் அள்ளிக்கோ… என்று ஒரு தவறால் நடந்த சம்பவம் வங்கி அதிகாரிகளை அதிர்ச்சியடைய செய்துள்ளது.

ஐதராபாத்தின் சம்ஷாகாத்தில் உள்ள சர்வதேச விமான நிலையத்தில் உள்ள கொடாக் மகேந்திரா வங்கி ஏடிஎம்-ல் 100 ரூபாய்க்கு பதிலாக 500 ரூபாய் நோட்டுகள் வர… க்யூவில் நின்று மக்கள் அள்ளிச் சென்றுள்ளனர். இப்போது வங்கி அதிகாரிகள் வாயை பிளந்து அதிர்ச்சி அடைந்துள்ளனர்.

இந்த விமான நிலையத்தில் ரூ.100க்கு பதிலாக ரூ.500 கிடைப்பதை அறிந்த விமானப் பயணி ஒருவர் இதை அப்படியே மற்றவர்களிடம் பரப்ப… அப்புறம் என்ன கிடைத்தவரை லாபம் என்று மக்கள் க்யூ., கட்டி அள்ளிச் சென்றுள்ளனர்.

இதுகுறித்து அறிந்த வங்கி அதிகாரிகள் உடன் விமான நிலையத்தில் உள்ள குறிப்பிட்ட ஏடிஎம் இயந்திரத்தின் சேவையை நிறுத்திவிட்டனர். அதற்குள் ரூ.8 லட்சம் தொகையை எடுக்கப்பட்டதுதான் சோகம். 100 ரூபாய்க்கு உரிய இடத்தில் 500 ரூபாய் வைக்கப்பட்ட தவறால்தான் இப்படி நேர்ந்துள்ளது.

இவரு… பாதுகாப்பு அமைச்சரா? நெட்டிசன்கள் கலாய்ப்போ… கலாய்ப்பு

இஸ்லாமாபாத்:
இவரு… பாதுகாப்பு அமைச்சரா? என்று நெட்டிசன்கள் செம கலாய்ப்பு கலாய்த்து வருகின்றனர். யாரை? எதற்காக தெரியுங்களா?

இணையதளத்தில் வெளியான போலி செய்தியை உண்மை என்று நம்பி பாகிஸ்தான் பாதுகாப்பு அமைச்சர், இஸ்ரேலுக்கு ராணுவத்திற்கு விடுத்த மிரட்டல்தான் தற்போது பெரும் சர்ச்சை கிளப்பி உள்ளது.

பாகிஸ்தான் நாட்டில் உள்ள இணையதளம் ஒன்றில் இஸ்ரேல் பாதுகாப்பு அமைச்சர் கூறியதாக போலி தலைப்புச் செய்தி ஒன்று வெளியானது.

அதில், எந்த ஒரு முன் அனுமானத்திலும் சிரியாவுக்கு பாகிஸ்தான் தனது தரைப்படைகளை அனுப்பினால், நாங்கள் பாகிஸ்தான் மீது அணு ஆயுதத் தாக்குதல் நடத்தி அழிப்போம் என்று தெரிவிக்கப்பட்டு இருந்தது.

அதில் இஸ்ரேலின் பாதுகாப்பு அமைச்சர் பெயர் தவறாக வெளியாக, இது உண்மையா என்று கூட ஆராயாமல் பாகிஸ்தான் பாதுகாப்பு அமைச்சர் கவாஜா முகமது ஆசிப் கொதித்து போய்… தனது டுவிட்டர் பக்கத்தில் பாகிஸ்தானும் அணு ஆயுத நாடு என்பதை இஸ்ரேல் மறந்து விட்டது என்று பதிவிட்டார். (உண்மையை சொல்லிட்டாருய்யா… சொல்லிட்டாரு… அய்யா… உலக அண்ணனே… நோட் திஸ் பாய்ண்ட்)

இதையடுத்து இத்தகைய செய்தியை இஸ்ரேல் தெரிவிக்கவில்லை என்று இஸ்ரேல் பாதுகாப்பு அமைச்சகம் தெரிவித்தது. இதற்கு பாகிஸ்தான் பாதுகாப்பு அமைச்சர் பதில் அளிக்கவில்லை.

இதனால் டுவிட்டரில் பகுதியில் அவரது ஆராயாமல் பதிவிட்ட ஆவேசமான கருத்துக்கு நெட்டிசன்கள் கிண்டல் செய்து வருகின்றனர்.

N.நாகராஜன்

Likes(2)Dislikes(0)
Share
Dec 212016
 

us

செம அட்டகாசம்ப்பா… அசத்தல்பா… பேஸ்புக்வாசிகள் கொண்டாட்டம்

சான்பிரான்சிஸ்கோ:
செம அட்டகாசம்ப்பா… அசத்தல்பா… என்று பேஸ்புக்வாசிகள் கொண்டாடுகின்றனர். எதற்காக தெரியுங்களா?

பேஸ்புக் மெசேஞ்சர் செயலியில் ஒரே சமயத்தில் பலருடன் வீடியோ சாட் செய்யும் அம்சம் அறிமுகம் செய்யப்பட்டுள்ளது இதற்கு காரணம்.
ஒரே சமயத்தில் 50 பேருடன் வீடியோ சாட் செய்யலாமாம். என்னன்னு பார்ப்போமா!

ஒரே நேரத்தில் ஆறு பேர் வரை க்ரூப் வீடியோ சாட் ஆப்ஷனில் பார்க்க முடியும். 50 பேர் வரை க்ரூப் சாட் மூலம் குரல்களை கேட்க முடியும். 6 பேர் மற்றும் அதற்கும் அதிகமானோர் சாட் செய்யும் போது மற்றவர்களுக்கு ஸ்பீக்கர் ஆப்ஷன் மட்டுமே தெரியும் என்று பேஸ்புக் தெரிவித்துள்ளது.

இதற்கு அப்டேட் செய்யப்பட்ட புதிய மெசேஞ்சர் செயலியை இன்ஸ்டால் செய்யப்பட்டிருக்க வேண்டும். வீடியோ க்ரூப் சாட் செய்ய ஏற்கனவே இருக்கும் க்ரூப் அல்லது புதிய க்ரூப் ஒன்றை உருவாக்கி வீடியோ சாட் மேற்கொள்ளலாம் என்று தெரிவிக்கப்பட்டுள்ளது.

இந்தா வைச்சுக்கோ… கைப்பற்றியதை மீண்டும் கொடுத்தது சீனா!

பீஜிங்:
இந்தா வைச்சுக்கோ… என்று 5 நாட்களுக்கு பிறகு திரும்ப ஒப்படைச்சிருக்காம்… சீனா… என்ன விஷயம் தெரியுங்களா?

தென்சீனக் கடலில் தான் கைப்பற்றிய அமெரிக்காவின் ஆளில்லா நீர்மூழ்கி கப்பலை 5 நாட்களுக்குப் பிறகு அமெரிக்காவிடம் ஒப்படைத்துள்ளது சீனா.

அமெரிக்க கடற்படைக்கு சொந்தமான ஆளில்லா நீர்மூழ்கி கப்பல் கடல்சார்ந்த ஆராய்ச்சிகளில் ஈடுபட்டு வந்தது. “கடல் மிதவை” எனப்படும் இந்த ஆளில்லாத நீழ்மூழ்கி கப்பல் நீரின் உப்பு தன்மையையும், வெப்பநிலையையும் சோதிக்கப் பயன்படுகிறது.

கடந்த 15-ம் தேதி பிலிப்பைன்ஸ் நாட்டை ஒட்டியுள்ள கடற்பகுதியில் தண்ணீருக்கு அடியில் ஆய்வில் இருந்த இந்த ஆளில்லா நீர்மூழ்கியை சீனக் கடற்படையினர் பறிமுதல் செய்தனர்.

இதனால் பெரும் பதற்றம் உருவானது. இதற்கு அமெரிக்கா தரப்பில் கடும் கண்டனம் தெரிவிக்கப்பட்ட நிலையில் நீர் மூழ்கியை பறிமுதல் செய்ததாக விளக்கம் அளித்த சீனா, உரிய நடைமுறைக்குப் பிறகு கப்பலை திருப்பி தருவதாகவும் உறுதி அளித்தது.

ஆனால் உடனடியாக பதிலடி கொடுத்த டிரம்ப், “திருடப்பட்ட கப்பல் எங்களுக்கு வேண்டாம். அதனை அவர்களே வைத்துக் கொள்ளட்டும்” என்று தெரிவிக்க மீண்டும் பரபரப்பு பற்றிக்கொண்டது. நீர்மூழ்கியை திருடியதாக கூறிய டொனால்டு டிரம்பின் குற்றச்சாட்டிற்கு சீனா மறுப்பு தெரிவித்தது.

பின்னர் 5 நாட்களுக்கு பின்னர் அந்த நீர்மூழ்கியை சீனா மீண்டும் அமெரிக்காவிடம் ஒப்படைத்துள்ளது.

டுவிட் போட்டு கவனம் பெற்ற “சிரியா” சிறுமி குடும்பத்துடன் மீட்பு!

அலெப்போ:
டுவிட் போட்டு உலக நாடுகளை தன் பக்கம் திருப்பிய சிரியாவின் அலெப்போ நகரில் இருந்த ஏழு வயது சிறுமி மீட்கப்பட்டுள்ளார்.

சிரியாவில் உள்நாட்டுப்போர் கடந்த ஆறு ஆண்டுகளாக நடந்து வருகிறது. இந்த போரில் பாதிக்கப்பட்டவர்கள் எண்ணிக்கை லட்சக்கணக்கில்.

இந்நிலையில் ஏழு வயது குழந்தையான பனா அலாபெத் தனது தாய் பாத்திமா உதவியுடன் ட்வீட் செய்து அலெப்போ நகரில் இருந்து பத்திரமாக மீட்கப்பட்டுள்ளார்.

வார இறுதியில் அலெப்போ நகரை விட்டு வெளியேற அனுமதிக்கப்பட்ட 2700 குழந்தைகளில் பனா அலாபெத் இடம் பெற்றிருக்கிறார். தனது தாயின் உதவியுடன் அலாபெத், அலெப்போவின் சூழ்நிலைகளை மிகவும் உருக்கமாக ட்விட்டரில் பதிவு செய்து உலக நாடுகளின் பார்வையை தன் மீது திருப்பினார்.

தொடர்ந்து ட்வீட் செய்து வந்த அலாபெத் 24 மணி நேரத்திற்கு ட்வீட் செய்யாததால் அவரது பாலோயர்கள் புதிய ஹேஷ் டேக் “Where Is Bana” ஒன்றை உருவாக்கி அதனை ட்ரெண்ட் செய்தனர்.

பின் அலாபெத் செய்த ட்வீட்டில் “தாக்குதலில் சிக்கியுள்ளோம், எங்கும் செல்ல இயலவில்லை, ஒவ்வொரு நிமிடமும் மரண பீதியை உணர்கிறோம். எங்களுக்காக பிரார்த்தனை செய்யுங்கள். குட்பை – பாத்திமா.” என குறிப்பிட்டிருந்தார்.

அதன் பின்னர் அப்பகுதியை சுற்றி வளைத்திருந்த அரசு படையினர் அப்பகுதியில் உள்ள பொது மக்களை வெளியேற்றினர். அதில் அலாபெத் குடும்பத்தினரும் இடம் பெற்றிருந்தனர் என்று தகவல்கள் தெரிவிக்கின்றன.

டென்னிஸ் வீராங்கனைக்கு கத்திக்குத்து… பதற்றம்… பரபரப்பு

பிராக்:
விம்பிள்டன் முன்னாள் சாம்பியன் செக் குடியரசு வீராங்கனை கிவிடோவாவின் வீட்டுக்குள் புகுந்த மர்மநபர் அவரை கத்தியால் குத்திய சம்பவம் பெரும் பதற்றத்தை ஏற்படுத்தி உள்ளது.

செக்குடியரசு நாட்டை சேர்ந்த பிரபல டென்னிஸ் வீராங்கனை பெட்ரா கிவிடோவா (26).  விம்பிள்டன் டென்னிசில் 2011 மற்றும் 2014-ம் ஆண்டுகளில் ஒற்றையர் பிரிவில் சாம்பியன் பட்டம் வென்றவர்.

காலில் ஏற்பட்ட காயம் காரணமாக தற்போது ஓய்வில் இருக்கிறார். இவர் புரோஸ்டெஜோவ் நகரில் உள்ள அடுக்குமாடி குடியிருப்பில் வசித்து வருகிறார். இந்நிலையில் இவரது வீட்டுக்குள் புகுந்த மர்ம நபர் கிவிடோவாவை கத்தியால் குத்திவிட்டு தப்பி ஓடிவிட்டான். இதில் பலத்த காயமடைந்த அவர் ஆஸ்பத்திரியில் அனுமதிக்கப்பட்டுள்ளார்.

கிவிடோவாவின் வீட்டுக்குள் நுழைந்தவர் யார்? என்ன நோக்கத்துக்காக அங்கு வந்தார்? என்பது குறித்து போலீசார் விசாரணை மேற்கொண்டுள்ளனர். இச்சம்பவம் பெரும் பரபரப்பை ஏற்படுத்தி உள்ளது.

இருக்கு… இருக்கு… போதுமான அளவுக்கு இருக்கு… மத்திய அமைச்சர் சொல்றாரு…

புதுடில்லி:
இருக்கு… இருக்கு… போதுமான அளவுக்கு வங்கிகளிடம் ரூபாய் நோட்டுக்கள் கையிருப்பில் இருக்கு என்று மத்திய நிதி அமைச்சர் அருண் ஜெட்லி சொல்லியிருக்கார். (அப்புறம் ஏன்ங்க… சாமி… எல்லா ஏடிஎம்மும் அவுட் ஆப் சர்வீசில் இருக்கு)

மத்திய அரசின் ரூபாய் நோட்டுகள் வாபஸ் அறிவிப்பு பின்னர் நாட்டில் பணத்தட்டுப்பாடு கடுமையாக உள்ளது. மக்களின் இயல்பு வாழ்க்கை பாதிக்கப்பட்டுள்ளது.

இந்நிலையில் மத்திய நிதி அமைச்சர் அருண் ஜெட்லி நிருபர்களிடம் கூறியதாவது:

ரூபாய் நோட்டு ஒழிப்பு நடவடிக்கையில் ரிசர்வ் வங்கி முழுமையான தயார் நிலையில் இருந்தது. வங்கிகளுக்கு ரிசர்வ் வங்கி பணம் வினியோகம் செய்யாத நாளே இல்லை. ரிசர்வ் வங்கியிடம் குறிப்பிட்ட அளவுக்கு ரூபாய் நோட்டுகள் கையிருப்பு இருந்தது. வங்கிகளிடம் போதுமான அளவிற்கு ரூபாய் நோட்டுக்கள் கையிருப்பில் உள்ளன.

ரொக்கமில்லா டிஜிட்டல் பண பரிமாற்றம், கிரெடிட் அட்டைகள், டெபிட் அட்டைகள் பண பரிமாற்றம் குறிப்பிடத்தக்க அளவுக்கு உயர்ந்துள்ளது. சிலவற்றில் 300 சதவீத அளவுக்கு ஏற்றம் இருக்கிறது என்று சொல்லியிருக்காருங்க…

ஐயா சாமி மத்திய அமைச்சரே! ஒரு நாளாவது நீங்க ஏடிஎம்மில் நின்று பாருங்க… என்கின்றனர் பாதிக்கப்பட்டுள்ள பொதுமக்கள்.

N.நாகராஜன்

Likes(2)Dislikes(0)
Share
Dec 182016
 

vedikkai

சகாதேவன் :

யாருக்காவது உடனடியா ரத்தம் தேவையா ? சகாதேவனுக்கு சொல்லிவிட்டால் போதும், உடனே ஆட்டோ பிடிச்சி, அவனே வந்து, ரத்த தானம் கொடுப்பான். கூடவே, முக நூலில், அவனது நண்பர்கள் இரண்டாயிரத்து சொச்சம் பேருக்கும் ஸ்டேடஸ் போட்டு தெரியப் படுத்துவான். உதவி பண்ணுங்க, ரத்த தானம் பண்ணுங்கன்னு !.  வாட்ஸ் அப்பிலே அவன் நண்பர்களுக்கு மெசேஜ் போட்டு , ஷேர் பண்ணுங்கன்னு கெஞ்சுவான்.

இது மட்டும் இல்லை, எங்கேயாவது விபத்துன்னா, சகா, தன் கை வேலையெல்லாம் விட்டுட்டு அங்கே ஓடிப்போவான். அவன்கிட்டே இருக்கிற காசிலே , அங்கே உதவி செய்கிறவர்களுக்கு, டீ வாங்கிக் கொடுப்பான், ஆம்புலன்ஸ்க்கு தகவல் கொடுப்பான். 

சுமங்கலமோ அமங்கலமோ இல்லை சோகமான பேரிடரோ , சகாவின் உதவிக் கரம் எப்போதுமே நீளும்.

சொல்லப்போனால், சகாதேவனின்  மொபைல் ரிங் டோனே தர்மம் தலை காக்கும்! தக்க சமயத்தில் உயிர் காக்கும்!எம்ஜிஆரின் பாட்டு தான்.

இத்தனைக்கும் அவன் வேலை வெட்டி இல்லாதவன் இல்லேங்க. அவனுக்கு ஒரு கம்பனியிலே நல்ல  மெகானிக் வேலை .  

***

நகுலன்

இவனுக்கு நேர் மாறு  இவன் உடன் பிறந்த நகுலன் . சகாதேவனுக்கு இரண்டு நிமிடம் முன்பு பிறந்தவன் . ஒரே  நேரத்தில், ஒரே வயிற்றில் ஜனித்த இரட்டைபிறவிகள். பிறப்பு, வளர்ப்பு, படிப்பு எல்லாம் ஒன்று தான். ஆனால், குணத்தில் தான் எவ்வளவு வித்தியாசம்?

நகுலனுக்கு வெட்டியா வேடிக்கை பாக்கிறதுன்னா, வேர்க்கடலை உருண்டை சாப்பிடறா மாதிரி. அவ்வளவு இஷ்டம்! எங்கே கூட்டம் சேர்ந்தாலும், கைவேலையை அப்படியே விட்டுட்டு, தன்னோட ஸ்கூட்டரை, பக்கத்திலேயே எங்காவது பார்க்பண்ணிட்டு, வேடிக்கை பார்க்க நின்றுவிடுவான்.

ரோட்லே எவனாவது மேன் ஹோலை திறந்து வேலை பார்த்தால் போதும், நகுலனும் அங்கே தலையை நீட்டி, எட்டிப் பார்ப்பான். சிக்னல்லே, எதாவது மோட்டார் பைக் கார் மேலே இடித்து, சண்டை வந்தாலோ, அங்கே இவன் ஆஜர். முடிஞ்சா உசுப்பேத்தி விடுவான்.

நகுலன் போகும் வழியில், ஏதாவது ஆள் பேரிலே பஸ் மோதி, அந்த ஆள் பரிதாபகமாக கீழே விழுந்துட்டால், அங்கே நகுலன் கூட்டத்தோடு கூட்டமாக , ஜோதியில் கலந்து நிற்பதை பார்க்கலாம்.  இல்லே தெரு சாக்கடையில் ஒரு குடிகாரன் உருண்டு கொண்டிருந்தாலோ,வெயில் தாங்காமல் எவனாவது மயக்கம் போட்டாலோ, நகுலன் உள்ளேன் ஐயா!என்று அவன் பக்கத்தில் அட்டண்டன்ஸ் போட்டு விடுவான்.

ஒண்ணுமே வேண்டாம் சார்ரோட்லே போற பையன் தன் கையிலே வெச்சிருந்த மட்டன் பிரியாணி பார்சல் தவறி கீழே போட்டால் கூட, அதை வேடிக்கை பார்க்க கும்பல் கூடுமே, அதுலே நகுலன் முதல் ஆளா இருப்பான்.

சார், சார், அவசரப்பட்டு, தப்பா நினைச்சிடாதீங்க!  நகுலன் தப்பி தவறி கூட உதவியெல்லாம் செய்துட மாட்டான். அந்த வழக்கமெல்லாம் அவனுக்கு கிடையவே கிடையாது. சுட்டுப் போட்டாலும், அந்த மாதிரி தப்பெல்லாம் அவன் பண்ணவேமாட்டான். பண்ண விருப்பமும் கிடையாது !

வேறே என்னய்யா பண்ணுவான்னு தானே கேக்கிறீங்க? நகுலன் , நல்ல வக்கனையா கம்மென்ட் அடிப்பான். அதிலே கில்லி.சில்லி சிக்கன் கொட்டிப்  போச்சேன்னு வருத்தப்படற பையனை பார்த்து ஏன் தம்பி, பார்த்து போகக் கூடாது? கடையிலேயே துன்னுட்டு போயிருக்கலாமில்லே?” என்று நக்கலாக கேட்டு, பையன் வயித்தெரிச்சலை கொட்டிகொள்வான்.

நகுலனுக்கு நக்கலன் என்ற பெயர் இன்னும் பொருத்தம் !

சாலையில் விபத்து நடந்து, ரத்த வெள்ளத்திலே துடிக்கிற ஆளை வேடிக்கை பார்த்துக்கொண்டே விபத்துக்கு யார் காரணம்?” என்பது பற்றி, சுற்றி இருக்கிறவர்கள் கிட்டே விவாதம் பண்ணுவான். அதுக்காக ஆம்புலன்ஸ்க்கு எல்லாம் போன் பண்ணமாட்டான்.

நான் பார்த்தேன் சார், நடந்து போறவன் பேரிலே தான் தப்பு. வண்டிக்கு குறுக்காலே போனான், அடிபட்டான். நல்லா வேணும் சார் இவங்களுக்கு. அப்பதான் புத்தி வரும் ! என்ன நான் சொல்றது?“.என்று ஹை கோர்ட் தீர்ப்பு வேறு கொடுப்பான்.

நகுலனுக்கு சாலையில் நடக்கும் நிகழ்வு பெரிதா சிறிதா என்பது முக்கியமல்ல. அது அவனுக்கு ஒரு டைம் பாஸ். அவ்வளவே.! 

****

நகுலன் அன்று ஒரு வாடிக்கையாளரை பார்த்துவிட்டு, சென்னை கிண்டி பக்கத்தில் வந்து கொண்டிருந்தான். சாலையில் ஒரு ஆட்டோ குடை சாய்ந்து இரண்டு பேருக்கு பலமான காயம். கூட்டம் சேர்ந்து விட்டது. நகுலன் தன் ஸ்கூட்டரை அவசரஅவசரமாக நிறுத்தினான். கூட்டத்தோடு  ஐக்கியமாகி விட்டான்.

பக்கத்தில் நின்றிருந்த ஒரு தாடிக்காரரிடம் கேட்டான். என்ன ஆச்சு சார் ?”.

நகுலனை திரும்பி பார்த்து விட்டு அந்த தாடிக்காரர் சொன்னார் ஆட்டோ டிரைவர் பேரிலே தாம்பா மிஷ்டேக்கு! வேகமா லெப்ட் சைடுலே ஓவர்டேக் பண்ணான். திடீர்னு எதிர்க்க தண்ணீ லாரி வந்துடிச்சுபா. ஆட்டோ காரன் அடிச்சான் பாரு ப்ரேக்! ஆட்டோ அப்பிடியே மல்லாக்க கவுந்திடுச்சு. பாவம், உள்ளே இருந்த சவாரிக்கும் அடி பலம்பா. ரெண்டு பெரும் பொழைக்கிறது கஷ்டம்

அட பாவமே!கேட்டுக்கொண்டேயிருந்தபோது, நகுலனின் கூரிய பார்வை அங்கே அடிபட்டு விழுந்திருப்பவர்களை பார்த்தது.  அங்கே பாருங்க ! டிரைவர் கால் லேசா ஆடுது பாருங்க. உயிரு இன்னும் இருக்கு போலிருக்கு. சீக்கிரம்ஆஸ்பத்திரிக்கு தூக்கிட்டு போகலைன்னா, அந்த ஆளு மேலே போக டிக்கெட் வாங்கிடுவாரு. போலீஸ், ஆம்புலன்ஸ் இன்னும் வரலியா?”.

அவனுங்க எங்கே நேரத்துக்கு வந்திருக்கானுங்க? எல்லாம் முடிஞ்சப்புறம் மெதுவா வருவானுங்க! சினிமா மாதிரி! தாடிக்காரர் சிரித்தார். அந்த  மொக்கைக்கு பதில் கடி கொடுக்க நகுலன் தீவிரமா யோசிக்கஆரம்பிக்கும் போது, அவன் அலைபேசி அழைத்தது. நான்கு மிஸ் கால் ! 

நகுலா! எங்கே இருக்கே?”. மறுமுனையில் கொஞ்சம் கவலை தோய்ந்த குரலில் அவனது  சேல்ஸ் சூப்பர் வைசர். 

இங்கே தான் சார், தாம்பரம் பக்கத்திலே! இன்னும் ஒரு மணி நேரத்திலே வந்திருவேன் சார்!”.

சரி, சீக்கிரம் வா, உன் தம்பி சகாதேவனை அமிஞ்சிகரை பில்ராத் ஹாஸ்பிடல்லே அட்மிட் பண்ணியிருக்காங்க. நீ உடனே அங்கே வா!

சார், என்ன சார் ஆச்சு என் தம்பிக்கு? காலைலே கூட நான் அவன் கூட போன்லே பேசினேனே!நகுலனின் குரலில் பதற்றம்.

என்னமோ, சரியா தெரியலே நகுலன். உங்க அம்மா தான் போன் பண்ணாங்க. உன் தம்பி அமிஞ்சி கரை பக்கம் வந்துக்கிட்டுருந்தான் போலிருக்கு. அங்கே ஏதோ ஜாதி கலவரமாம். அது நடுவிலே இவன் மாட்டிகிட்டான். எல்லாரும் ஓடியிருக்காங்க. இவன் பாவம், கூட்டத்திலே சிக்கி, கீழே விழுந்திருக்கான். எல்லோரும் இவனை மிதிச்சிகிட்டே ஒடியிருக்காங்க. வயிற்றிலே ஒரு உடைந்த கண்ணாடி கிழிச்சி, அங்கேயே மயக்கமாயிட்டான். நல்லவேளை, அவன் பிரெண்ட் பார்த்து உடனே பில்ராத்லே அட்மிட் பண்ணிட்டான். ரத்தம் கொஞ்சம் போயிருக்கு.ஆபேரஷன் பண்ணனுமாம். வேறே பயப்பட ஒன்னுமில்லையாம்.

சரி சார், நான் உடனே போய் பார்கிறேன். தேங்க்ஸ் சார்

இப்போ தான் உன்னை கேட்டு உங்க அம்மா கிட்டேயிருந்து போன் வந்தது. ரொம்ப நேரமா உனக்கு ட்ரை பண்ணாங்களாம். நீ எடுக்கலேன்னு எனக்கு பண்ணாங்க! ஏன் எடுக்கலே ? ”

வண்டி ஒட்டிகிட்டிருந்தேன் சார்

சரி, முதல்லே உங்கம்மாக்கு போன் பண்ணி பேசு !

****

நகுலன் பில் ரோத் ஹாஸ்பிடல் போகும் போது, சகாதேவன் படுக்கைக்கருகில் அவனது நண்பர் இருபது பேர் சுற்றி நின்று கொண்டிருந்தனர். அத்தனை பேரும், சகாதேவனுக்காக ரத்தம் கொடுக்க முன் வந்தவர்கள் . ரத்தம் தேவைப் படலாம் என டாக்டர் சொன்னவுடன், ரத்த தானம் செய்ய நான் நீ என நண்பர் பட்டாளம் சேர்ந்து விட்டது. 

ஒரு நண்பன் கேட்டான் தலை, நீ பிழைச்சது பெரிய விஷயம்பா. நேரத்திலே உன்னை இங்கே சேர்க்கலைன்னா கொஞ்சம் பிரச்சனையாயிருந்திருக்குமாம். டாக்டர் சொன்னாரு. ஆமா! உன்னை இங்கே யாரு அட்மிட் பண்ணது?”

சகா சொன்னான் தெரியலே இஸ்மாயில். நான் மயக்கத்திலே இருந்தேன். தாமஸ்னு அட்மிட் கார்ட்லே பேர் போட்டிருந்தது. டாக்டர் சொன்னாரு

யாரு தாமஸ்?”

அதான் யாருன்னு சரியா எனக்கு நினைவுக்கு வரல்லே”. சரி, இஸ்மாயில், உனக்கு எப்படி நான் இங்கேயிருக்கறது தெரியும்?”

கேசவன் தான்ம்பா எனக்கு போன் பண்ணி உனக்கு ரத்தம் தேவைப் படும்னு சொன்னான்

கேசவன் எங்கே ? “

இங்கே தான் இருக்கேன் மச்சான். வயித்திலே அடி பட்டு நீ மயக்கமா இருந்தே. ரத்தம் வேறே !சட்டை எல்லாம் நனைஞ்சு. பாக்க கொடுமையா இருந்திச்சி மச்சி ! நல்ல வேளை, நானும் தாமசும் உன்னை சமயத்திலே பார்த்தோம். அதை விடு! . நீ பிழைத்ததே பெரிய விஷயம் . உனக்கு இப்போ எப்படியிருக்கு? அதை சொல்லு . பரவாயில்லையா?” –கேசவன் ஆதுரமாக கேட்டான். 

சகாதேவன் எனக்கு ஒண்ணுமில்லேடா! டாக்டர் சொல்லிட்டார், நல்ல நேரத்திலே என்னை அட்மிட் பண்ணிட்டாங்களாம். நாலு யூனிட் போதுமாம். ரொம்ப தேங்க்ஸ் எல்லாருக்கும் ! டாக்டர், இவங்க எல்லாரும் என் நண்பர்கள். உங்களுக்கு எப்போ தேவையோ, இவங்களுக்கு போன் பண்ணினா, இவங்க குரூப் ரத்தம் உங்களுக்கு கிடைக்கும். என்னடா, உங்க எல்லோருக்கும் ஓகே தானே?”

டபுள் ஓகேகூட்டத்தில் அனைவரும் கோரஸ் பாடினார்கள்.

கூட்டத்தோடு நின்று கேட்டுகொண்டிருந்த நகுலன், முணுமுணுத்தான். வேறே வேலையில்லை இந்த சகாவுக்கு, எப்ப பாரு தானம் பண்ணு, தர்மம் பண்ணுன்னு சொல்லிக்கிட்டு”.

அப்போது நகுலனுக்கு பக்கத்தில் நின்று கொண்டிருந்தவன் சிரித்தான். நீங்க சொல்றது சரிதான்! ” .

திரும்பிய நகுலனுக்கு ஆச்சரியம். கொஞ்ச நேரம் முன்பு கிண்டி பக்கத்தில் பார்த்த தாடிக்காரர். அட நீங்களா ! இப்போதானே கிண்டி பக்கத்திலே பார்த்தோம். அதுக்குள்ளே நீங்க எப்படி இங்கே?  நீங்க சகாதேவன் நண்பரா?”.

தலையை மட்டும் ஆட்டி விட்டு அந்த தாடிக்காரர் , அவனை விட்டு நகர்ந்து விட்டார்.

தம்பியுடன் கொஞ்ச நேரம் பேசிக் கொண்டிருந்து விட்டு, நகுலன் ஆஸ்பிடல் வாசலுக்கு வந்து தன் வண்டியை எடுத்தான்.

***

அடுத்த நாள்.

நகுலனுக்கு  அன்று ரொம்ப  வருத்தமான நாள்.

பின்னே என்ன, தெருவில் ஒரு விபத்து கூட கண்ணில் மாட்டவில்லை. ஒரு ஆர்பாட்டம், சண்டை ஒன்னும் நடக்கவில்லை. மோடி மஸ்தான், மூலிகை விக்கறவங்க, குடிமகன் இப்படி ஒருத்தர் கூட டைம் பாசுக்கு அகப்பட வில்லை.

அங்கும் இங்கும் பார்த்து கொண்டே ஸ்கூட்டரில் வந்த நகுலன், எதிரில் வந்த லாரியை பார்க்கவில்லை. லாரி டிரைவரும் மப்பில் இருந்ததால், நகுலனை பார்க்கவில்லை.

லாரியும் ஸ்கூட்டரும் நீண்ட நாள் பிரிந்த காதலர் போல சந்தித்துக் கொண்டன. ரொம்ப நெருக்கம். டமால்”. இடையில் மாட்டிய நகுலன், அப்பளம் போல உடைந்தான். மண்டையில் பலமான காயம். அவனை சுற்றி ஒரே ரத்தம். கண்கள் இருட்டிக் கொண்டே வர, மயக்கமானான்.

நேரம் போய்க்கொண்டிருந்தது. எவ்வளவு போனது என்றே தெரியவில்லை. மெதுவாக கண்ணை விழித்தான். அவனை சுற்றி ஒரு இருபது பேர்,அவனையே பார்த்துக் கொண்டிருந்தது போல மங்கலாக தெரிந்தது. உடலை அசைக்க முடியவில்லை. வாய் திறக்க முடியவில்லை. நா குழறியது. தண்ணீ! தண்ணீ!”. ஈனமாக முனகினான்.

கூட்டத்திலிருந்த ஒருவன், “டே மச்சி, ஆள் க்ளோஸ்டா. பாரு, எவ்வளவு ரத்தம்? மண்டைலே அடி. இவன் நிச்சயம் பொழைக்க மாட்டான் !

இன்னொருத்தன் சொன்னான் கஷ்டம்பா! அடிபட்டு சாவருத்துக்கின்னே வரானுங்கோ !.ரோட்டை பார்த்து வரவே மாட்டனுங்கபா” .

நேரம் போய்க்கொண்டிருந்தது. கூட்டத்திலிருந்து யாரும் உதவிக்கு வருவதாக இல்லை. ஒவ்வொருவரும் இவ்வளவு பேர் இருக்காங்களே,நமக்கென்ன வந்தது?” என நினைத்தார்களோ என்னவோசில கார் ஓட்டிகள், போகிற போக்கில், தங்கள் ராஜ பார்வையை நகுலன் பக்கம் திருப்பி விட்டு த்சோ த்த்சோபோட்டு விட்டு சென்றனர்.

நேரம் போய்க்கொண்டிருந்தது. நகுலனுக்கு வலி பிராணன் போய்க்கொண்டிருந்தது. சிலர், தங்கள் ஸ்கூட்டரை நிறுத்தி நகுலனை பார்த்து விட்டு ஐயோ பாவம்! யாரு பெத்தபிள்ளையோ?” சொல்லிவிட்டு தங்கள் வழியே சென்றனர். கொஞ்சம் பேர், நமக்கெதுக்கு வம்பு என்று, கொஞ்சம் தள்ளியே வண்டியை ஒட்டிக் கொண்டு சென்றனர்.

நேரம் போய்க்கொண்டிருந்தது. இங்கே நகுலனுக்கு உயிர் போய்க் கொண்டிருந்தது. ஹெல்ப்! ஹெல்ப்! நகுலன் கதறினான். வாய் எழும்பவில்லை. சுற்றி நின்ற யாரும் உதவிக்கு வரவில்லை. வேடிக்கை பார்த்ததோட சரி.  கூட்டத்தில் யாரோ சொன்னார்கள் அந்த ஆள் உதடு அசையிது பாரு.கூட இருந்தவன் சொன்னான், “மச்சி, நீ போய் அவனை தொட்டுடாதே, பின்னாடி பிரச்னையாயிடும். அவன் பொழைக்க சான்சே இல்லை!

நேரம் போய்க்கொண்டிருந்தது. அப்போது கூட்டத்தை கிழித்து கொண்டு ஒரு தாடிக்கார ஆள் வேகமாக வந்தார். நேராக விழுந்து கிடந்த நகுலனிடம் போனார். கையை கொடு. எழுந்துக்கோ!என்றார். அட என்னை காப்பாற்ற கூட ஒருத்தன் வரானே!”. ஆச்சரியத்துடன் நகுலன் கையை நீட்டினான். கூட்டம் வேடிக்கை பார்த்துகொண்டிருந்தது.

தாடிக்காரர் நகுலனை தூக்கினார். அவரை பிடித்து கொண்டு நகுலன் எழுந்தான். எப்படி என்னால் எழுந்துக்க முடிந்தது? கண் இப்போ நல்லா தெரியுதே! அட நீங்களா? நேத்தி பில்ராத்லே பார்த்தோமே ? இப்போ  இங்க எப்படி ?”

தாடிக்காரர் சொன்னார் உங்க பின்னாடி தான் வந்து கிட்டிருந்தேன். சரி வாங்க போகலாம்! “ .

கூட்டம் வேடிக்கை பார்த்து கொண்டிருந்தது. தூரத்தில் ஆம்புலன்ஸ் வரும் சத்தம் கேட்டது. நகுலன் தற்செயலாக கீழே குனிந்தான். தரையில் ரத்த வெள்ளத்தில் , அசைவற்று ஒரு உடல். தன்னைப்  போலவே ஒருவன். உற்றுப் பார்த்தான். அவனே தான் !   ”நானா அது? நானா கீழே கிடப்பது ? அப்போ நீங்க யாரு?.” ஆச்சரியம் அவனுக்கு !

சிரித்தார் தாடிக்காரர் . நாந்தான் யமதூதன் !. நேத்தி உன் தம்பியை தூக்க வந்தேன். அவன் கிட்டே நெருங்க முடியலே. அவன் ஆயுசு கெட்டி. இன்னிக்கு உன்னை தூக்கிட்டேன். சரி, வா, நாம போகலாம்.

****முற்றும்

விவேகானந்தர் சொன்னது :

உன்னுடைய ஒவ்வொரு நல்ல எண்ணமும் , செயலும் ஒரு நூறாயிரம் தேவதைகளின் ஆற்றலுடன் உன்னை நிரந்திரமாக பாதுகாக்க தயராக இருக்கிறது என்பதை நீ எப்போதும் நினைவில் வைக்க வேண்டும். பிரதிபலன் கருதாமல் , நாம் உலகிற்கு செலுத்தும் ஒவ்வோர் நல்ல எண்ணமும் நமக்குள் சேகரித்து வைக்கபடுகிறது அத்தகைய நல்ல எண்ணம் நமது கர்ம சங்கிலியை ( கர்ம வினையை ) இணைக்கும் வளையம் ஒன்றை உடைத்தெறிகிறது

S.முரளிதரன்

Likes(1)Dislikes(0)
Share
Dec 162016
 

isro

காப்பாற்றியது… யாரு… இஸ்ரோ செயற்கை கோளு… அதிகாரிகள் தகவல்

மும்பை:
காப்பாற்றியது… யாரு… இஸ்ரோ செயற்கை கோள் என்ற தகவல் தற்போது தெரிய வந்துள்ளது.

சென்னையை வர்தா புயல் சின்னாபின்னாமாக்குவதற்கு முன்பே இஸ்ரோ செயற்கைகோள் அளித்த எச்சரிக்கை அலார்ட் தகவல் மூலம் 10 ஆயிரம் பேர் காப்பாற்றப்பட்டுள்ளனர் என்று சொல்லியிருக்காங்க… அதிகாரிகள்…

வங்கக்கடலில் உருவான வர்தா புயல் கடந்த திங்கட்கிழமை சென்னை, காஞ்சிபுரம், திருவள்ளூர் மாவட்டங்களை பதம் பார்த்து சின்னாபின்னமாக்கி விட்டு கரையை கடந்தது.

மரங்கள் வேரோடு சாய, மின்சார கம்பங்கள் சேதமடைய தொடர்ந்து நிவாரணப்பணிகள் நடந்து வருகிறது. இந்நிலையில், மழை வெள்ளத்திற்கு முன்னர் 10 ஆயிரத்திற்கும் மேற்பட்ட மக்கள் பத்திரமாக மீட்கப்பட்டுள்ளனர்.

இதற்கு இஸ்ரோ ஏவிய இன்சாட் 3 டிஆர் ஸ்காட்சேட் -1 செயற்கை கோள்கள் அளித்த தகவலே காரணம் என தெரிய வந்துள்ளது. இந்த செயற்கைகோள்கள், புயல் நகர்ந்து சென்ற திசை குறித்து தகவல் அளித்தது.

இதன் அடிப்படையில் அதிகாரிகள், புயல் தாக்கக்கூடிய பகுதிகளில் வசித்த மக்களை மீட்டு பத்திரமான இடங்களில் தங்க வைத்துள்ளனர். ஆந்திர கடற்கரை பகுதியிலும் மக்கள் மீட்கப்பட்டதாக அதிகாரிகள் தெரிவித்துள்ளனர். சபாஷ் இஸ்ரோ…

கலிபோர்னியாவில் கண்ணீர்… முதல்வர் மறைவுக்கு அஞ்சலி…

ப்ரீமாண்ட்:
மறைந்த தமிழக முதல்வர் ஜெயலலலிதாவுக்கு அமெரிக்காவில் இயங்கும் அண்ணா திராவிட முன்னேற்ற கழக பிரிவு சார்பில் சிலிக்கான்வேலியின் ப்ரீமாண்ட் நகரில் நினைவஞ்சலி செலுத்தப்பட்டது.

ஜெயலலலிதாவின் தீவிர விசுவாசியாகவும், அண்ணா திராவிட முன்னேற்ற கழக செயல் வீரராகவும் அறியப்பட்ட, அமெரிக்க ஒருங்கிணைப்பாளர் அபுகான் ஏற்பாடுகளைச் செய்திருந்தார்.

இந்திய தூதரக ஜெனரல் வெங்கடேசன் அசோக், இந்தியன் அமெரிக்கன் கவுன்சில் நிறுவனத் தலைவர் டாக்டர் ரொமேஷ் ஜப்ரா, ப்ரீமாண்ட் முன்னாள் துணை மேயர் அனு நடராஜன், கலிபோர்னியா முன்னாள் அமைச்சர் செ.மாதவனின் மகள் வெற்றிச் செல்வி ஆகியோர் கலந்து கொண்டு கண்ணீர் அஞ்சலி செலுத்தினர்.

பல்வேறு மொழி பேசும் இந்திய வம்சாவளியை சேர்ந்தவர்கள் முதல்வர் ஜெயலலிதாவுக்கு கண்ணீர் அஞ்சலி செலுத்தினர்.

செம்ம்மமமம என்று வாட்ஸ் அப் பிரியர்களுக்கு ஒரு விஷயம்! 

கலிபோர்னியா:
செம்ம்மமமம என்று வாட்ஸ் அப் பிரியர்களுக்கு ஒரு விஷயம் இருக்குங்க… இனி நீங்கள் வாட்ஸ்அப்பில் அனுப்பிய மெசேஜ்களை திரும்ப பெற்று, அவற்றை அழிக்கும் வசதிகள் வரபோகுதாம்…

உலகின் பிரபல குறுந்தகவல் செயலியாக அறியப்படும் வாட்ஸ்அப்பில் சில ஜிமெயில் வசதிகள் வழங்கப்பட இருக்காம். இதுகுறித்த தகவல் ட்விட்டர் தளத்தில் பதிவு செய்யப்பட்டுள்ளது.

வாட்ஸ்அப்பில் நீங்கள் அனுப்பிய மெசேஜ்களை திரும்ப பெறும் வசதி வழங்கப்பட இருக்காம். இனிவரும் அப்டேட்களில் நீங்கள் அனுப்பிய மெசேஜ்களை திரும்ப பெறுவது, அதை எடிட் செய்வது மற்றும் முழுமையாக அழித்து விடுவது போன்ற அம்சங்கள் வழங்கப்பட இருக்கு என்று சொல்லியிருக்காங்க…

அனுப்பிய மெசேஜ்களை திரும்ப பெறும் ஆப்ஷன் வழங்கப்படுகிறது என்றாலும், இந்த வசதி மெசேஜ் அனுப்பிய எத்தனை நொடிகளுக்கு வேலை செய்யும் என்பது குறித்து எவ்வித தகவலும் இல்லை.

பேஸ்புக் மட்டுமா செய்யும் நாங்களும் செய்வோம்ல… டுவிட்டரும் களத்தில் குதிப்பு

நியூயார்க்:
பேஸ்புக் மட்டுமா செய்யும் நாங்களும் செய்வோம்ல… என்று டுவிட்டரும் களத்தில் குதித்து லைவ் வீடியோ சேவையை அறிமுகம் செய்துள்ளது.

டுவிட்டர் என்றாலே பிரபலங்கள் மற்றும் அரசியல் தலைவர்கள் பலர் அதிகமாக பயன்படுத்தும் சமூக வலைதளமாக இருந்து வருகிறது. இந்நிலையில் பேஸ்புக் நிறுவனம் முதன் முதலில் லைவ் வீடியோ சேவையை அறிமுகம் செய்தது.

இந்த சேவையை பயனாளர்கள் முழுமையாக பயன்படுத்த முடியவில்லை என்ற குற்றச்சாட்டு எழுந்தது. இந்நிலையில் தற்போது டுவிட்டர் நிறுவனம் லைவ் வீடியோ சேவை அறிமுகம் செய்துள்ளது. ஆண்ட்ராய்ட் மற்றும் iOS பயனர்கள் என அனைவரும் இந்த சேவையை பயன்படுத்தலாம் என்று தெரிவிக்கப்பட்டுள்ளது.

இரட்டை சிம்முங்கோ… இரட்டை சிம்மு… அடுத்தாண்டு ஐபோனில் இருக்குமாம்!

சான்பிரான்சிஸ்கோ:
இரட்டை சிம்முங்கோ… இரட்டை சிம்மு இருக்கும் போலிருக்கே… என்று தகவல்கள் லீக் ஆகி உள்ளது. என்ன விஷயம் தெரியுங்கா?

ஆப்பிள் நிறுவனம் தயாரித்து வரும் 2017 ஐபோனில் டூயல் சிம் ஸ்லாட் வழங்கப்படும் என்பதுதான் அது. டூயல் சிம் தொழில்நுட்பத்தின் மூலம் ஒரே மொபைலில் இரு வேறு ஆன்டெனாக்களை இயக்குவதற்கான உரிமத்தை அமெரிக்க காப்புரிமை அலுவலகம் ஆப்பிள் நிறுவனத்திற்கு வழங்கியிருக்கிறது.

இதனால் இனிவரும் ஐபோனில் இரண்டு சிம் கார்டு ஸ்லாட் வழங்கப்படுவது கிட்டத்தட்ட உறுதி செய்யப்பட்டுள்ளது.

டூயல் சிம் கார்டுகளில் ஒன்றிற்கு வாய்ஸ் கால் மற்றொன்றிற்கு இண்டர்நெட் டேட்டா என முக்கியத்துவம் வழங்கப்படும் என்றே கூறப்படுகிறது. இத்துடன் இரண்டு ஸ்லாட்களிலும் 4G எல்டிஇ தொழில்நுட்பம் வழங்கப்படும். ஐபோன் 8’இல் டூயல் சிம் ஸ்லாட் வழங்கப்படுமா என்பது தற்சமயம் வரை உறுதி செய்யப்படாத ஒன்றாகவே உள்ளது.

டிஜிட்டல் பண பரிவர்த்தனை செய்யுங்க… பரிசுகளை அள்ளுங்க…

டில்லி:
டிஜிட்டல் பண பரிவர்த்தனை செய்யுங்க… பரிசுகளை அள்ளுங்க… அள்ளுங்க… என்று மத்திய அரசு அறிவித்துள்ளதாம்… என்ன விஷயம் தெரியுங்களா?

புழக்கத்தில் இருந்த பழைய 500, 1,000 ரூபாய் நோட்டுகள் செல்லாது என்று மத்திய அரசு கடந்த மாதம் 8-ம் தேதி அறிவித்தது. இதையடுத்து ரொக்கமில்லா பணப்பரிவர்த்தனைகளைக் குறைத்து, கிரெடிட், டெபிட் கார்டு (டிஜிட்டல்) பணப்பரிவர்த்தனைகளை ஊக்குவிப்பதற்கு மத்திய அரசு கடும் முயற்சி மேற்கொண்டுள்ளது.

இதன்படி மின்னணு பணப்பரிமாற்றத்தை ஊக்கிவிக்க நுகர்வோர்களுக்கு “லக்கி கிரஹக் யோஜனா திட்டம்” மற்றும் வணிகர்களுக்கு “டிஜி தன் வியாபார் யோஜனா” திட்டம் ஆகிய பரிசளிப்புத் திட்டங்களை நிதி ஆயோக் தலைமைச் செயலதிகாரி அமிதாப் காந்த் அறிவித்துள்ளார்.

இதன்படி சுமார் ரூ.340 கோடிக்கு பரிசுத் திட்டங்கள் அறிவிக்கப்பட்டுள்ளது.

வரும் கிறிஸ்துமஸ் முதல் 2017 ஏப்ரல் 14ம் தேதி வரை தினமும் 15 ஆயிரம் பேருக்கு தலா ரூ.1000 பரிசு வழங்கப்பட உள்ளது. மேலும், வாரந்தோறும் 7 ஆயிரம் பேருக்கு பரிசு வழங்கப்பட உள்ளது. அதிகபட்சமாக ரூ.1 லட்சம் வரை பரிசு வழங்கப்படும். பின்னர் 2017 ஏப்ரல் 14ம் தேதி மெகா பரிசு அறிவிக்கப்படும். முதல் பரிசாக ரூ.1 கோடியும், இரண்டாம் பரிசாக ரூ.50 லட்சமும், 3வது பரிசாக ரூ.25 லட்சமும் அறிவிக்கப்படும்.

டிஜி தன் வியாபார் யோஜனா திட்டத்தின் கீழ், கிறிஸ்துமஸ் முதல் 2017 ஏப்ரல் 14 வரை வாரந்தோறும் 7 ஆயிரம் வணிகர்களுக்கு பரிசு வழங்கப்பட உள்ளது. அதிகபட்சமாக ரூ.50 ஆயிரம் பரிசு வழங்கப்படும். ஏப்ரல் 14ம் தேதிக்கு நுகர்வோர் மற்றும் வணிகர்களுக்கு மெகா பரிசு வழங்கப்படும் என்று தெரிவிக்கப்பட்டுள்ளது.

மக்கள் நொந்து கிடக்க… ஆக்சிஸ் வங்கி செய்யுது அட்டூழியம்…

நொய்டா:
பணத்தட்டுப்பாட்டால் ஏடிஎம்களில் நாட்டு மக்கள் நொந்து போய் காத்துகிடக்க… ஆக்சிஸ் வங்கி செய்யும் அட்டூழியம் கோபத்தை கிளறி உள்ளது.

வருமான வரித்துறை அதிகாரிகள் நடத்திய அதிரடி சோதனையில் நொய்டாவில் உள்ள ஆக்சிஸ் வங்கியில் 20 போலி கணக்குகள் மூலம் கணக்கில் வராத ரூ.60 கோடி வரவு வைக்கப்பட்டுள்ளது கண்டுபிடிக்கப்பட்டுள்ளது.

ரூபாய் நோட்டு வாபசிற்கான காலக்கெடு முடிவடைய இன்னும் 16 நாட்கள் உள்ள நிலையில், கணக்கில் வராத பணத்தை வெளிக்கொண்டு வர வருமான வரித்துறை அதிகாரிகள் நாடு முழுவதும் சோதனை நடத்தி வருகின்றனர்.

இந்நிலையில் டில்லி அருகே நொய்டாவி்ல் ஆக்சிஸ் வங்கியில் வருமான வரித்துறை அதிகாரிகள் அதிரடியாக சோதனை நடத்தினர்.
இதில் அந்த வங்கியில் 20 போலி வங்கிக்கணக்குகளில் கணக்கில் வராத ரூ.60 கோடி டிபாசிட் செய்யப்பட்டது கண்டுபிடிக்கப்பட்டது.

கடந்த நவம்பர் 25ம் தேதி டில்லியில் உள்ள காஷ்மீரே கேட் பகுதியில் உள்ள ஆக்சிஸ் வங்கி கிளையில் வருமான வரித்துறை அதிகாரிகள் சோதனை நடத்தி ரூ.3.5 கோடி கணக்கில் வராத பணத்தையும், சாந்தினி சவுக் பகுதியிலும் உள்ள இதே வங்கி கிளையிலும் சோதனை நடத்தினர் என்பது குறிப்பிடத்தக்கது.

ராஜஸ்தான் மாநிலம் ஜெய்ப்பூரில் நடந்த மற்றொரு சோதனையில் ரூ.35 லட்சம் அளவுக்கு புதிய ரூபாய் நோட்டுகள் பறிமுதல் செய்யப்பட்டது. போலீசாருக்கு கிடைத்த ரகசிய தகவல் அடிப்படையில் இந்த சோதனை நடத்தப்பட்டது. இப்படி தொடர்ந்து இதுபோன்ற முறைகேடுகளில் ஆக்சிஸ் வங்கி ஊழியர்கள் ஈடுபடுவது மக்கள் மத்தியில் கொந்தளிப்பை ஏற்படுத்தி உள்ளது.

போச்சே… போச்சே… நல்ல முட்டை போச்சே… வதந்தியால் மக்கள் அவதி

சேலம்:
போச்சே… போச்சே… வதந்தியால நல்ல முட்டைகளை தூக்கி போட்டு உடைச்சுட்டோமேன்னு சேலம் மக்கள் நொந்துக்கிறாங்க… ஆராயாமல் செய்தால் இப்படிதாங்கோ…

சேலம் மாவட்டத்தில் செயற்கை முட்டைகள் விற்பனைக்கு வந்திருப்பதாக கிடுகிடுவென ஒரு வதந்தி பரவ… பொது மக்கள் பீதியடைந்தனர். தாங்கள் வாங்கி வைத்திருந்த முட்டைகளை உடைத்து பார்த்துள்ளனர். அப்போது பாலிதீன் பேப்பர் போல் இருந்ததால் அதிர்ச்சியடைந்த அவர்கள் அனைத்து முட்டைகளையும் உடைத்துள்ளனர்.

சேலம் மாவட்டம் பொன்னம்மாபேட்டை, தாதகாப்பட்டி உட்பட பல பகுதிகளில் உள்ள கடைகளில் செயற்கை முட்டைகள் விற்பனை செய்யப்படுவதாக பொது மக்களிடையே வதந்தி பரவியது.  உடனே வீடுகளுக்கு விரைந்த அவர்கள் தாங்கள் வாங்கி வைத்திருந்த முட்டைகளை சாலையில் போட்டு உடைத்தனர்.

முட்டையின் உள்புறம் உள்ள அடுக்கில் பாலிதீன் பொருள் போன்ற படிமம் உள்ளதாகவும் பொதுமக்கள் அச்சம் தெரிவிக்க… விரைந்து வந்த உணவு பாதுகாப்பு துறை அதிகாரிகள் முட்டை கிடங்குகளில் சோதனை மேற்கொண்டனர்.

முட்டைகளை அவர்கள் உடைத்தும், வேக வைத்தும் சோதனை செய்தனர்.  இதில் செயற்கையான முட்டைகள் இல்லை என்று அதிகாரிகள் தெரிவிக்க… இப்போது மக்கள் ஐயோ… போச்சே… முட்டை போச்சே என்று புலம்புகின்றனர்.

மீண்டும் பெட்ரோல் விலை உயரும்… மக்கள் டென்ஷன்…

புதுடில்லி:
மீண்டும் பெட்ரோல் விலை உயரும் என்ற தகவல் மக்களை செம டென்ஷனில் ஆழ்த்தியுள்ளது.

கச்சா எண்ணெய் உற்பத்தி அளவை குறைக்க ஒபெக் நாடுகளின் கூட்டமைப்பு முடிவு செய்துள்ளது. இதற்கு ரஷ்ய நாடும் ஒப்புதல் வழங்கியுள்ளது. இதனால் சர்வதேச சந்தையில் கச்சா எண்ணெயின் விலை அதிகரிக்கத் தொடங்கியுள்ளது.

கடந்த சில மாதங்களாக 50 டாலருக்கும் குறைவாகவே இருந்து வந்த கச்சா எண்ணெய் பேரல் விலை தற்போது 55 டாலரை கடந்துள்ளது. அதன்படி கச்சா எண்ணையை இறக்குமதி செய்யும் நாடுகள் விலையை அதற்கேற்ப நிர்ணயித்து வருகின்றனர். இந்நிலையில் பெட்ரோல் விலை ரூ.6 வரை உயர வாய்ப்புள்ளதாகவும் கூறப்படுகிறது.

இத்தகவல் பொதுமக்களை மிகவும் டென்ஷனாக்கி இருக்கிறது. இப்படி விலை உயர்ந்துகொண்டே சென்றால் என்ன செய்வது என்று புரியாமல் நடுத்தர மக்கள் கவலையடைந்துள்ளனர்.

N.நாகராஜன்

Likes(1)Dislikes(0)
Share
Dec 142016
 

bur

உள்ளே போ… சிறை உள்ளே போ… புர்கா அணியாமல் படம்…

சவுதிஅரேபியா:
புர்கா அணியாமல் புகைப்படமா? உள்ளே போ… சிறை உள்ளே போ என்று ஒரு பெண்ணை போலீசார் கைது செய்துள்ளனர்.

சவுதி அரேபியாவில் புர்கா அணியாமல் முகம் தெரியும்படி புகைப்படம் எடுத்து அதை டுவிட்டர் பக்கத்தில் பதிவிட்ட பெண்ணை போலீசார் கைது செய்தனர்.

கடந்த மாதம் சவுதி அரேபியா ரியாத்தில் உள்ள ஒரு தெருவில் முகத்திரை அணியாமல் ஒரு பெண் புகைப்படம் எடுத்துள்ளார். அதை தனது டுவிட்டர் பக்கத்தில் பதிவிட, இப்போது அதுவே அவருக்கு வினையாகி விட்டது.

அந்த பெண்ணை போலீசார் பொது ஒழுக்க மீறல்கள் அடிப்படையில் கைது செய்தனர். சவுதியில் பெண்கள் பொது இடங்களுக்கு செல்லும்போது தலை முதல் கால்வரை மறைக்கக்கூடிய புர்கா என்ற உடையை அணிய வேண்டும் என்பது அந்நாட்டு சட்டம். இதை மீறுபவர்கள் கடுமையாக தண்டிக்கப்பட்டு வருகின்றனர்.

இரண்டே நிமிடம்… இரண்டே நிமிடம்தான்… விமான சேவை சாதனை

ஸ்காட்லாந்த்:
இரண்டே நிமிடம்… இரண்டே நிமிடம்தான்… ஏறி அமர்வதும் தெரியாது… இறங்குவதும் தெரியாது… சாதனை சேவை இது. என்ன தெரியுங்களா?

ஸ்காட்லாந்தின் வடகிழக்குக் கடல் பகுதியில் அமைந்திருக்கும் இரு தீவுகள் இடையே, வெறும் இரண்டு நிமிடங்களுக்குப் பறக்கும் விமான சேவை இருக்கிறது.

அதிகாரப்பூர்வமாக அறிவிக்கப்பட்டிருக்கும் பயண நேரம்தான் 2 நிமிடம். காற்று வீச்சு சாதகமாக இருந்தால், ஐஸ்ட் 47 வினாடிகளில் பயணம் முடிந்துவிடும். பயண தூரம் 1.7 மைல்தான்.

1967-ம் ஆண்டிலேயே அறிமுகம் செய்யப்பட்டுவிட்ட இவ்விமான சேவை, இன்று வரை வெற்றிகரமாக செயல்படுத்தப்பட்டு வருகிறது.
இந்த விமான சேவை புகழ்பெற்றிருப்பதையும் விட, இத்தீவுகளில் வசிக்கும் மக்களுக்கு இது உயிர்நாடியாக உள்ளது என்பதுதான் முக்கியமானது.

நம்ம ஊருல டவுன் பஸ்சுக்காகவே பல மணிநேரம் காத்து கிடக்க வேண்டி உள்ளது. இந்த விமான சேவை கின்னசில் இடம் பிடித்துள்ளது.

வரும் காலங்களில் வலுவான புயல்தான்… ஜாக்கிரதை… ஜாக்கிரதை…

அலகாபாத்:
ஜாக்கிரதையாக இருங்கோ… முன்னெச்சரிக்கையாக இருங்கோ என்று மக்களை எச்சரிக்கை படுத்தி உள்ளனர் விஞ்ஞானிகள். எதற்கு என்கிறீர்களா?

இனி வரும் காலங்களில் வங்கக்கடலில் அதிகளவில் புயல்கள் உருவாகி தமிழ்நாடு மற்றும் ஆந்திரா ஆகிய மாநிலங்களை தாக்கும் என்ற எச்சரிக்கையை தான் விஞ்ஞானிகள் தெரிவித்துள்ளனர்.

வர்தா புயலால் சென்னை அடைந்த சேதம் அனைவரும் அறிந்தது. ஒரே நாளில் அதிகபட்சமாக 192 கி.மீ வேகத்தில் காற்று வீசியது. மரங்கள் அடியோடு சாய்ந்தன. மின்சார கம்பங்கள் சாய்ந்து சென்னையில் மின்சாரம் துண்டிக்கப்பட்டது.

இந்நிலையில் இனி வரும் காலங்களில் வங்கக்கடலில் அதிக அளவில் புயல்கள் உருவாகி தமிழ்நாடு மற்றும் ஆந்திராவை தாக்கும் என்று ஆய்வில் தெரியவந்து மக்கள் மத்தியில் பீதியை கிளப்பி உள்ளது.

அலகாபாத் பல்கலைக்கழகத்தை சேர்ந்த அசுதோஸ் மிஸ்ரா தலைமையிலான குழுவினர் 2014-ம் ஆண்டு இதுதொடர்பாக ஆய்வு நடத்தி எர்த் சயின்ஸ் அறிவியல் பத்திரிகையில் கட்டுரை ஒன்றை வெளியிட்டனர்.

அதில், தொழிற்சாலைகளால் கடல் வெப்பநிலை தொடர்ந்து அதிகரித்து வருவதால் வங்கக்கடல் பகுதியில் இனி வெப்ப மண்டல புயல்கள் அதிகளவில் உருவாகும். இனி வரும் காலங்களில் உருவாகும் புயல்களின் சக்தி அதிகரிக்கும் என்று சொல்லியிருக்காங்க…

உலகின் மெல்லிய யோகா புக் 2 இன் 1 லேப்டாப்… லெனோவோ அறிமுகம்

நியூயார்க்:
உலகின் மெல்லிய யோகா புக் 2 இன் 1 லேப்டாப் சாதனத்தை லெனோவோ நிறுவனம் இந்தியாவில் அறிமுகம் செய்திருக்காங்க… செய்திருக்காங்க…

இந்த லேப்டாப் இந்த ஆண்டு நடைபெற்ற ஐஎப்ஏ விழாவில் அறிமுகம் செய்யப்பட்டு இருக்கு. உலகின் மெல்லிய 2 இன் 1 சாதனமாக அறியப்படும் லெனோவோ யோகா புக் விலை ரூ.49,990 என நிர்ணயம் செய்யப்பட்டுள்ளது.

இந்த லேப்டாப்பில் உலகின் முதல் ஹாலோ வகை கீபோர்டு வழங்கப்பட்டுள்ளது.  லெனோவோ யோகா புக் 2 இன் 1 சாதனத்தின் ஹைப்ரிட் மாடல் கார்பன் பிளாக் மற்றும் ரியல் பென் இன்புட் போன்ற சேவைகள் வழங்கப்பட்டுள்ளன. விண்டோஸ் இயங்குதளம் உள்ளது. ஆண்ட்ராய்டு இயங்குதளம் கொண்டு இயங்கும் லெனோவோ யோகா புக் இந்தியாவில் வெளியிடப்படாது என தெரிவிக்கப்பட்டுள்ளது.

ஹாலோ கீபோர்ட் ஆனது முழுமையான டச் ஸ்கிரீன் கொண்ட பேக்லிட் கீபோர்டு அமைப்பு கொண்டுள்ளது. கேபாசிட்டிவ் கீபோர்டு என்பதால் செயற்கை நுண்ணறிவு தொழில்நுட்பத்தை பயன்படுத்தி உங்களின் டைப்பிங் முறையை பதிவு செய்து கொண்டு அவற்றை கணிக்கும் என தெரிவிக்கப்பட்டுள்ளது.

கம்ப்யூட்டரா… நாங்களா… புதிய ஸ்மார்ட் போன்கள் களத்துக்கு வருது…

வாஷிங்டன்:
கம்ப்யூட்டரா… நாங்களா என்று பார்த்துவிடுவோம் என்ற ரீதியில் ஸ்மார்ட் போன் ஒன்று அடுத்த ஆண்டு களத்தில் இறங்கி வலு காட்ட உள்ளதாம்.

என்ன விஷயம் தெரியுங்களா? அடுத்த ஆண்டு வெளியாக இருக்கும் மைக்ரோசாப்ட் சர்பேஸ் ப்ரோ ஸ்மார்ட்போன்கள் கம்ப்யூட்டருக்கு நிகரான வேகத்தில் இயங்கும் என்று சொல்றாங்க…

மைக்ரோசாப்ட் சர்பேஸ் ப்ரோ 2017 ஸ்மார்ட்போனில் வழங்கப்படும் சிறப்பம்சங்கள் சார்ந்த தகவல்கள் லீக் ஆகி மக்களை ஏங்க வைத்துள்ளது. எனினும் இது சர்பேஸ் போன் தானா அல்லது வேறு ஏதேனும் மாடல் போனா என்பது குறித்து எவ்வித தகவலும் இல்லை.

இது ஒரு ஹைப்ரிட் போனாக இருக்கும் என்று தெரிகிறது. மைக்ரோசாப்ட் தயாரித்து வரும் உயர் ரக ஸ்மார்ட்போன் ஆப்பிள் ஐபோன்களுக்கு போட்டியளிக்கும் விதமாக அமையும் என்று வல்லுநர்கள் எதிர்பார்க்கின்றனர்.

புதிய இயங்குதளம் என்பதால் இந்த ஸ்மார்ட்போன் அதிக சக்தி வாய்ந்ததாக இருப்பதோடு அதிநவீன சர்பேஸ் போனாகவும் இருக்கும். கம்ப்யூட்டருக்கு இணையான வேகத்தில் இவை இருக்கும் என்று சொல்றாங்க… சொல்றாங்க…

குளியலறைக்குள் பதுக்கல் அறை… அதுக்குள்ளே… கோடி கோடியாய் பணம்…

பெங்களூர்:
அடப்பாவி… பதுக்கி வைக்கறதுக்காகவே தனியாக ரூம் கட்டியிருப்பாங்க போலிருக்கே… என்கின்றனர் மக்கள். என்னா சங்கதின்னா…

பெங்களூரில் ரூ.5.7 கோடி புதிய ரூபாய் நோட்டுகளை குளியலறையில் ரகசியமாக மறைத்து வைத்திருந்த மேட்டரில் ரிசர்வ் வங்கி அதிகாரியை சிபிஐ அதிகாரிகள் கைது செய்த சங்கதிதான் இப்போ செம ஹாட்.

500 மற்றும் 1000 ரூபாய் நோட்டுகள் செல்லாது என்று அறிவித்த மத்திய அரசு, பழைய ரூபாய் நோட்டுகளை மாற்ற பல்வேறு விதிமுறைகளை விதித்தது. இருந்தாலும் தில்லாங்கடி வேலைகள் நடந்து பணப் பரிமாற்றம் ஆகுது.

இந்நிலையில் கர்நாடக மாநிலம் சித்ரதுர்கா மாவட்டத்தில் உள்ள ஹவாலா டீலர் ஒருவரின் வீட்டில் வருமான வரித்துறை அதிகாரிகள் சோதனை நடத்த அங்கு அவங்களுக்கு அதிர்ச்சியோ… அதிர்ச்சி.

குளியலறைக்குள் ரகசிய அறையே கட்டியிருக்காங்க… அதுல பதுக்கி வைக்கப்பட்டிருந்த ரூ.5.7 கோடி மதிப்பிலான புதிய ரூபாய் நோட்டுகள் சிக்கியது. இதுதொடர்பாக சிபிஐ அதிகாரிகள் அவரை கைது செய்து விசாரணை நடத்தினார். அதில் ரிசர்வ் வங்கி அதிகாரி மைக்கேல் என்பவரும் சிக்க… இப்ப அவருக்கும் காப்பு மாட்டிட்டாங்க… சிபிஐ அதிகாரிகள்.

வர்தா புயலால் தருமபுரி, கிருஷ்ணகிரி, நாமக்கல்லில் மழை பெய்யுமாம்!

சென்னை:
வர்தா புயல் வலுவிழந்து காற்றழுத்த தாழ்வு மண்டலமாக மாறி தருமபுரி அருகே நகர்ந்து 40 கி.மீ. தொலைவில் நிலைக்கொண்டுள்ளது என்று சென்னை வானிலை ஆய்வு மையம் தெரிவித்துள்ளது.

வங்கக் கடலில் மையம் கொண்ட வர்தா புயல் நேற்றுமுன்தினம் சென்னையை சூறையாடியது. புயல் காற்றால் கட்டங்களின் மேற்கூரைகள் அலேக்காக பறந்தன. சாலைகளில் நிறுத்தப்பட்டிருந்த கார்கள் குப்பை காதிகங்கள் போல் தூக்கி வீசப்பட்டன.

புயல் கரையைக் கடந்தபோது வீசிய பேய்க்காற்றால் பல கட்டடங்களின் கண்ணாடி ஜன்னல்கள், விளம்பர பலகைகள், பெட்ரோல் பங்க் மேற்கூரை, ரயில்வே பிளாட்பார கூரைகள் எங்கு சென்றது என்றே தெரியாத நிலை.

இந்த வர்தா புயல் திருவண்ணாமலை மாவட்டம் வழியாக செல்லும் போது வலுவிழந்து குறைந்த காற்றழுத்த தாழ்வு மண்டலமாக மாறியது. இவை தற்போது, தருமபுரி அருகே நகர்ந்து 40 கிமீ தொலைவில் நிலைக்கொண்டுள்ளது என்று சென்னை வானிலை ஆய்வு மையம் தெரிவித்துள்ளது.

இதனால் தருமபுரி, கிருஷ்ணகிரி, நாமக்கல் மற்றும் சேலம் மாவட்டங்களில் மழைக்கு வாய்ப்புள்ளதாகவும், ஒரு சில இடங்களில் கனமழை பெய்ய வாய்ப்புள்ளதாகவும் தெரிவிக்கப்பட்டுள்ளது.

வர்தா புரட்டி போட்ட சென்னை… அரசு அதிவிரைவு மீட்பு பணி…

சென்னை:
புரட்டி போடப்பட்ட சென்னையில் அரசின் அதிவிரைவு மீட்புப்பணிகளால் மக்களின் இயல்பு நிலை திரும்பி வருகிறது.

வர்தா புயல் திங்கட்கிழமை சென்னை அருகே கரையை கடந்தது. இதனால் சென்னையில் அதிகபட்சமாக மணிக்கு 192 கிலோமீட்டர் வேகத்தில் காற்று வீசியது. மேலும் பல இடங்களில் கனமழையும் பெய்தது.

இந்த புயலால் இதுவரை 10 பேர் பலியாகியுள்ளனர். இதற்கிடையே தமிழக அரசு சீரமைப்பு பணிகளை துரிதப்படுத்தியுள்ளது. விழுந்து கிடக்கும் மரங்கள், மின் கம்பங்களை அகற்றும் பணிக்கு முக்கியத்துவம் அளிக்கப்பட்டு விரைவாக பணிகள் நடந்தது.

சென்னையில் இயல்பு நிலை மெல்ல மெல்ல திரும்பி வருகிறது. பஸ்கள், ஆட்டோக்கள் ஓடத் துவங்கியுள்ளன. சீரமைப்பு பணிகளில் பிற மாவட்ட பணியாளர்கள் ஈடுபட்டு வருகிறார்கள். சீரமைப்பு பணிகள் முழுவீச்சில் நடைபெற்று வருகிறது என்பது குறிப்பிடத்தக்கது.

N.நாகராஜன்

Likes(0)Dislikes(0)
Share
Share
Share